Kapingamarangi - Deuteronomy - 11

11:1  “Aloho i Dimaadua di-godou God mo-di daudali ana haganoho huogodoo i-nia madagoaa huogodoo.

11:2  Dangi-nei, goodou gi-langahia godou mee ala ne-kabe i-baahi Dimaadua mai godou gidee ana hegau. Goodou gu-gidee di aamua o Dimaadua, ono mogobuna, ono mahi,

11:3  mo ono mogobuna hagagoboina dangada. Goodou gu-gidee dana hai ne-hai gi-di king o Egypt, mo dono henua hagatau.

11:4  Goodou gu-gidee Dimaadua ne-daaligi gi-daha digau dauwa Egypt hagatau, mo nadau hoodo mo nadau kulumaa, mai i dana haga-abulu digaula i-lodo Tai Mmee, di madagoaa digaula nogo waluwalu mai goodou.

11:5  Goodou e-iloo di-mee Dimaadua ne-hai-adu i-hongo di anggowaa i-mua di-godou dau-mai gi kinei.

11:6  Goodou e-langahia dana hai ne-hai gi Dathan mo Abiram, nia dama daane a Eliab mai di madawaawa Reuben. I-mua nia hadumada o-nia daangada huogodoo, henuailala ne-mahuge gi-nua ga-hagaholi meemaa, mo nau madahaanau, nau hale-laa, nau gau hai-hegau, mo nau manu huogodoo.

11:7  Uaa, ma go goodou go digau ala ne-mmada gi-nia mee hagagoboina huogodoo Dimaadua ala ne-hai.

11:8  “Daudalia agu mee huogodoo ala ne-helekai-adu gi goodou dangi-nei. Gei goodou gaa-mee di-lloo-adu laa-lodo di monowai, gaa-noho i tenua dela bolo ga-ulu ginai goodou.

11:9  Ge goodou gaa-noho waalooloo i tenua tomo ge logo ono meegai, dela ne-hagababa go Dimaadua bolo e-wanga gi godou maadua mmaadua mo nadau hagadili gi-muli.

11:10  Tenua dela bolo ga-noho-ai goodou, la hagalee hai be Egypt, dela nogo noho goodou anadilaangi. Di madagoaa goodou ne-dogi godou golee laagau i-golo, gei goodou e-ngalua kono ginai, e-hai nia wai e-haganannanu nia gowaa dogi-mee.

11:11  Gei tenua dela bolo ga-ulu ginai goodou, la tenua gonduu, ono gowaa baba, tenua e-honu ono wai uwa.

11:12  Dimaadua di-godou God, e-madamada humalia tenua deenei, ge pula-ai di-maa i-lodo di ngadau.

11:13  “Malaa, daudalia nnagababa ala gu-gowadu ko-au dangi-nei, aloho i Dimaadua di-godou God, ge gi-hai-hegau gi Mee mai i godou manawa hagatau.

11:14  Maa goodou gaa-hai nia mee aanei, gei Mee ga-hagau-eia ana uwa gi godou gowaa, i-di madagoaa dela e-humalia ginai nia maa, i-lodo di madagoaa dogi-mee mo-di madagoaa hadi-mee, gi-iai godou huwa laagau ‘wheat’, waini, mono lolo-olib,

11:15  mo nia geinga-tolo ang-gi godou kau. Goodou ga-hai-mee gi-nia meegai huogodoo ala e-hiihai ginai goodou.

11:16  Hudee heia goodou gi-dagia gi-daha mo Dimaadua, bolo e-daumaha ge hai-hegau gi-nia balu-ieidu.

11:17  Maa goodou gaa-hai beelaa, gei Dimaadua ga-hagawelewele adu gi goodou. Mee gaa-dugu nia uwa, gei godou gelegele ga-maangoo di tomo nia meegai. Gei hoohoo-mai-hua, gei goodou gaa-mmade i-golo, ma e-aha maa tenua la tenua humalia dela e-gowadu go Mee gi goodou.

11:18  “Goodou gi-langahia nnagababa aanei, mo-di haga-dahidamee-ina nia maa. Lawalawa-ina gi-hongo godou lima, mo-di ulu i-hongo godou lae, e-haga-langalangahia-adu gi goodou.

11:19  Aago-ina nia maa gi godou dama. Helehelekai i-nia maa i godou hale mo i-nia gowaa ala e-noho-ai goodou, mo godou madagoaa e-hagamolooloo-ai, mo godou madagoaa e-ngalua.

11:20  Hihia nia maa i-hongo nia duludulu nia bontai godou hale, mo i-hongo nia bontai godou abaaba.

11:21  Gei goodou mo godou dama ga-mouli waalooloo i tenua Dimaadua di-godou God, ne-hagababa bolo e-wanga gi godou damana-mmaadua. Goodou gaa-noho waalooloo be di waalooloo o-di langi dela i baahi-i-nua henuailala hua igolo.

11:22  “Daudalia hagahumalia nnaganoho huogodoo ala ne-helekai ko-au adu gi goodou. Aloho i Dimaadua di-godou God, heia ana mee huogodoo ala ne-helekai bolo gi-heia, ge gi-manawa-dahi gi Mee.

11:23  Gei Mee ga-hagabagi nia henua huogodoo i-mua di-godou lloo-adu, gei goodou gaa-noho i nnenua digau ala e-aamua ge maaloo i goodou.

11:24  Nia gowaa huogodoo ala e-taele-ai goodou nonua, gaa-hai nia gowaa ni goodou. Di-godou henua la-ga-duudagi mai di gowaa baba dela i-bahi-i-ngaaga gaa-hana gi-nia Gonduu Lebanon i bahi-i-ngeia, mo mai di Monowai Euphrates i-bahi-i-dua gaa-hana gi Tai Mediterranean i-bahi-i-dai.

11:25  Dimaadua di-godou God gaa-hai nia daangada gi-mmaadagu i goodou i tei gowaa hua dela e-hula ginai goodou i-lodo tenua deelaa, be dana hagababa dela ne-hai, malaa, deai tangada e-mee di-dugu goodou ai.

11:26  “Dangi-nei gei au e-gowadu gi goodou di hilihili mehanga di hagahumalia mo-di haga-huaidu:

11:27  Goodou gaa-kae di hagahumalia, maa goodou ga-daudali nia hagababa Dimaadua di-godou God, ala e-gowadu ko-au gi goodou dangi-nei,

11:28  gei goodou gaa-kae di hagahuaidu, maa goodou ga-hagalee daudali nia hagababa aanei, gaa-huli gi-daha ga-daumaha gi-nia balu-ieidu ala digi daumaha ginai goodou anadilaangi.

11:29  Di madagoaa Dimaadua ma-ga-laha-mai goodou gi-lodo tenua dela belee hai-henua ginai goodou, goodou belee haga-iloo di hagahumalia mai tomo di Gonduu Gerizim, ge gi-haga-iloo di hagahuaidu mai tomo di Gonduu Ebal.

11:30  (Nia gonduu e-lua aanei la i-bahi-i-dai di Monowai Jordan, i-lodo tenua digau Canaan ala e-noho i-hongo di gowaa mehanga gonduu o Jordan. Nia gonduu aanei la adu gi-bahi-i-dai, hagalee mogowaa i-nia laagau hagamadagu o Moreh, hoohoo gi-di waahale o Gilgal.)

11:31  Goodou ala ga-tuu-adu laa-lodo di Monowai Jordan, gaa-noho i tenua Dimaadua di-godou God e-gowadu gi goodou. Di madagoaa goodou gaa-kae di-maa gaa-noho i-golo,

11:32  gei goodou heia gi-daudali nnaganoho huogodoo ala e-gowadu ko-au gi goodou dangi-nei.