Kapingamarangi - Ezekiel - 26

26:1  I-di laangi matagidagi di malama i-di madangaholu maa-dahi ngadau o-di madau lahi gi-daha, Dimaadua ga-helekai-mai gi-di-au,

26:2  “Kooe go tangada-dangada, deenei di-mee digau di waahale o Tyre e-tenetene ginai, digaula e-wwolowwolo boloo, ‘Jerusalem gu-mooho! Dono maaloo dangihi, dono huihui goloo gu-hagalee! Mee gu-deemee dana hai-baahi mai gi gidaadou labelaa!’

26:3  “Malaa, aanei la nia mee ala e-helekai-iei-Au, go Tagi go Yihowah: Di waahale o Tyre, Au go do hagadaumee. Au ga-gaamai agu henua llauehe e-logo e-heebagi adu gi-di-goe, digaula ga-lloo-adu gi-di-goe gadoo be nia beau o-di moana.

26:4  Digaula gaa-oho nia abaaba do waahale, ga-hagameheu gi-lala oo hale duuduu i-nua, gei Au ga-ili gi-daha nia gelegele huogodoo, gaa-dugu-hua nia hadugalaa i-golo.

26:5  Digau wagadaha e-doho nadau gubenge i-hongo di-maa, i-di gowaa dela e-duu-ai di-maa i-lodo di tai. Ko-Au go Tagi go Yihowah dela gu-helehelekai. Nia henua gaa-kae nia goloo huogodoo o Tyre.

26:6  Nadau hulumanu dauwa ga-daaligi digau huogodoo ala e-noho i-lodo nadau waahale i-lodo tenua Tyre. Tyre ga-iloo-laa bolo ma ko-Au dela go Dimaadua.”

26:7  Tagi go Yihowah ga-helekai, “Au ga-laha-mai di king dela e-aamua i-hongo nia king huogodoo, go King Nebuchadnezzar o Babylonia gi-heebagi gi Tyre. Mee ga-hanimoi i-baahi laa-ngeia mo dana llongo-dauwa damana, nadau hoodo, waga-dauwa hongo-henua, mo ana gau dauwa hongo hoodo.

26:8  Digau ala e-noho i-nia waahale i-lodo tenua deelaa gaa-mmade i teebagi. Nia hagadaumee gaa-hau di nadau gowaa e-abaaba ginaadou, geli nadau aloalo, gaa-bae nadau abaaba e-abaaba ginaadou gi-daha mo goe.

26:9  Digaula gaa-tugi o abaaba gi-di laagau damanaiee, gaa-oho gi-lala do waahale gi-nia dagigoo.

26:10  Nia gohu o nadau hoodo ga-duuli goe. Nia lee hoodo ala e-dagidagi nadau kulumaa mo nadau waga-dauwa hongo-henua gaa-lulu do waahale i-di nadau ulu gi-lodo nia bontai di waahale mooho.

26:11  Nadau gau dauwa hongo hoodo gaa-llele i-hongo au ala e-dadaaligi au daangada gii-mmade gi nadau hulumanu dauwa. Au duludulu mau-dangihi gaa-tinga gi-lala gi-hongo nia gelegele.

26:12  O hagadaumee ga-hai-mee gi o maluagina mo au goloo. Digaula gaa-oho gi-lala o abaaba gaa-oho oo hale madamada. Digaula gaa-kae nia hadu, laagau, geinga hale mooho, gaa-kili gi-lodo di moana.

26:13  Au ga-hagalawa godou hai-daahili, gaa-dugu labelaa nia lee o godou ‘harp’.

26:14  Gei Au gaa-dugu di hadugalaa damana hua igolo e-hai di gowaa e-dohodoho-ai nia gubenge o digau wagadaha. Di waahale deelaa hagalee e-hagaduu-aga labelaa. Ko-Au go Tagi go Yihowah dela ne-helekai.”

26:15  Deenei di mee Tagi go Yihowah ga-helekai ang-gi di waahale o Tyre, “I do madagoaa ma-gaa-kumi, gei digau huogodoo ala e-noho i taalinga di tai ga-mmaadagu huoloo i-nia wwolowwolo digau ala ga-daaligi.

26:16  Nia king o-nia henua huogodoo ala nadau wagabaalii e-logo la-ga-hagamenege-ia gi-daha mo nadau lohongo-king. Digaula ga-ulu gi-daha mo nadau gahu lloo mo nadau gahu dui, gaa-pala gi-lala e-polepole i-hongo di gelegele. Digaula koia ga-mmaadagu huoloo i-di hagaodi o godou mouli dela ga-hidi-mai-ai digaula gu-deemee di-dugu nadau polepole.

26:17  Digaula ga-daahili i taahili haga-manawa-gee deenei adu gi goodou: Di waahale e-dau dono humalia gu-mooho gi-daha! Ana wagabaalii gu-hagalee i-hongo di moana. Digau o-di waahale deenei ala e-dagi baahi gi-di moana, gu-haga-mmaadagu digau huogodoo ala e-noho i taalinga tai.

26:18  I-di laangi dela ne-kumi-ai, gei nia henua lligi aalaa la-gu-ngalungalua, gei digau o-nia henua aanei gu-homouli huoloo gi-di mooho deelaa.”

26:19  Tagi go Yihowah ga-helekai, “Au gaa-hai goe gii-hai di anga-henua gii-hai be nia waahale mooho ala gu-deai tangada e-noho ai. Au gaa-gahu goe gi-nia wai o-di moana.

26:20  Au ga-hagau goe gi-baahi digau ala ne-mmade bolo gii-noho goe i-baahi digau ala namua-loo. Gei Au guu-hai bolo goe gaa-noho i-lodo di gelegele i-baahi nia hale mooho deeodi ga-madalia digau ala guu-mmade. I-di hagaodi o-nia mee aanei, gei goe gu-deemee di-mouli labelaa i tenua digau mouli.

26:21  Au gaa-hai goe gii-hai di ada hagamadagudagu dangada, gei deelaa hogi di hagaodi gi-muli do mouli. Nia daangada ga-halahala goe, gei e-deemee di-gidee goe.” Aanei la nnelekai mai baahi Tagi go Yihowah.