SPVar - Exodus - 38

38:1  ויעש את מזבח העלה עצי שטים חמש אמות ארך וחמש אמות רחב ושלש אמות קומתו

38:2  ויעש קרנתיו על ארבע פנתיו ממנו היו קרנתיו ויצף אתו נחשת

38:3  ויעש את כל כלי המזבח את הסירות ואת היעים ואת המזרקות ואת המזלגות ואת המחתות כל כליו עשה נחשת

38:4  ויעש למזבח מכבר מעשה רשת נחשת תחת כרכבו מלמטה עד חציו

38:5  ויצק ארבע טבעות בארבע הקצות למכבר הנחשת בתים לבדים

38:6  ויעש את הבדים עצי שטים ויצף אתם נחשת

38:7  ויבא את הבדים בטבעות על צלעות המזבח לשאת אתו בהם נבוב לוחת עשה אתו

38:8  ויעש את הכיור נחשת ואת כנו נחשת במראת הצבאת אשר צבאו פתח אהל מועד

38:9  ויעש את החצר לפאת נגבה תימנה קלעי החצר שש משזר מאה באמה

38:10  עמודיהם עשרים ואדניהם עשרים ווי העמודים וחשקיהם כסף

38:11  ולפאת צפונה מאה באמה עמודיהם עשרים ואדניהם עשרים נחשת ווי העמודים וחשקיהם כסף

38:12  ולפאת ימה קלעים חמשים אמה עמודיהם עשרה ואדניהם עשרה ווי העמודים וחשקיהם כסף

38:13  ולפאת קדמה מזרחה חמשים אמה

38:14  קלעים חמש עשרה אמה אל הכתף עמודיהם שלשה ואדניהם שלשה

38:15  ולכתף השנית מזה ומזה לשער החצר קלעים חמש עשרה אמה עמודיהם שלשה ואדניהם שלשה

38:16  כל קלעי החצר סביב שש משזר

38:17  והאדנים לעמודים נחשת וויהם כסף וצפוי ראשיהם כסף והם מחשקים כסף לכל עמודי החצר

38:18  ומסך שער החצר מעשה רקם תכלת וארגמן ותולעת שני ושש משזר ועשרים אמה ארך וקומה ברחב חמש אמות לעמת קלעי החצר

38:19  ועמודיהם ארבעה ואדניהם ארבעה נחשת וויהם כסף וצפוי ראשיהם וחשקיהם כסף

38:20  וכל יתדות למשכן ולחצר סביב נחשת

38:21  אלה פקדי המשכן משכן העדות אשר פקד על פי משה עבדת הלוים ביד איתמר בן אהרן הכהן

38:22  ובצלאל בן אורי בן חור למטה יהודה עשה את כל אשר צוה יהוה את משה

38:23  ואתו אהליאב בן אחיסמך למטה דן חרש וחשב ורקם בתכלת ובארגמן ובתולעת השני ובשש

38:24  כל זהב העשוי למלאכה בכל מלאכת הקדש ויהי זהב התנופה תשע ועשרים ככר ושבע מאות ושלשים שקל בשקל הקדש

38:25  וכסף פקדי העדה מאת ככר ואלף ושבע מאות חמשה ושבעים שקל

38:26  בקע לגלגלת מחצית השקל בשקל הקדש לכל העבר על הפקדים מבן עשרים שנה ומעלה לשש מאות אלף ושלשת אלפים וחמש מאות וחמשים

38:27  ויהי מאת ככר הכסף לצקת את אדני הקדש ואת אדני הפרכת מאת האדנים למאת הככר ככר לאדן

38:28  ואת האלף ושבע המאות חמשה ושבעים עשה ווים לעמודים וצפה ראשיהם וחשק אתם

38:29  ונחשת התנופה שבעים ככר ואלפים וארבע מאות שקל

38:30  ויעש בה את אדני פתח אהל מועד ואת מזבח הנחשת ואת מכבר הנחשת אשר למזבח ואת כל כלי המזבח

38:31  ואת אדני החצר סביב ואת אדני שער החצר ואת כל יתדות המשכן ואת כל יתדות החצר סביב