Ndebele - Psalms - 102

102:1  Nkosi, zwana umkhuleko wami, lokukhala kwami kakuze kuwe.

102:2  Ungangifihleli ubuso bakho osukwini lohlupho lwami; beka indlebe yakho kimi; mhla ngibiza ungiphendule masinyane.

102:3  Ngoba insuku zami ziyanyamalala njengentuthu, lamathambo ami ayatsha njengeziko.

102:4  Inhliziyo yami itshayiwe, yabuna njengotshani, ngaze ngakhohlwa ukudla isinkwa sami.

102:5  Ngenxa yelizwi lokububula kwami amathambo ami anamathela esikhumbeni sami.

102:6  Ngifanana lewunkwe yenkangala, senginjengesikhova sezindawo ezidilikileyo.

102:7  Ngiyalinda, senginjengenyoni ehlezi yodwa ephahleni.

102:8  Izitha zami ziyangithuka usuku lonke; abangihlanyelayo bafunga ngami.

102:9  Ngoba ngidle umlotha njengesinkwa, ngixubanise okunathwayo kwami lezinyembezi,

102:10  ngenxa yentukuthelo yakho lolaka lwakho; ngoba ungiphakamisile, wasungilahla phansi.

102:11  Insuku zami zinjengesithunzi eselulekayo, njalo mina ngiyabuna njengotshani.

102:12  Kodwa wena, Nkosi, uzahlala kuze kube nininini, lesikhumbuzo sakho kusizukulwana lesizukulwana.

102:13  Wena uzavuka uhawukele iZiyoni; ngoba isikhathi sokuyitshengisa umusa, yebo, isikhathi esimisiweyo sesifikile.

102:14  Ngoba inceku zakho ziyawathanda amatshe ayo, zilesihawu ethulini lwayo.

102:15  Khona izizwe zizalesaba ibizo leNkosi, lamakhosi wonke omhlaba udumo lwayo.

102:16  Lapho iNkosi izayakha iZiyoni, izabonakala enkazimulweni yayo.

102:17  Izaphendukela emkhulekweni wongelalutho, kayiyikudelela umthandazo wabo.

102:18  Lokhu kuzabhalelwa isizukulwana esilandelayo, labantu abazadalwa bazadumisa iNkosi.

102:19  Ngoba yakhangela phansi isekuphakameni kwendawo yayo engcwele; iNkosi isemazulwini yakhangela emhlabeni,

102:20  ukuzwa ukububula kwesibotshwa, ukukhulula abamiselwa ukufa;

102:21  ukulandisa ibizo leNkosi eZiyoni, lendumiso yayo eJerusalema,

102:22  lapho izizwe zibuthana ndawonye, lemibuso, ukuyikhonza iNkosi.

102:23  Yathoba amandla ami endleleni, yafinyeza insuku zami.

102:24  Ngathi: Nkulunkulu wami, ungangisusi phakathi kwensuku zami, iminyaka yakho isesizukulwaneni lezizukulwana.

102:25  Endulo wawusekela umhlaba, lamazulu angumsebenzi wezandla zakho.

102:26  Lokho kuzabhubha, kodwa wena uzakuma. Kuzaguga-ke konke njengesembatho, njengesigqoko uzakuguqula, njalo kuzaguqulwa.

102:27  Kodwa wena unguwe njalo, leminyaka yakho kayipheli.

102:28  Abantwana benceku zakho bazahlala, lenzalo yazo izaqiniswa phambi kwakho.