CSlElizabeth - Deuteronomy - 27

27:1  И заповеда Моисей и старейшины сынов Израилевых, глаголя: сохраните вся заповеди сия, елики аз заповедаю вам днесь.

27:2  И будет в оньже день прейдете Иордан на землю, юже Господь Бог твой дает тебе во жребий, и поставиши себе камение велико и обелиши я мелом,

27:3  и напишеши на каменех тех вся словеса закона сего, егда прейдете Иордан, егда внидете в землю, юже Господь Бог твой дает тебе, землю кипящую медом и млеком, якоже рече Господь Бог отец твоих тебе.

27:4  И будет егда прейдете Иордан, да поставите камение сие, яже аз повелеваю вам днесь, в горе Гевал, и побелиши их мелом:

27:5  и да созиждеши тамо олтарь Господеви Богу твоему, олтарь от камения: да не возложиши на них железа:

27:6  камением всецелым да созиждеши олтарь Господеви Богу твоему и вознесеши на нем всесожжения Господеви Богу твоему,

27:7  и пожреши жертву спасения: и яси, и насытишися тамо, и возвеселишися пред Господем Богом твоим,

27:8  и напишеши на камениих сих весь закон сей яве зело.

27:9  И глагола Моисей и жерцы левити всему Израилю, глаголюще: молчи и слыши, Израилю, в день сей стался еси в люди Господеви Богу твоему:

27:10  и да послушаеши гласа Господа Бога твоего, и да сотвориши вся заповеди Его и оправдания Его, яже аз заповедаю тебе днесь.

27:11  И заповеда Моисей людем в той день, глаголя:

27:12  сии да станут благословляти люди на горе Гаризин, прешедше Иордан: Симеон, Левий, Иуда, Иссахар, Иосиф и Вениамин:

27:13  и сии да станут на клятву на горе Гевал: Рувим, Гад и Асир, Завулон, Дан и Неффалим.

27:14  И отвещавше рекут левити всему Израилю гласом великим:

27:15  проклят человек, иже сотворит изваяние и слияние, мерзость Господеви, дело рук художника, и положит е в сокровении. И отвещавше вси людие рекут: буди.

27:16  Проклят безчестяй отца своего или матерь свою. И рекут вси людие: буди.

27:17  Проклят прелагаяй пределы ближняго своего. И рекут вси людие буди.

27:18  Проклят прельщаяй слепаго в пути. И рекут вси людие: буди.

27:19  Проклят, иже уклонит суд пришелцу и сироте и вдове. И рекут вси людие: буди.

27:20  Проклят лежай с женою отца своего, яко открыл есть покровение отца своего. И рекут вси людие: буди.

27:21  Проклят лежай со всяким скотом. И рекут вси людие: буди.

27:22  Проклят лежай с сестрою своею, дщерию отца своего или дщерию матере своея и рекут вси людие: буди.

27:23  Проклят лежай с тещею своею. И рекут вси людие: буди. Проклят лежай с сестрою жены своея. И рекут вси людие: буди.

27:24  Проклят бияй ближняго с лестию. И рекут вси людие: буди.

27:25  Проклят, иже возмет дары поразити душу крове неповинныя. И рекут вси людие: буди.

27:26  Проклят всяк человек, иже не пребудет во всех словесех закона сего, еже творити я. И рекут вси людие: буди.