Kapingamarangi - Deuteronomy - 7

7:1  “Dimaadua di-godou God gaa-dagi goodou gi-hai-mee gi tenua dela ga-hoohoo ga-ulu ginai goodou no-lodo, gei Mee ga-hagabagi gi-daha nia madawaawa e-logo i godou mua, aanei la nia madawaawa Hittite, Girgashite, Amor, Canaan, Perizzite, Hivite mo Jebus. Nia madawaawa e-hidu aanei koia e-maaloo i goodou.

7:2  Di madagoaa Dimaadua di-godou God dela ga-dugu-adu digaula gi-lala godou mogobuna, gei goodou ga-haga-magedaa digaula, goodou gi-daaligidia digaula gi-hagalee, gei goodou gi-hudee hai hagababa gi digaula be e-dumaalia gi digaula.

7:3  Goodou gi-hudee wanga-ina godou dama-ahina e-lodo gi-nia dama-daane digaula, be e-laha-mai nia dama-ahina digaula e-lodo ginai godou dama-daane.

7:4  Idimaa, digaula ga-halahalau godou dama-daane gii-huli gi-daha mo Dimaadua gi-daumaha gi-nia balu-ieidu, ga-hidi-mai-ai gei Dimaadua ga-hagawelewele adu gi goodou, ga-daaligi goodou.

7:5  Deenei-laa: Oho-ina nia gowaa dudu-tigidaumaha digaula, haga-hingahinga-ina gi-lala nia duludulu-dabu digaula, hele-ina gi-lala nadau ada o-di god-ahina go Asherah, duungia nia ada-balu-ieidu digaula.

7:6  Heia nia mee aanei, idimaa Dimaadua di-godou God gu-hai-mee gi goodou, gei goodou guu-hai digau guu-dabu, digau ni Mee ne-hilihili-mai i-lodo nia henua huogodoo o henuailala.

7:7  “Dimaadua ne-aloho i goodou ge ne-hilihili-aga goodou, hagalee ne-hilihili idimaa goodou ala e-dogologo i-nia henua ala i-golo, deeai, goodou la tenua hua-dulii.

7:8  Gei Dimaadua ne-hilihili goodou, idimaa, Mee e-aloho i goodou, gei e-dadaahi-hua beelaa dana hagababa dela ne-hai gi godou damana-mmaadua. Gei dela hogi di mee a Mee ne-daa-mai goodou gi ono mogobuna aamua, gei Mee ne-haga-dagaloaha-mai goodou gi-daha mo godou hai-hege i-lala nia mogobuna o-di king o Egypt.

7:9  Goodou la-gi-langahia bolo Dimaadua di-godou God la deelaa hua go Mee di God. Mee e-manawa-dahi ge dadaahi-hua beelaa dana hagababa mo dono aloho dee-odi, ang-gi nia madahaanau e-mana ala e-aloho i Mee mo-di haga-gila-aga ana haganoho.

7:10  Gei Mee hagalee madugidugia di-daaligi digau ala e-de-hiihai ang-gi de-Ia.

7:11  Goodou la-gii-pula i goodou i-di godou haga-gila-aga nnagadilinga haganoho huogodoo aanei ala ne-agoago adu gi goodou dangi-nei.

7:12  “Goodou ma-ga-hagalongo gi-humalia mo-di daudali nia haganoho aanei, Dimaadua di-godou God le e-dadaahi-hua beelaa dana hagababa mo dono aloho i goodou, be dana hagamodu dela ne-hai ang-gi godou damana-mmaadua.

7:13  Mee ga-aloho i goodou mo-di haga-dogologo goodou. Mee ga-haga-maluagina goodou, gaa-hai goodou gi-dogologowaahee gaa-hai godou dama gii-logo, gaa-hai nia laagau gii-huwa logo: ala go nia ‘wheat’ mono waini mono lolo-olib. Godou damaa-kau mo godou dama-siibi gaa-logo. Mee ga-gowadu gi goodou nia haga-maluagina huogodoo aanei i tenua dela ne-hagababa go Mee gi godou damana-mmaadua bolo e-gowadu gi goodou.

7:14  Goodou koia ga-maluagina i-nia henua ala i-golo huogodoo. Deai dahi daane be ahina i goodou ga-hagalee huwa ai, mo godou manu-daane mo ahina hogi deai dahi manu hagalee huwa ai.

7:15  Dimaadua ga-daa gi-daha mo goodou nia magi huogodoo, Mee hagalee gowadu gi goodou nia hagadilinga magi huaidu ala nogo hagaduadua goodou i Egypt, nia magi aanei gaa-wanga go Mee gi godou hagadaumee.

7:16  Goodou la-gi-daaligidia gi-daha nnenua huogodoo ala ga-dugu-adu go Dimaadua di-godou God gi-lala godou mogobuna. Goodou hudee dumaalia gi digaula be e-daumaha gi-nia balu-ieidu digaula, idimaa, goodou ma-ga-daumaha gi-nia balu-ieidu digaula, gei goodou gaa-mmade.

7:17  “Holongo goodou ga-hagabaubau boloo, ‘Nia henua digaula koia e-dogologowaahee i gidaadou, ge dehee tadau hai e-hagabagi digaula gi-daha mo kinei?’

7:18  Goodou hudee mmaadagu i digaula, goodou gi-langahia di mee Dimaadua di-godou God dela ne-hai gi-di king o Egypt mo digau Egypt huogodoo.

7:19  Goodou gi-langahia di hagaduadua damana dela guu-mmada ginai godou golomada, nia hagadilinga mogobuna haga-goboina, mo nia mogobuna mo nia mahi aamua o Dimaadua di-godou God ala ne-hai, nogo laha-mai goodou gi-daha mo Egypt. Go nia mogobuna hua aanei ala gaa-hai go Dimaadua di-godou God ang-gi nia daangada ala e-mmaadagu-ai goodou dolomeenei.

7:20  Dimaadua di-godou God ga-hagau-mai gi digaula di lamu-kadi-dangada mmae e-daaligi digau ala ma-gaa-dubu i-golo ala ne-pala hagammuni.

7:21  Malaa, goodou hudee mmaadagu i digaula, idimaa Dimaadua di-godou God le e-madalia goodou, Mee di God aamua gei go Mee hua dela belee mmaadagu-iei goodou.

7:22  Dimaadua di-godou God ga-haga-madammaa gi-daha nia madawaawa ala i godou mua. Goodou ga-deemee di-daaligi digaula i tolongo hua e-dahi, ma-gaa-hai beenei gei nia manu lodo-geinga ga-logowaahee i-lodo tenua, ga-hagalliga-adu gi goodou.

7:23  Dimaadua ga-dugu-adu digaula gi-lala godou mogobuna, ga-hagahinihini digaula gei goodou ga-dadaaligi digaula gii-odi.

7:24  Nia king digaula ga-dugu-adu labelaa go Mee gi-lala godou mogobuna, gei goodou ga-daaligi digaula ge nia ingoo digaula ga-de-langahia i-nia madagoaa huogodoo i henuailala. Deai tangada e-mee di-hai-baahi adu gi goodou ai. Goodou ga-daaligi digaula huogodoo gi-daha.

7:25  Goodou gi-duungia nia ada-balu-ieidu digaula, goodou hudee hagagailaa gi-nia goolo mo nia silber ala i-di gili nia ada aalaa. Goodou hudee kae-ina nia maa. Maa goodou gaa-hai beelaa, gei goodou ga-huaidu adu gi goodou, idimaa, Dimaadua di-godou God e-de-hiihai gi-nia ada balu-god.

7:26  Gei goodou gi-hudee gaamai nia ada balu-ieidu gi-lodo godou hale. Goodou gaa-hai beelaa, gei di halauwa dela i-baahi digaula ga-tale-adu gi goodou. Hudee hiihai gi-nia mee aanei, kilia gi-daha, idimaa nia mee aanei la-gu-haga-halauwa go Dimaadua.