Kapingamarangi - Exodus - 12

12:1  Dimaadua ga-helekai gi Moses mo Aaron i-lodo o Egypt,

12:2  “Di malama deenei la-go taamada o di-godou ngadau.

12:3  Deenei di-gulu mee belee hagi-anga go goolua gi digau Israel, bolo di madangaholu laangi o-di malama deenei, gei nia daane dagidahi i goodou gi-hilihilia dana dama-siibi be tamaa-kuudi ang-gi digau dono hale, di manu e-dahi ang-gi digau o-di hale e-dahi.

12:4  Maa di hale e-hogoohi ang-gi tama-siibi dogomaalia, digaula la-gii-buni-anga-hua gi digau o-di hale dela e-hoohoo-mai. Digaula di-nadau dama-siibi hua e-dahi, e-hagabau be dogohia e-mee di-gai di manu dulii deelaa.

12:5  Goodou hilihilia di kuudi-daane be-di siibi-daane, dono ngadau e-dahi, dela e-humalia ge madammaa.

12:6  Hiahi di madangaholu maa-haa o-di malama deelaa, gei digau Israel huogodoo e-hai gi-daaligi nia manu aalaa.

12:7  Digaula gii-kae nia dodo o-nia manu aalaa gi-hunu-ina nia waduu o nadau bontai mo nia laagau di ulu gi-nua o-nia bontai o-nia hale ala e-miami-ai ginaadou, e-gai nia manu aalaa.

12:8  Di boo hua deelaa, digaula gi-geina nia goneiga o-nia manu ala ne-dunu i-hongo di ahi, gidagia gi-nia lau-laagau mmala mo nia palaawaa digi wanga ginai nia ‘yeast’.

12:9  Hudee geina-mada be dunu nia goneiga gi-nia wai i-lodo di baalanga, gei gi-geina di mee dela guu-dunu haga-dogomaalia, mo dono libogo, mono wae, mono mee ala i-lodo huogodoo.

12:10  Goodou hudee dugu mee gi-di luada. Nia mee ala ma-gaa-dubu, la-gi-duungia.

12:11  Deenei di-godou hai e-gai nia manu aalaa: goodou ulu godou gahu mo godou suudi e-hagatogomaalia e-hula, kumi godou dogodogo i godou lima, ga-miami-laa haga-lellele. Idimaa deelaa di-godou Hagamiami o-di Pasoobaa, e-hagalaamua Au, go Dimaadua.

12:12  “Di boo hua deelaa gei Au ga-daaligi nia ulu-mmaadua-daane mono ulu-mmaadua manu huogodoo i-hongo Egypt, ga-hagahuaidu nia balu-god o Egypt huogodoo. Ko-Au go Dimaadua.

12:13  Nia dodo ala gaa-hunu gi-nia waduu nia bontai le e-haga-modongoohia nia hale ala e-noho-ai goodou. Au ma-ga-gidee nia dodo, gei Au ga-haga-hili goodou i-golo. Deai di hagaduadua e-tale-adu gi goodou ai i dagu hagaduadua digau Egypt.

12:14  Goodou la-gi-budubudu-ina di laangi tagamiami dabu deenei, e-haga-langahia go goodou mo godou hagadili gi-muli, bolo ma ko-Au, go Dimaadua, ne-hai di mee deenei.”

12:15  Dimaadua ga-helekai, “I-lodo nia laangi e-hidu, goodou la-gi-geina go nia palaawaa digi hagatanga gi-nia ‘yeast’. Di laangi matagidagi di tabu deelaa, goodou la-gi-haga-mmaa-ina gi-daha nia ‘yeast’ ala i-lodo godou hale, idimaa, tangada ma-gaa-gai dana palaawaa gu-hagatanga gi-nia ‘yeast’ mai tahi laangi gaa-hana gi-di hidu laangi, geia hagalee dau ang-gi digau Israel.

12:16  Goodou gi-dagadagabuli daumaha i-di laangi matagidagi mo di hidu laangi di tabu deelaa. Nia laangi aalaa di moomee e-hai ai. Di moomee e-mee di-hai la-go di hai nia meegai e-gai.

12:17  Goodou la-gi-heheia tagamiami-dabu deenei, idimaa dela dagu laangi ne-dagi-mai godou madawaawa gi-daha mo Egypt. Goodou la-gi-heheia tagamiami dabu deenei gi digau huogodoo ala e-hagadili-mai gaa-hana-hua beelaa.

12:18  Goodou e-gai nia palaawaa digi hagatanga gi-nia ‘yeast’, daamada i-di hiahi o-di madangaholu maa-haa laangi o-di malama matagidagi, gaa-huli gi-di hiahi o-di madalua maa-dahi laangi.

12:19  I-lodo nia laangi e-hidu la-deai di ‘yeast’ i-lodo godou hale ai. Di ingoo hua tangada dela ma-gaa-gai dana palaawaa tanga, go tangada hua deelaa le e-hagamodu gi-daha mo digau Israel, ma e-aha maa mee tangada mai i-daha be tangada donu o tenua.

12:20  Goodou hudee geina nia palaawaa tanga, aalaa-hua e-gai go nia palaawaa digi hagatanga-ina i-di ingoo hua di gowaa dela ma-gaa-noho ai goodou.”

12:21  Gei Moses ga-haga-dagabuli nia dagi o digau Israel ga-helekai gi digaula, “Tangada-nei mo tangada-nei i goodou tei gi-hilihilia dana dama-siibi be tamaa-kuudi ang-gi digau dono hale, daaligidia, gii-mee di-hai di-godou hagamiami haga-madagu o-di Pasoobaa.

12:22  Goodou ga-haga-tiu di lau o-di laagau-hisop gi-lodo nia dodo i-lodo di baisin, ga-haga-tiutiu nia duludulu o-nia bontai mo hongo nia bontai gi-nia maa. Deai tangada i goodou e-ulu gi-daha mo dono hale ai, gaa-dae-loo gi-di luada.

12:23  Dimaadua ma-gaa-hana i-hongo Egypt e-daaligi digau Egypt, ga-gidee-ia nia dodo i-di gili nia duludulu o-nia bontai mo hongo nia bontai, ge-Ia hagalee hai tangada di-langi haga-made-dangada gi-ulu gi-lodo godou hale e-daaligi goodou.

12:24  Goodou la-gi-haga-gila-ina-aga nia haganoho aanei gii-hai di mee e-hana-hua beelaa, gi-daahi go godou dama laalaa gi-muli-loo.

12:25  Di-godou madagoaa ma-ga-ulu i tenua a Dimaadua dela gu-hagababa-adu gi goodou, gei goodou la-gi-heheia taumaha deenei.

12:26  Di madagoaa godou dama ma-ga-heheeu-adu boloo, ‘Di mee deenei le e-haihai eimaha?’

12:27  Gei goodou ga-hagi-anga boloo, ‘Deenei la di tigidaumaha Pasoobaa ang-gi Dimaadua dela nogo daaligi digau Egypt, ge-Ia gu-hagahili digau Israel digi daaligidia.’ ” Digau Israel ne-hagalongo gi-nia mee aanei, gaa-pala gi-lala ga-daumaha gi God.

12:28  Gei digaula gaa-hula gaa-hai gii-hai be nia helekai a Dimaadua ala ne-hai gi Moses mo Aaron bolo gi-heia.

12:29  I-di madahidi-waelua di boo, gei Dimaadua ga-daaligi nia ulu-mmaadua huogodoo digau Egypt, daamada mai tama-daane madua a di king dela belee kae dono lohongo-king, gaa-tugi-loo i-di ulu-madua o tangada dela i-lodo di hale galabudi, mo nia ulu-mmaadua o-nia manu huogodoo.

12:30  Di king mo ono gau aamua mono gau o Egypt ala i-golo gu-aala huogodoo i-di boo deelaa. Nia hangihangi guu-logo i-hongo Egypt, idimaa, deai di hale bolo dono dama-daane ne-made-ai ai.

12:31  Di boo hua deelaa, gei di king o Egypt ga-gahi-mai a Moses mo Aaron, ga-helekai ginai, “Goolua hula hagalimalima gi-daha, goodou mo digau Israel huogodoo! Hula gi-daha mo dogu henua gi-daumaha goodou gi Dimaadua be godou kai ala ne-hai.

12:32  Kae-ina godou siibi mo godou kuudi mo godou kau. Goodou hula, gei goodou dalodalo-ina labelaa gi-hagahumalia au go Dimaadua.”

12:33  Digau Egypt e-uhuuhuli digau Israel bolo gi-hagalimalima gi-daha mo di-nadau henua, mo-di helekai, “Maa goodou ga-duai, gei gimaadou gaa-mmade huogodoo!”

12:34  Malaa, digau Israel gaa-kae nadau palaawaa digi unugi gi-nia ‘yeast’, gaa-hii gi-nia hii-goloo, ga-dahi-aga ga-aamo, ga-hagatanga gaa-hula.

12:35  Gei digaula ga-hai-hegau gi-nia helekai a Moses ala ne-helekai ang-gi ginaadou, bolo ginaadou gi-madau-ina nadau goloo ne-hai gi-nia silber mono goolo mono goloo-gahu mai digau Egypt.

12:36  Dimaadua guu-hai digau Israel gi-hagalabagau go digau Egypt, malaa, digau Egypt gu-dumaalia gi digau Israel, guu-wanga nia mee huogodoo ala ne-madau go digaula. Deenei di hai ne-daa-ai nia goloo digau Egypt go digaula.

12:37  Digau Israel la-ga-hagatanga i Rameses gaa-hula gi Sukkoth. Nia daane le e-ono-lau-mana-(600,000), nia ahina mono damagiigi digi daulia.

12:38  Nia daangada dogologowaahee mai i-daha mo nadau hagabae siibi, kuudi mono kau guu-hula i-nadau muli labelaa.

12:39  Digaula gaa-daa nadau palaawaa i nadau mee ne-gaamai i Egypt digi wanga ginai nia ‘yeast’, idimaa, digaula ne-hagabagi gi-daha mo Egypt hagalimalima, digi hagatogomaalia hagahumalia nadau meegai, ge digi hagatogomaalia nia palaawaa unugi gi-nia ‘yeast’.

12:40  Digau Israel ne-noho i Egypt nia ngadau e-430.

12:41  Di laangi hagamuliagina di ngadau e-430, deelaa di laangi o-nia madawaawa o-nia dama o Dimaadua huogodoo ne-hagatanga-ai gi-daha mo Egypt.

12:42  Deenei di boo a Dimaadua nogo dagi-mai digau Israel gi-daha mo Egypt mo-di madamada humalia ai digaula huoloo. Deelaa di mee digau Israel e-haga-dabu-ai di boo deelaa, e-hagalaamua Dimaadua mai i nadau haga-aala i-di boo deelaa, gaa-hana-hua beelaa gi-daahi go nadau dama laalaa gi-muli.

12:43  Dimaadua ga-helekai gi Moses mo Aaron, “Aanei nnaganoho di Pasoobaa: Tangada henua gee e-miami i tagamiami di Pasoobaa ai,

12:44  gei di ingoo hua di hege ne-hui kooe e-mee di-miami maa goe gu-sirkumsais a mee i-mua.

12:45  Tangada e-noho i Israel i-di madagoaa bodobodo be tangada ne-hagangalua e-miami di maa ai.

12:46  Tagamiami hagatau e-hai gi-miami i-lodo di hale ne-hagatogomaalia gi-di-maa; hagalee kae gi-malaelae. Hudee ohaa gi-mooho nia iwi o-di manu.

12:47  Nia daangada huogodoo o Israel e-hai gii-hai tagamiami deenei.

12:48  Tangada digi sirkumsais e-hagalee miami. Maa tangada henua-gee guu-noho i godou baahi, gei mee e-hiihai e-budu di Pasoobaa e-hagalaamua Dimaadua, goodou e-hai gi-sirkumsais nia daane huogodoo o-di hale o-maa. Nomuli, gei mee le e-dugu be tangada Israel donu, e-dau gi-di budu deenei.

12:49  Nnaganoho hua aanei e-hai-hegau gi digau Israel mo digau henua-gee ma-gaa-noho i godou baahi.”

12:50  Digau Israel huogodoo gu-hagalongo mo-di hagagila-aga nia helekai Dimaadua ne-hai gi Moses mo Aaron.

12:51  Di laangi deelaa, gei Dimaadua gu-laha-mai nia madawaawa Israel gi-daha mo Egypt.