SPVar - Deuteronomy - 27

27:1  ויצו משה וזקני ישראל את העם לאמר שמרו את כל המצוה אשר אנכי מצוה אתכם היום

27:2  והיה ביום אשר תעברו את הירדן אל הארץ אשר יהוה אלהיך נתן לך והקמת לך אבנים גדלות ושדת אתם בשיד

27:3  וכתבת עליהן את כל דברי התורה הזאת בעברך למען אשר תבוא אל הארץ אשר יהוה אלהיך נתן לך ארץ זבת חלב ודבש כאשר דבר יהוה אלהי אבתיך לך

27:4  והיה בעברכם את הירדן תקימו את האבנים האלה אשר אנכי מצוה אתכם היום בהר גריזים ושדת אתם בשיד

27:5  ובנית שם מזבח ליהוה אלהיך מזבח אבנים לא תניף עליהם ברזל

27:6  אבנים שלמות תבנה את מזבח יהוה אלהיך והעלית עליו עלות ליהוה אלהיך

27:7  וזבחת שלמים ואכלת שם ושמחת לפני יהוה אלהיך

27:8  וכתבת על האבנים את כל דברי התורה הזאת באר הייטב

27:9  וידבר משה והכהנים הלוים אל כל ישראל לאמר הסכת ושמע ישראל היום הזה נהית לעם קדש ליהוה אלהיך

27:10  ושמעת בקול יהוה אלהיך ועשית את מצותיו ואת חקתיו אשר אנכי מצוך היום

27:11  ויצו משה את העם ביום ההוא לאמר

27:12  אלה יעמדו לברך את העם על הר גריזים בעברכם את הירדן שמעון ולוי יהודה ויששכר יוסף ובנימים

27:13  ואלה יעמדו על הקללה בהר עיבל ראובן גד ואשר זבולן דן ונפתלי

27:14  וענו הלוים ואמרו אל כל איש ישראל קול רם

27:15  ארור האיש אשר יעשה פסל ומסכה תועבת יהוה מעשה ידי חרש ושם בסתר וענו כל העם ואמרו אמן

27:16  ארור מקלה אביו ואמו ואמרו כל העם אמן

27:17  ארור מסיג גבול רעהו ואמרו כל העם אמן

27:18  ארור משגה עור בדרך ואמרו כל העם אמן

27:19  ארור מטה משפט גר יתום ואלמנה ואמרו כל העם אמן

27:20  ארור שכב עם אשת אביו כי גלה כנף אביו ואמרו כל העם אמן

27:21  ארור שכב עם כל בהמה ואמרו כל העם אמן

27:22  ארור שכב עם אחתו בת אביו או בת אמו ואמרו כל העם אמן

27:23  ארור שכב עם חתנתו ואמרו כל העם אמן

27:24  ארור מכה רעהו בסתר ואמרו כל העם אמן

27:25  ארור לקח שחד להכות נפש דם נקיא ואמרו כל העם אמן

27:26  ארור אשר לא יקים את כל דברי התורה הזאת לעשותם ואמרו כל העם אמן