Kapingamarangi - Exodus - 18

18:1  Jethro, tamana di lodo Moses, tangada hai-mee-dabu o Midian, gu-longono nia mee huogodoo Dimaadua ne-hai gi digau Israel mo Moses i dana dagi digaula gi-daha mo Egypt.

18:2  Mee ga-hanimoi gi Moses, ga-laha-mai a Zipporah di lodo Moses dela ne-dugu,

18:3  mo Gershom mo Eliezer, nia dama-daane dogolua a Zipporah. (Moses gu-helekai, “Au nogo hai tangada henua-gee i-hongo tenua digau tuadimee”, gei mee ga-hagaingoo dana dama-daane e-dahi bolo Gershom.

18:4  Mee gu-helekai labelaa, “Di God o dogu damana gu-hagamaamaa au gu-hagalee daaligi go di king Egypt”, gei mee gaa-gahi dana dama-daane dela i-golo bolo Eliezer.)

18:5  Jethro ga-hanimoi dalia di lodo Moses mo ana dama dogolua gi-hongo di anggowaa, di gowaa nogo noho-ai Moses hoohoo gi-di gonduu hagamadagu Dimaadua.

18:6  Mee gu-hagailoo gi Moses bolo ginaadou e-lloomoi,

18:7  gei Moses gaa-hana belee heetugi gi mee, ga-bala gi-lala i-mua o mee gaa-hongi a-mee. Digaula ga-heheeu be ginaadou guu-hai behee, ga-ulu gi-lodo di hale-laa Moses.

18:8  Moses ga-hagi-anga gi Jethro nia mee huogodoo Dimaadua ne-hai gi-di king mo nia daangada Egypt belee haga-dagaloaha digau Israel. Mee gu-hagi-anga labelaa gi mee nia haingadaa ne-heetugi ginai ginaadou i-di-nadau lloomoi, mo-di hai Dimaadua ne-benebene ginaadou.

18:9  Jethro ne-longono-ia nia mee aanei huogodoo, ge gu-tenetene,

18:10  ga-helekai, “Hagaamuina Dimaadua dela ne-benebene goodou gi-daha mo-di king mo nia daangada o Egypt. Hagaamuina Dimaadua dela ne-benebene ana daangada gi-daha mo-di hai-hege”.

18:11  Dolomeenei au e-iloo bolo Dimaadua e-aamua i-nia god huogodoo, idimaa Dimaadua guu-hai di mee deenei gi digau Egypt ala nogo hagahuaidu digau Israel.

18:12  Jethro ga-gaamai dana tigidaumaha belee dudu hagadogomaalia mono tigidaumaha ala i-golo belee wanga gi God, ge Aaron mo nia dagi Israel huogodoo gaa-hula belee miami e-hagagila nnangaahai daumaha.

18:13  Di laangi nomuli, gei Moses nogo daadaamee e-haga-donudonu nia mee i-mehanga nia daangada mai di luada gaa-tugi i-di boo.

18:14  Jethro ne-mmada gi-nia mee huogodoo a Moses e-hai, ga-heeu, “Ma ni-aha ala e-hai kooe gi-nia daangada? Goe e-aha dela e-hai nia maa modogoe gei nia daangada e-tuu i-kinei mai luada gaa-tugi di boo belee heeu adu nadau mee?”

18:15  Moses ga-helekai, “Au e-hai gii-hai beenei idimaa nia daangada e-lloomoi gi-di-au e-kabe di manawa o God.

18:16  Nia daangada dogolua ma-ga-lagalagamaaloo, meemaa e-lloomoi gi-di-au, gei au ga-hilihili be di-ma koai dela e-donu i meemaa, gei au e-hagi-anga gi meemaa nnelekai mo nnaganoho a God.”

18:17  Jethro ga-helekai, “Goe hagalee hai donu nia mee aanei.

18:18  Goe ga-hagaduadua goe mo nia daangada aanei. Aanei la-guu-logo balua di hai kooe modogoe.

18:19  Dugua-mai e-gowadu nia hagamaamaa humalia, gei God ga-madalia-laa goe. Ma e-donu go dau pono nia daangada i-mua o God, e-gaamai nadau lagamaaloo gi Mee.

18:20  Goe ne-belee aago nnelekai a God gi-nia daangada, ga-hagamodongoohia di hai e-noho mo e-mouli, gei ni-aha belee hai go ginaadou.

18:21  E-humalia goe hilihilia hunu daangada ala e-mee, gaa-dongo digaula e-hai nia dagi o-nia daangada: Nia dagi nia madahaanau dagi mana, dagi llau, dagi madalima mo dagi madangaholu. Digaula e-hai gii-hai digau e-mmaadagu i God, e-hagadagadagagee ginai, e-deemee di-hui halahalau go tangada gi-nia bahihadu.

18:22  Heia digaula gi-ngalua be digau hai-gabunga i-nia madagoaa huogodoo ang-gi digau Israel. Digaula e-mee di-gaamai nia gabunga haingadaa huogodoo gi-di-goe, gaa-hai nia lagamaaloo lligi huogodoo go ginaadou. Deelaa di hai ga-haga-haingoohia, i digaula ala gaa-dau e-hagamaamaa goe.

18:23  Maa goe gaa-hai di-mee deenei be nnelekai a God, goe ga-hagalee hagaduadua goe, gei nia daangada huogodoo gaa-hula gi nadau guongo, gei nadau lagamaaloo ga-hagahumalia.”

18:24  Moses gu-daudali nnelekai a Jethro,

18:25  ga-hilihili nia daane e-mee di hai nnegau i-lodo digau Israel huogodoo. Mee ne-dongo digaula belee hai nia dagi o-nia daangada madangaholu llau, dagi llau, dagi madalima mo dagi madangaholu.

18:26  Digaula e-hai-hegau be digau hai-gabunga e-ngalua gi-muli ang gi-nia daangada, e-gaamai nia gabunga haingadaa gi Moses, gaa-hai nia gabunga lligi go ginaadou.

18:27  Moses ga-hagaaloho hagamaewae gi Jethro dela gaa-hana gi-muli gi dono guongo.