CSlElizabeth - Acts - 2

2:1  И егда скончавашася дние Пятьдесятницы, беша вси Апостоли единодушно вкупе.

2:2  И бысть внезапу с небесе шум, яко носиму дыханию бурну, и исполни весь дом, идеже бяху седяще:

2:3  и явишася им разделени языцы яко огненни, седе же на единем коемждо их.

2:4  И исполнишася вси Духа Свята и начаша глаголати иными языки, якоже Дух даяше им провещавати.

2:5  Бяху же во Иерусалиме живущии Иудее, мужие благоговейнии, от всего языка, иже под небесем.

2:6  Бывшу же гласу сему, снидеся народ и смятеся, яко слышаху един кийждо их своим языком глаголющих их.

2:7  Дивляхуся же вси и чудяхуся, глаголюще друг ко другу: не се ли, вси сии суть глаголющии Галилеане?

2:8  И како мы слышим кийждо свой язык наш, в немже родихомся,

2:9  Парфяне и Мидяне и Еламите, и живущии в Месопотамии, во Иудеи же и Каппадокии, в Понте и во Асии,

2:10  во Фригии же и Памфилии, во Египте и странах Ливии, яже при Киринии, и приходящии Римляне, Иудее же и пришелцы,

2:11  критяне и аравляне, слышим глаголющих их нашими языки величия Божия?

2:12  Ужасахуся же вси и недоумевахуся, друг ко другу глаголюще: что убо хощет сие быти?

2:13  Инии же ругающеся глаголаху, яко вином исполнени суть.

2:14  Став же Петр со единонадесятьми, воздвиже глас свой и рече им: мужие Иудейстии и живущии во Иерусалиме вси, сие вам разумно да будет, и внушите глаголы моя:

2:15  не бо, якоже вы непщуете, сии пияни суть, есть бо час третий дне:

2:16  но сие есть реченное пророком Иоилем:

2:17  и будет в последния дни, глаголет Господь, излию от Духа Моего на всяку плоть, и прорекут сынове ваши и дщери вашя, и юноши ваши видения узрят, и старцы ваши сония видят:

2:18  ибо на рабы Моя и на рабыни Моя во дни оны излию от Духа Моего, и прорекут:

2:19  и дам чудеса на небеси горе и знамения на земли низу, кровь и огнь и курение дыма:

2:20  солнце преложится во тму, и луна в кровь, прежде даже не приити дню Господню великому и просвещенному:

2:21  и будет, всяк, иже аще призовет имя Господне, спасется.

2:22  Мужие Израилстии, послушайте словес сих: Иисуса Назореа, Мужа от Бога извествованна в вас силами и чудесы и знамении, яже сотвори Тем Бог посреде вас, якоже и сами весте,

2:23  Сего нарекованным советом и проразумением Божиим предана приемше, руками беззаконных пригвождше убисте:

2:24  Егоже Бог воскреси, разрешив болезни смертныя, якоже не бяше мощно держиму быти Ему от нея.

2:25  Давид бо глаголет о Нем: предзрех Господа предо мною выну, яко о десную мене есть, да не подвижуся:

2:26  сего ради возвеселися сердце мое, и возрадовася язык мой: еще же и плоть моя вселится на уповании,

2:27  яко не оставиши души моея во аде, ниже даси преподобному Твоему видети истления:

2:28  сказал ми еси пути живота: исполниши мя веселия с лицем Твоим.

2:29  Мужие братие, достоит рещи с дерзновением к вам о патриарсе Давиде, яко и умре и погребен бысть, и гроб его есть в нас даже до дне сего:

2:30  пророк убо сый и ведый, яко клятвою клятся ему Бог от плода чресл его по плоти воздвигнути Христа и посадити Его на престоле его,

2:31  предвидев глагола о воскресении Христове, яко не оставися душа Его во аде, ни плоть Его виде истления.

2:32  Сего Иисуса воскреси Бог, емуже вси мы есмы свидетелие.

2:33  Десницею убо Божиею вознесеся, и обетование Святаго Духа приемь от Отца, излия сие, еже вы ныне видите и слышите.

2:34  Не бо Давид взыде на небеса, глаголет бо сам: рече Господь Господеви моему: седи о десную Мене,

2:35  дондеже положу враги Твоя подножие ног Твоих.

2:36  Твердо убо да разумеет весь дом Израилев, яко и Господа и Христа его Бог сотворил есть, Сего Иисуса, Егоже вы распясте.

2:37  Слышавше же умилишася сердцем и реша к Петру и прочым Апостолом: что сотворим, мужие братие?

2:38  Петр же рече к ним: покайтеся, и да крестится кийждо вас во имя Иисуса Христа во оставление грехов: и приимете дар Святаго Духа:

2:39  вам бо есть обетование и чадом вашым и всем дальним, елики аще призовет Господь Бог наш.

2:40  И иными словесы множайшими засвидетелствоваше и моляше я, глаголя: спаситеся от рода строптиваго сего.

2:41  Уже убо любезно прияша слово его, крестишася: и приложишася в день той душ яко три тысящы:

2:42  бяху же терпяще во учении Апостол и во общении и в преломлении хлеба и в молитвах.

2:43  Бысть же на всякой души страх: многа бо чудеса и знамения Апостолы быша во Иерусалиме.

2:44  Страх же велий бяше на всех их. Вси же веровавшии бяху вкупе и имяху вся обща:

2:45  и стяжания и имения продаяху, и раздаяху всем, егоже аще кто требоваше:

2:46  по вся же дни терпяще единодушно в церкви и ломяще по домом хлеб, приимаху пищу в радости и в простоте сердца,

2:47  хваляще Бога и имуще благодать у всех людий. Господь же прилагаше по вся дни Церкви спасающыяся.