Kapingamarangi - Numbers - 6

6:1  Dimaadua ga-helekai gi Moses

6:2  bolo gi-hagi-anga-ina nnelekai aanei gi digau Israel: Tei goodou, taane be-di ahina, ma-ga-hagamodu bolo ia e-hai di nasarait mo-di haga-dabu ia gi Dimaadua,

6:3  la-hagalee inu nia waini mono wai haga-libaliba ala i-golo, ge hagalee inu nia mee ne-hai-mai i-nia huwa laagau waini, be e-gai nnagadilinga huwa laagau waini.

6:4  Di waalooloo dono hai tangada nasarait, geia hagalee gai di-ingoo-hua di mee dela ne-hai-mai i-di laagau waini, be go ono golee be ono gili.

6:5  Di waalooloo dono noho i-lala di hagamodu nasarait, geia hagalee dahi dono libogo mo dono ngudu. Mee gi-daudalia dana hagamodu ang-gi di waalooloo o-di madagoaa o dono haga-dabu ang-gi Dimaadua, gei mee e-dugu nia ngaahulu dono libogo la-gii-tomo gii-lloo.

6:6  Ono ngaahulu la-go di ada o-di haga-dabu ang-gi God, malaa, mee hudee haga-milimilia-ina ia ma-gaa-hana gi-hoohoo gi tangada made, eimaha hogi ma go dono damana, dono dinana, tuaahina-daane be ahina.

6:7  Ono ngaahulu la-go di ada o-di haga-dabu ang-gi God, malaa, mee hudee haga-milimilia-ina ia ma-gaa-hana gi-hoohoo gi tangada made, eimaha hogi ma go dono damana, dono dinana, tuaahina-daane be ahina.

6:8  Di waalooloo dono hai di nasarait, mee gu-haga-dabu ang-gi Dimaadua.

6:9  Maa ono ngaahulu ala gu-haga-dabu la-ga-milimilia i dono noho i-baahi tangada dela ne-made hagalimalima, mee e-hai gii-tali nia laangi e-hidu, gaa-dahi laa dono libogo gei mee ga-madammaa ang-gi di hai-daumaha.

6:10  Di walu laangi mee gi-gaamai gi tangada hai-mee-dabu i-di bontai o-di Hale-laa Dimaadua, ana mwuroi e-lua be e-lua ana manu ‘pigeon’.

6:11  Tangada hai-mee-dabu gaa-wanga di manu e-dahi e-hai-ai tigidaumaha wwede nia huaidu, ge dahi manu e-hai-ai tigidaumaha e-dudu, e-hai-ai di haga-madammaa o dono bili gi tangada made. Di laangi la-hua, gei mee ga-hagadabu labelaa ono ngaahulu,

6:12  ga-hagadabu-anga labelaa gi Dimaadua dono madagoaa dela e-hai di nasarait. Dono madagoaa no-mua gu-hagalee dau, idimaa ono ngaahulu ala ne-hagadabu la-gu-milimilia. Mee gi-gaamai dana dama-siibi e-dahi dono ngadau e-hai-ai tigidaumaha e-hui di hala deenei.

6:13  Mee ma-gaa-lawa di-hai dana hagamodu o dono nasarait, gei mee gaa-hai taumaha deenei: Mee e-hana gi-di bontai di Hale-laa Dimaadua,

6:14  gaa-wanga gi Dimaadua nia manu e-dolu ala e-madammaa: tama-siibi-daane e-dahi dono ngadau, e-hai-ai tigidaumaha dudu, tama-siibi-ahina e-dahi dono ngadau, e-hai-ai tigidaumaha wwede nia huaidu, mo-di siibi-daane e-hai-ai tigidaumaha o-di hagadaubuni.

6:15  Mee e-tigidaumaha labelaa dana gada palaawaa ono ‘yeast’ ai: nia palaawaa maadolu ne-unugi gi-nia lolo-olib, mo-di bagu lahilahi e-hunu gi-nia lolo-olib, mono golee laagau mono waini ala bolo e-dau e-hai tigidaumaha.

6:16  Tangada hai-mee-dabu e-wanga nia mee huogodoo gi Dimaadua, gaa-hai tigidaumaha wwede nia huaidu, mo tigidaumaha dudu.

6:17  Mee ga-tigidaumaha siibi-daane ang-gi Dimaadua, e-hai-ai tigidaumaha o-di hagadaubuni, e-wanga dalia di gada palaawaa, ngaadahi mo nia tigidaumaha i-nia golee laagau mono waini.

6:18  Tangada nasarait deelaa gaa-dahi dono libogo gaa-dudu nia ngaahulu dono libogo i-hongo di ahi o tigidaumaha o-di hagadaubuni dela e-gaa.

6:19  Di tua o siibi la-guu-dunu i-lodo nia wai, ge tangada hai-mee-dabu gaa-kae di-maa ga-hagapuni gi-di palaawaa maadolu e-dahi mo-di bagu lahilahi e-dahi mai i-lodo di gada, gaa-wanga gi-lodo nia lima o tangada nasarait.

6:20  Nomuli, tangada hai-mee-dabu e-wanga nia maa gi Dimaadua e-hai-ai di wanga-dehuia hoou. Nia mee aanei la nia tigidaumaha haga-madagu ang-gi tangada hai-mee-dabu, hagapuni ang-gi nia hadahada mo-di wae o siibi-daane ala nia mee ni tangada hai-mee-dabu mai taganoho. I-muli di mee deelaa, gei di nasarait gaa-mee di-inu nia waini.

6:21  Aanei nnaganoho adu gi goodou go nia nasarait. Maa goe gaa-hai bolo goe e-hai dau tigidaumaha gi-mada-damana gi-hongo tigidaumaha dela i-lodo di hagamodu di nasarait, gei goe le e-hai-loo dau tigidaumaha gii-tugi gii-hai be dau hagababa ne-hai.

6:22  Dimaadua ga-helekai gi Moses,

6:23  “Hagi-anga-ina gi Aaron mo ana dama-daane gi-heia talodalo haga-maluagina deenei i-di madagoaa ma-ga-dalodalo i digau Israel:

6:24  Dimaadua la-gi-haga-maluagina goodou mo-di madamada-humalia i goodou.

6:25  Dimaadua la-gi-haga-maalama-ina goodou gi ono hadumada, mo-di hila-adu gi goodou.

6:26  Dimaadua la-gi-haga-modongoohia-aga dono manawa dumaalia adu gi goodou, mo-di gowadu gi goodou di noho i-di aumaalia.”

6:27  Dimaadua ga-helekai labelaa, “Aaron mo ana dama-daane ma-ga-hagahumalia digau Israel e-hai-hegau gi dogu ingoo, gei Au ga-haga-maluagina digau Israel.”