LinVB - Exodus - 11

11:1  Yawe alobi na Mose : « Nakotindela Farao na ba Ezipeti naino etumbu yoko ; nsima yango akotika bino bokende, akobengana bino kutu.

11:2  Yango wana loba na ba-Israel ’te mobali moko moko asenge moninga mobali, mpe mwasi moko moko asenge moninga mwasi, biloko bya palata mpe bya wolo. »

11:3  Yawe asalisi ba-Israel mpo ’te ba-Ezipeti bandimela bango, mpo Mose azalaki moto wa lokumu o Ezipeti, o miso ma bato ba Farao mpe ma bato banso.

11:4  Mose alobi na Farao : « Yawe alobi : O kati ya butu nakoleka o Ezipeti.

11:5  Bana ba yambo ba Ezipeti banso bakokufa, banda mwana wa yambo wa Farao, oyo akokitana tata wa ye o ngwende, na mwana wa yambo wa mwasi moombo, oyo akonikaka fufu, tee bana ba yambo ba nyama.

11:6  O mokili mobimba mwa Ezipeti bakolela makasi, lokola eyokani naino te mpe lokola ekoyokana nsima lisusu te.

11:7  Kasi epai ya bana ba Israel ata mbwa ekogangela moto to nyama te ; bongo okoyeba ’te Yawe akosala na Israel mpe na Ezipeti ndenge yoko te.

11:8  O mokolo mona basaleli ba yo banso bakoya koluka ngai, bakokumbamela ngai mpe bakoloba : “Longwa, yo na bana ba yo, baye bakolanda yo !” Na nsima nakolongwa awa. » Mpe Mose atoki na nkanda, abimi o ndako ya Farao.

11:9  Yawe alobi na Mose : « Farao akondimela yo te, bongo nakosala lisusu makamwisi manene o mokili mwa Ezipeti. »

11:10  Mose na Arone basali makambo maye manso ma kokamwa o miso ma Farao ; kasi Yawe akomisi Farao motó makasi, oyo aapi kotika ba-Israel balongwa o mokili mwa ye.