TpiKJPB - John - 15

15:1  ¶ Mi stap diwai wain tru, na Papa bilong mi em i man bilong lukautim gaden.

15:2  Olgeta wan wan han bilong diwai insait long mi husat i no karim kaikai em i tekewe. Na olgeta wan wan han bilong diwai husat i karim kaikai, em i klinim dispela, inap long em i ken karim moa kaikai.

15:3  Nau yupela i stap klin long dispela tok mi bin toktok long yupela.

15:4  Stap insait long mi, na mi insait long yupela. Olsem han bilong diwai i no inap karim kaikai long em yet, sapos em i no stap insait long diwai wain, yupela tu i no inap, sapos yupela i no stap insait long mi.

15:5  Mi stap dispela diwai wain, yupela i stap ol han bilong diwai. Em husat i stap insait long mi, na mi insait long em, em yet i karim planti kaikai. Long wanem, ausait long mi yupela i no inap wokim wanpela samting.

15:6  Sapos wanpela man i no stap insait long mi, Papa bai tromoi em i go ausait olsem wanpela han bilong diwai, na em i drai. Na ol man i bungim ol, na tromoi ol i go insait long paia, na ol i kuk.

15:7  Sapos yupela i stap insait long mi, na ol toktok bilong mi i stap insait long yupela, yupela bai askim wanem samting yupela i laik, na em bai kamap long yupela.

15:8  Papa bilong mi i kisim glori insait long dispela, long yupela i karim planti kaikai. Olsem tasol yupela bai stap ol disaipel bilong mi.

15:9  ¶ Olsem Papa i bin laikim mi tru, olsem tasol mi bin laikim yupela tru. Yupela i mas stap yet insait long laikim tru bilong mi.

15:10  Sapos yupela i bihainim ol tok strong bilong mi, yupela bai stap insait long laikim tru bilong mi. Yes, olsem mi bin bihainim ol tok strong bilong Papa bilong mi, na stap yet insait long laikim tru bilong em.

15:11  Ol dispela samting mi bin toktok long yupela, inap long amamas tru bilong mi i ken stap yet insait long yupela, na long amamas tru bilong yupela i ken pulap.

15:12  Dispela em i tok strong bilong mi, Long yupela i gat laikim tru wanpela i go long narapela, olsem mi bin laikim yupela tru.

15:13  I no gat narapela laikim tru i winim dispela, long wanpela man i givim laip bilong em bilong helpim ol pren bilong em.

15:14  Yupela i stap ol pren bilong mi, sapos yupela i mekim wanem samting mi tok strong long yupela.

15:15  I stat long nau i go mi no kolim yupela ol wokboi. Long wanem, wokboi i no save long bikman bilong em i mekim wanem. Tasol mi bin kolim yupela ol pren. Long wanem, olgeta dispela samting mi bin harim long Papa bilong mi mi bin mekim yupela long save.

15:16  Yupela i no bin makim mi, tasol mi bin makim yupela, na makim yupela long wok, inap long yupela i ken go na karim kaikai, na long kaikai bilong yupela i ken stap yet. Inap long wanem samting yupela bai askim long Papa long nem bilong mi, em i ken givim dispela long yupela.

15:17  Ol dispela samting mi tok strong long yupela, inap long yupela i ken gat laikim tru wanpela i go long narapela.

15:18  ¶ Sapos dispela graun i hetim yupela, yupela i save long em i hetim mi bipo long em i hetim yupela.

15:19  Sapos yupela i bilong dispela graun, dispela graun bai laikim tru ol bilong em yet. Tasol bikos yupela i no bilong dispela graun, tasol mi bin makim yupela ausait long dispela graun, olsem na dispela graun i hetim yupela.

15:20  Tingim gen long dispela tok mi tokim yupela, Wokboi i no winim bikman bilong em. Sapos ol i bin givim hevi long mi, ol bai givim hevi long yupela tu. Sapos ol i bin bihainim tok bilong mi, ol bai bihainim tok bilong yupela tu.

15:21  Tasol olgeta dispela samting bai ol i mekim long yupela bilong tingim nem bilong mi, bilong wanem, ol i no save em husat i salim mi.

15:22  Sapos mi no bin kam na toktok long ol, ol i no bin gat sin. Tasol nau ol i no gat ausait saket bilong haitim sin bilong ol.

15:23  Em husat i hetim mi i hetim Papa bilong mi tu.

15:24  Sapos mi no bin mekim namel long ol ol dispela wok i no gat wanpela arapela man i mekim, ol i no bin gat sin. Tasol nau ol i bin lukim na ol i hetim mi na Papa bilong mi wantaim.

15:25  Tasol dispela i kamap olsem, inap long dispela tok ol i raitim long lo bilong ol i ken kamap pinis, Ol i hetim mi taim i no gat as bilong en.

15:26  ¶ Tasol taim Poroman i kam pinis, husat mi bai salim long yupela i kam long Papa, yes, Spirit bilong tok tru, husat i kam ausait long Papa, em bai tokaut klia long mi.

15:27  Na yupela tu bai stap witnes, bilong wanem, yupela i bin stap wantaim mi long stat i kam inap long nau.