TpiKJPB - John - 9

9:1  ¶ Na taim Jisas abrusim ol, em i lukim wanpela man husat i aipas i stat long taim mama i karim em.

9:2  Na ol disaipel bilong em i askim em, i spik, Tisa, husat i mekim sin, dispela man, o papamama bilong em, inap long mama i karim em aipas?

9:3  Jisas i bekim tok, Dispela man i no bin mekim sin, o papamama bilong em. Tasol em i aipas inap long ol wok bilong God i ken kamap ples klia insait long em.

9:4  Mi mas wokim ol wok bilong em husat i salim mi, taim em i san yet. Nait i kam, taim i no gat man i inap wok.

9:5  Taim mi stap yet long dispela graun, mi stap lait bilong dispela graun.

9:6  Taim em i bin toktok olsem, em i spet long graun, na wokim graun i wet long dispela spet, na em i makim tupela ai bilong aipas man wantaim dispela graun i wet,

9:7  Na tokim em, Go, waswas long liklik raunwara bilong Siloam, (ol i tanim dispela tok, Salim.) Olsem na em i go long rot bilong em, na waswas, na kam taim tupela ai bilong em i ken lukluk.

9:8  ¶ Olsem na ol man i stap klostu long em, na ol husat bipo i bin lukim em long em i aipas, i tok, Ating i yes long dispela em i em husat i sindaun na pulim mani?

9:9  Sampela i tok, Dispela em em. Ol arapela i tok, Em i olsem em. Tasol em i tok, Mi stap dispela man.

9:10  Olsem na ol i tokim em, Tupela ai bilong yu i op olsem wanem?

9:11  Em i bekim na tok, Wanpela man husat ol i kolim Jisas i wokim graun i wet, na makim tupela ai bilong mi, na tokim mi, Go long liklik raunwara bilong Siloam, na waswas. Na mi go na waswas, na mi kisim strong bilong lukluk.

9:12  Nau ol i tokim em, Em i stap we? Em i tok, Mi no save.

9:13  ¶ Ol i bringim long ol Farisi em husat long taim bipo em i aipas.

9:14  Na em i de sabat taim Jisas i wokim graun i wet, na opim tupela ai bilong em.

9:15  Nau gen ol Farisi tu i askim em long em i bin kisim strong bilong lukluk olsem wanem. Em i tokim ol, Em i putim graun i wet antap long tupela ai bilong mi, na mi waswas, na mi ken lukluk.

9:16  Olsem na sampela bilong ol Farisi i tok, Dispela man i no bilong God, bilong wanem, em i no bihainim de sabat. Ol arapela i tok, Olsem wanem wanpela man husat i sinman i ken wokim ol kain mirakel? Na i gat wanpela bruk namel long ol.

9:17  Ol i tokim aipas man gen, Yu tok wanem long em, long em i bin opim tupela ai bilong yu? Em i tok, Em i wanpela profet.

9:18  Tasol ol Ju i no bin bilip long sait bilong em, long em i bin aipas, na em i kisim strong bilong lukluk, inap long ol i singautim papamama bilong em husat i bin kisim strong bilong lukluk.

9:19  Na ol i askim tupela, i spik, Dispela em i pikinini man bilong yupela, husat yupela i tok em i aipas taim mama i karim em? Nau em i ken lukluk olsem wanem?

9:20  Papamama bilong em i bekim ol na tok, Mipela i save long dispela em i pikinini man bilong mipela, na long em i aipas taim mama i karim em.

9:21  Tasol long wanem rot em i ken lukluk nau, mipela i no save. O husat i bin opim tupela ai bilong em, mipela i no save. Em i bikpela pinis, askim em. Em bai toktok long sait bilong em yet.

9:22  Ol dispela toktok papamama bilong em i tok, bilong wanem, ol i pret long ol Ju. Long wanem, ol Ju i bin gat wanbel tingting pinis, long sapos wanpela man i bin tok yes long em i Kraist, ol bai rausim em long sinagog.

9:23  Olsem na papamama bilong em i tok, Em i bikpela pinis, askim em.

9:24  Nau gen ol i singautim dispela man husat i aipas bipo, na tokim em, Givim biknem long God. Mipela i save long dispela man em i wanpela sinman.

9:25  Em i bekim na tok, Sapos em i stap wanpela sinman o nogat, mi no save. Wanpela samting mi save, long, we mi stap aipas olsem bipo, nau mi ken lukluk.

9:26  Nau ol i tokim em gen, Em i mekim wanem long yu? Em i opim tupela ai bilong yu olsem wanem?

9:27  Em i bekim tok long ol, Mi bin tokim yupela pinis, na yupela i no harim. Olsem wanem na yupela i gat laik long harim dispela gen? Yupela tu bai stap ol disaipel bilong em?

9:28  Nau ol i sutim tok nogut long em, na tok, Yu stap disaipel bilong em. Tasol mipela i stap ol disaipel bilong Moses.

9:29  Mipela i save long God i toktok long Moses. Long sait bilong dispela man, mipela i no save long em i kam long we.

9:30  Man i bekim na tokim ol, Insait long dispela em i wanpela samting bilong tingting planti long en, long yupela i no save long em i kam long we, na yet em i bin opim tupela ai bilong mi.

9:31  Nau yumi save long God i no harim ol sinman. Tasol sapos wanpela man i stap man bilong lotuim God, na mekim laik bilong em, em i harim em.

9:32  I stat long taim dispela graun i stat i no gat wanpela taim long yumi harim long wanpela man i opim tupela ai bilong wanpela husat i aipas taim mama i karim em.

9:33  Sapos dispela man i no bilong God, em i no inap mekim wanpela samting.

9:34  Ol i bekim na tokim em, Mama i karim yu long ol sin olgeta, na ating yu laik skulim mipela, a? Na ol i rausim em i go ausait.

9:35  ¶ Jisas i harim long ol i bin rausim em i go ausait. Na taim em i bin painim em pinis, em i tokim em, Yu bilip long Pikinini Man bilong God?

9:36  Em i bekim na tok, em i husat, Bikpela, inap long mi ken bilip long em?

9:37  Na Jisas i tokim em, Yu bin lukim em pinis, na em i dispela husat i toktok wantaim yu wantaim.

9:38  Na em i tok, Bikpela, mi bilip. Na em i lotuim em.

9:39  ¶ Na Jisas i tok, Mi kam long dispela graun bilong wokim kot, inap long ol husat i no inap lukluk i ken lukluk. Na long ol husat i lukluk i ken kamap aipas.

9:40  Na sampela bilong ol Farisi husat i stap wantaim em i harim ol dispela toktok, na ol i tokim em, Ating mipela tu i aipas?

9:41  Jisas i tokim ol, Sapos yupela i aipas, bai yupela i no gat sin. Tasol nau yupela i tok, Mipela i lukluk. Olsem na sin bilong yupela i stap yet.