Kapingamarangi - Deuteronomy - 32

32:1  “Di langi i-nua mo henuailala, hagalongo gi agu helekai gi digau Israel, hagalongo gii-donu.

32:2  Agu agoago ga-monnono be-nia madaua o-di uwa, ga-hagabudu i-hongo o henuailala gadoo be-di magalillili o-di ahiaalangi. Agu helekai gaa-doo be-di uwa gi-hongo nia dama-laagau, ga-honihoni be-di uwa ma-ga-honihoni gi-hongo nia geinga-tolo ala e-tomo-aga i-lala.

32:3  Gei au ga-hagadele ga-hagaamu di ingoo o Dimaadua, gei ana daangada ga-agoago dono aamua.

32:4  “Dimaadua la-go di-godou Dangada Abaaba Aamua, e-hai donu gei hagalee hai-gee i-lodo ana haihai huogodoo. Di-godou God le e-manawa-dahi ge e-donu. Mee e-hai di mee dela e-donu gei e-humalia.

32:5  Malaa, goodou hagalee manawa-dahi ge hagalee tau belee hai ana dama. Goodou la tenua e-honu di huaidu mo nia hagahuaidu huogodoo.

32:6  Goodou tenua dadaulia, e-hai behee: ma deenei di hai e-hai ang-gi Dimaadua? Go Mee go di-godou damana dela ne-hai goodou gii-hai tenua.

32:7  “Goodou gi-maanadu-ina di madagoaa i-mua-loo. Heeu-ina gi godou maadua gi-hagi-adu gi goodou nia mee ala ne-hai. Heeu-ina gi godou daangada mmaadua gi-hagi-adu gi goodou di madagoaa i-mua.

32:8  God Aamua Muginua ne-wanga nia gowaa gi-nia daangada. Ma go Mee dela ne-haga-noho nia daangada gi-nia gowaa ala e-noho-ai digaula. Mee guu-wanga tangada di-langi e-dahi ang-gi-di gowaa e-dahi.

32:9  Gei-ogo tuhongo dela ne-hilihili go Dimaadua la-go di hagadili ni Jacob.

32:10  “Mee ne-gidee digaula e-heehee-hua i-lodo di anggowaa, di gowaa lomo e-gonogono-ai di madangi maaloo. Mee gu-benebene hagahumalia digaula be dono huaidina donu.

32:11  Dimaadua gu-benebene a Israel gi-dee-doo, gadoo be-di ‘eagle’ e-aago ana dama gi-iloo di mamaangi, e-higahiga digaula i-hongo ono bakau.

32:12  Dimaadua hua modogoia ne-dagi ana daangada. Deai di god gee ne-hagamaamaa a-Mee ai.

32:13  “Mee guu-wanga gi digaula nnenua nnoonua gi-dagi-ina, gei digaula guu-gai nia meegai ala e-tomo i-golo. Digaula gu-gidee-ginaadou nia meegai maangala i-di gowaa haduhadu, nadau laagau-olib guu-tomo hagadubuagina i-lodo di gelegele haduhadu.

32:14  Nadau kau mo nadau kuudi guu-hai nadau milugu logowaahee. Nia siibi, nia kuudi mo nia kau digaula le e-kaedahi humalia. Nadau palaawaa mono waini e-koia e-kaedahi humalia gi-nonua.

32:15  “Nia daangada a God gu-maluagina, gei digaula gu-hai-baahi. Digaula guu-honu meegai, guu-hai nia daangada pedi, gei digaula gu-diiagi a God dela ne-hai ginaadou, ge guu-huli gi-daha mo di-nadau Hagamouli Aamua.

32:16  Nadau daumaha ang-gi nia balu-god guu-hai Dimaadua gi-dubua, nadau haihai huaidu guu-hai a-Mee gi-hagawelewele.

32:17  Digaula gu-tigidaumaha gi-nia balu-god, ala go nia god o nadau maadua-mmaadua e-de-iloo-ai, go nia god digau Israel digi hagalongo ginai i-mua.

32:18  Digaula gu-haga-de-langahia di-nadau God, di-nadau God Hagamouli Aamua, dela ne-wanga di mouli gi digaula.

32:19  “Di madagoaa Dimaadua ne-gidee-Ia di mee deenei, Mee gu-hagawelewele, guu-kili gi-daha ana dama-daane mo ana dama-ahina.

32:20  Mee ga-helekai, ‘Au hagalee hagamaamaa digaula, gii-mmada Au gi digaula be di-maa di-aha dela gaa-tale ang-gi digaula, ala e-manawa hamaaloo ge hagalee manawa-dahi.

32:21  Digaula guu-hai Au gi-dubua gi nadau balu-ieidu, guu-hai Au gi-hagawelewele gi nadau dadaumaha gi-nia balu-god, nia god ala hagalee nia god donu. Malaa, Au gaa-hai agu daangada donu gi-manawa-dubua mai i digau tuadimee balumee, gaa-hai agu daangada gi-hagawelewele mai i digau tuadimee de-kabemee.

32:22  Dogu hagawelewele ga-ulaula gadoo be-di ahi, gaa-dudu nia mee huogodoo i-hongo o henuailala. Dogu hagawelewele gaa-tugi i-di gowaa o digau mmade dela i-bahi-i-lala o henuailala, gaa-dudu hagatau nia hagamau o-nia gonduu.

32:23  “ ‘Au ga-haga-uda ang-gi digaula nia haingadaa llauehe gaa-hana-hua beelaa, gei Au ga-hai-hegau i agu amu-maalei huogodoo gi digaula.

32:24  Digaula ga-mmademmade i tau-magamaga mo-di magi welengina, ga-mmademmade i nadau magi huaidu huoloo. Gei Au ga-hagau agu manu lodo-geinga gi-heebagi gi digaula, ga-hagau agu gihaa poisin gi-gadigadia digaula.

32:25  Tauwa ga-haga-mmade nia daangada i-hongo nia ala. Nia guongo ga-huaidu ang-gi ginaadou i-di mmaadagu huoloo. Nia dama-daane mo nia dama-ahina ga-mmademmade. Nia dama mo digau mmaadua gaa-mmade labelaa.

32:26  Au bolo Au ga-hunahuna digaula hagatau la-gi-daha, gi-deemee dahi dangada e-langahia digaula.

32:27  Maa nei bolo Au gaa-hai beelaa, gei nadau hagadaumee gaa-bida hagaamu ginaadou, ga-hagahuaidu Au boloo, “Ma go gimaadou hua ala ne-haga- magedaa digaula, hagalee go Dimaadua!” ’

32:28  “Israel la digau nadau hagabaubau ai, digaula hagalee-loo nadau kabemee ai.

32:29  Digaula e-de-iloo-loo be ginaadou ne-aha ala gu-magedaa. Digaula e-de-iloo-ginaadou be di-maa di-aha dela ne-hai.

32:30  Ma ne-aha tangada e-dahi i nadau hagadaumee e-mee di-haga-magedaa ana daangada e-mana? Ma ne-aha nia daangada dogolua e-mee di-haga- magedaa nau daangada e-madangaholu-mana? Idimaa, Dimaadua go di-nadau God la-gu-diiagi digaula. Di-nadau God Aamua guu-kili digaula gi-daha.

32:31  Nadau hagadaumee e-iloo-ginaadou bolo nadau god donu le e-paagege-hua, hagalee maaloo be-di God o digau Israel.

32:32  Nadau hagadaumee e-huaidu gadoo be Sodom mo Gomorrah, e-huaidu gadoo be nia laagau-‘grape’ ala e-mmala mo poisin,

32:33  e-huaidu gadoo be nia waini ala ne-hai gi-nia poisin o-nia gihaa.

32:34  “Dimaadua e-langahia-e-Ia nia mee o nadau hagadaumee ne-hai, gei Mee e-tali-hua di madagoaa dela e-donu belee hagaduadua-ai digaula.

32:35  Dimaadua gaa-tala di hui, ga-hagaduadua digaula. Di madagoaa e-tinga-ai digaula la-gaa-dae-mai. Di laangi e-hagaduadua digaula la-gu-hoohoo-mai.

32:36  Di madagoaa Dimaadua ma-ga-gidee-Ia ana daangada bolo digaula la-gu-paagege, gei Mee ga-haga-dagaloaha digaula. Mee ga-dumaalia gi digau ala e-hai dono manawa, i dono madagoaa ma-ga-gidee-Ia bolo digaula la-deai nadau hagamaamaa ai.

32:37  Gei Dimaadua ga-heeu gi ana daangada boloo, ‘Aahee nia god maaloo ala nogo hagadagadagagee ginai goodou?

32:38  Goodou gu-haangai digaula gi-nia kiliidi o godou tigidaumaha, gei goodou guu-wanga gi digaula nia waini gi-inumia. Heia digaula gi-lloomoi gi goodou dolomeenei gi-hagamaamaa-ina goodou! Heia digaula gi-daawa-ina goodou gi-daha mo godou haingadaa!

32:39  “ ‘Ko-Au hua modogoau dela go God. E-deai dahi God i-daha mo Au ai! Au e-haga-made, gei Au e-haga-mouli, au e-haga-lauwa, gei Au e-hagahili. E-deai dahi dangada e-mee di-hai-baahi gi agu mee ala e-hai ai.

32:40  Go di-maa Au dela go-di God Mouli, deenei-laa Au e-dahi-aga dogu lima e-hai dagu hagababa hagamodudahi

32:41  bolo Au ga-akaa dagu hulumanu-dauwa dabadaba, gei Au gaa-hai di tonu la-gii-gila. Au gaa-tala di hui ang-gi ogu hagadaumee, gei Au ga-hagaduadua digau ala e-de-hiihai-mai gi-di-au.

32:42  Agu amu-maalei la-ga-haga-hali nadau dodo, gei dagu hulumanu-dauwa ga-daaligi gii-mmade digau huogodoo ala e-hai-baahi mai gi-di-Au. Au hagalee haga-mouli dahi dangada i digau ala e-heebagi-mai gi-di-Au. Digau ala gu-lauwa mo nia daangada galabudi hogi la-gaa-mmade huogodoo.’

32:43  “Nia henua ala i-golo, goodou gi-hagaamuina nia daangada Dimaadua. Mee e-hagaduadua digau huogodoo ala e-daaligi digaula. Mee e-tala di hui ang-gi ono hagadaumee, gei Mee e-dumaalia gi-nia hala o ana daangada.”

32:44  Moses mo Joshua dela go tama a Nun, meemaa e-huwahuwa taahili deenei, bolo gii-mee-ai nia daangada Israel gi-longono-ginaadou.

32:45  Di madagoaa a Moses guu-lawa dana agoago gi-nia daangada nia helekai a God,

32:46  gei mee ga-helekai, “Goodou e-hai-loo gi-daudali agu helekai ala ne-gowadu gi goodou dangi-nei. Tataanga-ina nia maa gi godou dama, gii-mee-ai digaula di-daudali nia agoago huogodoo a God mo-di manawa-dahi.

32:47  Nia agoago aanei la-hagalee nia balu-helekai hua. Nia agoago aanei la-go di-godou mouli donu. Hagalongo gi-nia maa, gei goodou ga-mouli waalooloo i-lodo tenua dela i-baahi i-golo o Jordan dela bolo ga-hai-henua ginai goodou.”

32:48  Go-di laangi la-hua, Dimaadua ga-helekai gi Moses,

32:49  “Hana gi-nia Gonduu Abarim ala i-lodo tenua go Moab dela i-di baahi gi-golo o-di waahale go Jericho, gaga gi tomo di Gonduu Nebo, gei goe ga-gidee tenua go Canaan, deelaa tenua gaa-wanga ko-Au gi-nia daangada Israel.

32:50  Gei goe gaa-made i-hongo di gonduu deelaa, gadoo be do duaahina go Aaron dela ne-made i-hongo di Gonduu Hor,

32:51  idimaa, goolua gu-hagalee manawa-dahi mai gi-di-Au i-mua nia daangada Israel. Di madagoaa goolua nogo i-baahi nia wai o Meribah, e-hoohoo gi-di waahale go Kadesh i-lodo di Anggowaa o Zin, goolua gu-haga-balumee Au i-mua nia daangada.

32:52  Goe ga-gidee haga-mogowaa tenua deelaa, gei goe hagalee e-ulu gi-lodo tenua dela e-wanga ko-Au gi-nia daangada Israel.”