TpiKJPB - I Samuel - 15

15:1  ¶ Samyuel tu i tokim Sol, BIKPELA i salim mi long makim yu long stap king long bosim ol lain bilong Em, long bosim Isrel. Olsem na nau yu harim nek bilong ol toktok bilong BIKPELA.

15:2  BIKPELA bilong ol ami i tok olsem, Mi tingim gen dispela samting Amalek i mekim long Isrel, long em i wet hait long em long rot olsem wanem, taim em i kam ausait long Isip.

15:3  Nau go na paitim Amalek, na bagarapim olgeta olgeta samting ol i gat, na no ken soim sori long ol. Tasol kilim i dai man na meri, liklik pikinini na susu pikinini, bulmakau man na sipsip, kemel na donki wantaim.

15:4  Na Sol i bungim ol lain wantaim, na kaunim ol long Telaim, 200,000 soldia bilong wokabaut, na 10,000 man bilong Juda.

15:5  Na Sol i kam long wanpela biktaun bilong Amalek, na wet hait long ples daun.

15:6  Na Sol i tokim ol lain Ken, Go, lusim dispela hap, yupela go daun na lusim ol lain Amalek, nogut mi bagarapim yupela olgeta wantaim ol. Long wanem, yupela bin soim gutpela pasin long olgeta pikinini bilong Isrel, taim ol i kam ausait long Isip. Olsem na ol lain Ken i lusim ol lain Amalek.

15:7  Na Sol i paitim ol lain Amalek i stat long Havila i go inap long yu kamap long Sur, dispela i pas klostu long Isip.

15:8  Na em i kisim Egak, king bilong ol lain Amalek, i stap laip yet, na bagarapim olgeta olgeta lain manmeri wantaim sap bilong bainat

15:9  Tasol Sol na ol lain i soim sori long Egak, na ol nambawan bilong ol sipsip, na bilong ol bulmakau man, na bilong ol yangpela abus i patpela, na ol pikinini sipsip, na olgeta samting i gutpela, na ol i no gat laik long bagarapim ol olgeta. Tasol olgeta wan wan samting i nogut tru na i pipia, dispela ol i bagarapim olgeta.

15:10  ¶ Nau tok bilong BIKPELA i kam long Samyuel, i spik,

15:11  Em i tanim bel long Mi long Mi bin putim Sol long stap king. Long wanem, em i tanim i go bek i lusim pasin bilong bihainim Mi, na em i no bin mekim ol tok strong bilong Mi. Na dispela i givim bel sori long Samyuel. Na em i krai long BIKPELA olgeta hap bilong nait.

15:12  Na taim Samyuel i kirap long moning tru long bungim Sol, ol i tokim Samyuel, i spik, Sol i kam long Karmel, na, lukim, em i sanapim wanpela ples bilong em, na em i go nabaut, na go hapsait, na go daun long Gilgal.

15:13  Na Samyuel i kam long Sol. Na Sol i tokim em, Blesing i stap long yu long BIKPELA. Mi bin inapim tok strong bilong BIKPELA.

15:14  Na Samyuel i tok, Wanem mining nau long dispela krai bilong sipsip long tupela ia bilong mi, na krai strong bilong ol dispela bulmakau man mi harim?

15:15  Na Sol i tok, Ol i bin bringim ol i kam long hap bilong ol lain Amalek. Long wanem, ol lain i holim bek ol nambawan bilong ol sipsip na bilong ol bulmakau man, long sakrifais i go long BIKPELA, God bilong yu. Na olgeta arapela mipela bin bagarapim olgeta.

15:16  Nau Samyuel i tokim Sol, Stap yet, na mi bai tokim yu long wanem samting BIKPELA i bin tokim mi long dispela nait. Na em i tokim em, Yu tok.

15:17  Na Samyuel i tok, Taim yu stap liklik long ai bilong yu yet, ating i yes long God i makim yu het bilong ol lain bilong Isrel, na BIKPELA i makim yu king long bosim Isrel?

15:18  Na BIKPELA i salim yu long wanpela wokabaut, na tok, Go na bagarapim olgeta ol dispela sinman, dispela ol lain Amalek, na pait birua long ol inap long yu kaikai ol olgeta.

15:19  Olsem wanem na nau yu no bin bihainim nek bilong BIKPELA, tasol yu bin flai antap long ol kago bilong pait, na bin mekim nogut long ai bilong BIKPELA?

15:20  Na Sol i tokim Samyuel, Yes, mi bin bihainim nek bilong BIKPELA, na mi bin go long dispela rot BIKPELA i salim mi long en, na mi bin bringim Egak king bilong Amalek, na mi bin bagarapim olgeta ol lain Amalek.

15:21  Tasol ol manmeri i kisim ol kago bilong pait, ol sipsip na ol bulmakau man, nambawan bilong ol samting mipela i sapos long bagarapim olgeta, long sakrifais i go long BIKPELA, God bilong yu, long Gilgal.

15:22  Na Samyuel i tok, Ating BIKPELA i gat bikpela amamas moa long ol ofa i kuk olgeta na ol sakrifais, long Em i amamas long man i bihainim nek bilong BIKPELA? Lukim, pasin bilong bihainim tok i winim sakrifais, na pasin bilong harim tok i winim gris bilong ol sipsip man.

15:23  Long wanem, bikhet pasin i wankain olsem sin bilong pasin poisin, na pasin bikhet i wankain olsem sin nogut na pasin bilong lotuim ol piksa god. Bikos yu bin tok nogat olgeta long tok bilong BIKPELA, Em i bin tok nogat olgeta long yu tu long yu i ken stap king.

15:24  ¶ Na Sol i tokim Samyuel, Mi bin mekim sin. Long wanem, mi bin kalapim lo bilong tok strong bilong BIKPELA, na ol toktok bilong yu. Bilong wanem, mi pretim ol manmeri, na mi bihainim nek bilong ol.

15:25  Olsem na nau, mi askim yu plis, lusim pe bilong sin bilong mi, na tanim gen wantaim mi, inap long mi ken lotuim BIKPELA.

15:26  Na Samyuel i tokim Sol, Mi bai i no inap tanim i go bek wantaim yu. Long wanem, yu bin tok nogat olgeta long tok bilong BIKPELA, na BIKPELA i bin tok nogat olgeta long yu long yu i ken stap king long bosim Isrel.

15:27  Na taim Samyuel i tanim nabaut long lusim em i go, em i holimpas arere bilong saket bilong em, na em i bruk.

15:28  Na Samyuel i tokim em, BIKPELA i bin brukim kingdom bilong Isrel i lusim yu tude, na Em i bin givim dispela long wanpela man i stap klostu long yu, husat i winim yu.

15:29  Na tu Strong bilong Isrel bai i no inap giaman o tanim bel. Long wanem, em i no man, inap long Em i mas tanim bel.

15:30  Nau em i tok, Mi bin mekim sin. Tasol givim biknem long mi nau, mi askim yu plis, long ai bilong ol lapun hetman bilong ol lain manmeri bilong mi, na long ai bilong Isrel, na tanim gen wantaim mi, inap long mi ken lotuim BIKPELA, God bilong yu.

15:31  Olsem na Samyuel i tanim gen i bihainim Sol. Na Sol i lotuim BIKPELA.

15:32  ¶ Nau Samyuel i tok, Yupela bringim hia long mi Egak, king bilong ol lain Amalek. Na Egak i kam long em isi isi. Na Egak i tok, Tru tumas, ating holim kros bilong i dai i go pinis, a?

15:33  Na Samyuel i tok, Olsem bainat bilong yu i bin mekim ol meri i no gat pikinini, olsem tasol bai mama bilong yu i no gat pikinini namel long ol meri. Na Samyuel i katkatim Egak long ol liklik hap hap long ai bilong BIKPELA long Gilgal.

15:34  Nau Samyuel i go long Rama. Na Sol i go antap long haus bilong em long Gibia bilong Sol.

15:35  Na Samyuel i no kam moa long lukim Sol inap long de em i dai pinis. Tasol Samyuel i soim sori long Sol. Na BIKPELA i tanim bel long Em i bin mekim Sol king long bosim Isrel.