Kapingamarangi - Ezekiel - 12

12:1  Dimaadua ga-helekai-mai,

12:2  “Tangada-dangada, goe e-noho i-baahi digau dee-hagalongo. Digaula nadau golomada ge e-dee-gidee, digaula nadau dalinga ge e-dee-longono, idimaa digaula e-hai-baahi-mai gi-di-Au.

12:3  “Deenei-laa, tangada-dangada, hiina dau hii-goloo gadoo be tangada e-ulu gi-daha mo dono henua, hagatanga gii-hana i-mua di-dae-mai di bouli. Heia digau huogodoo gi-gidee doo hana gi tuai gowaa. Holongo digau dee-hagalongo ga-mmada-adu gi-di-goe.

12:4  I-di madagoaa dela e-aa hua igolo, hiina dau hii-goloo ang-gi doo ulu gi-daha, gei digaula ga-gidee-ginaadou goe e-hagatanga i-di hiahi be tangada e-ulu gi-daha mo dono henua.

12:5  Di madagoaa-hua digaula ala e-daumada goe, hagabongo-ina dau bongoo i-di abaaba o doo hale, ga-daa-mai dau hii-goloo la i-lodo di bongoo deelaa.

12:6  Heia digaula gi-gidee-ginaadou dau hagauda dau hii-goloo gi-hongo do bakau gaa-hana gi malaelae gi-lodo di bouli, gahu-ina o golomada gi-de-gidee-goe be goe e-hana gi-hee. Dau hai gaa-hai le e-hai di hagailoo ang-gi digau Israel.”

12:7  Gei au guu-hai gii-hai be-di hai Dimaadua ne-helekai-mai bolo gi-heia. I-di laangi hua deelaa, gei au guu-haa dagu hii-goloo be tangada e-ulu gi-daha mo dono henua, gei i-di hiahi-ia di-mee, gei au gaa-geli dagu bongoo gi ogu lima i-di abaaba dogu hale, ga-ulu gi-daha gaa-hana. Nadau madagoaa e-daumada au, gei au ga-dahi-aga dagu hii-goloo gi-hongo dogu bakau gaa-hana.

12:8  Luada dono daiaa, gei Dimaadua ga-helekai-mai,

12:9  “Kooe go tangada-dangada, dolomeenei gei digau dee-hagalongo ga-heeu-adu gi-di-goe be goe e-hai dau-aha.

12:10  Hagi-anga-ina gi digaula i-nia mee ala e-helekai-iei-Au, go Tagi go Yihowah, ang-gi digaula. Nia helekai aanei e-hai ang-gi tangada aamua dela e-dagi i Jerusalem mo ang-gi digau huogodoo ala e-noho i-di gowaa deelaa.

12:11  Hagi-anga-ina gi digaula i dau mee dela nogo hai la-di ada-mee e-hagamodongoohia di-mee dela gaa-hai ang-gi digaula: Digaula gaa-hai digau ala e-llele gi-daha i-lodo di haingadaa, gaa-hai digau galabudi.

12:12  Tangada aamua dela e-dagi digaula gaa-kae dana hii-goloo i-di bouli ga-ulu gi-daha i-di bongoo ne-hai go digaula i-di abaaba deelaa. Mee ga-abaaba ana golomada gi-de-gidee di gowaa dela e-hana ginai.

12:13  Gei Au gaa-huge dagu gubenge gaa-hele a-mee gi-lodo, gei Au gaa-lahi a-mee gi Babylon, i-di gowaa dela e-made-ai, gei mee gu-dee-gidee tenua deelaa.

12:14  Au ga-hagabagi digau o dono hale huogodoo gi-nia gowaa huogodoo, madalia hogi ana gau hagamaamaa mono gau hagaloohi, gei nia daangada ga-halahala digaula belee daaligi.

12:15  “I-dogu madagoaa hagabagi digaula adu gi-lodo nia henua ala i-golo mo i-lodo nia henua o digau tuadimee, gei digaula ga-iloo-laa bolo ma ko-Au dela go Dimaadua.

12:16  Gei Au ga-dumaalia ang-gi hunu gau hogoohi i digaula gii-too gi-daha mo tauwa, mo tau-hiigai mo tau-magi, gei digaula ga-modongoohia i-lodo hua nia henua aalaa i-di hai o nadau hai gulugulua ala nogo hai, ga-iloo-laa bolo ma ko-Au dela go Dimaadua.”

12:17  Dimaadua ga-helekai-mai,

12:18  “Kooe go tangada-dangada, bolebole i do madagoaa ma-ga-miami, bolebole gi do madagu i do madagoaa ma-ga-inu nia wai.

12:19  Hagailoo-ina gi tenua hagatau bolo aanei la-nia helekai-mai baahi Tagi go Yihowah ang-gi nia daangada Jerusalem ala e-noho hua igolo i-lodo nadau henua: Digaula ga-polepole i-di nadau madagoaa ma-ga-miami, mo-di polepole gi di-nadau mmaadagu i-di nadau madagoaa ma-ga-inu nia wai. Nadau gowaa gaa-hai nia anga gowaa, idimaa digau huogodoo ala e-noho i tenua deelaa e-oho agu haganoho.

12:20  Nia waahale ala e-dogologo ono daangada dolomeenei gaa-oho gi-daha, gei tenua gaa-hai di anga-henua. Gei digaula ga-iloo-laa bolo ma ko-Au go Dimaadua.”

12:21  Dimaadua ga-helekai-mai,

12:22  “Kooe go tangada-dangada, digau Israel le e-aha ala e-helehelekai-aga di agoago podo deenei: ‘Nia laangi la-gu-hagaodi, gei nia helekai kokohp la-digi kila-aga?’

12:23  Helekai ang-gi digaula nia mee ala e-helekai-iei Au, go Tagi go Yihowah, gi-di mee deenei. Au ga-hagalawa di agoago podo deenei, deai tangada i-lodo Israel e-helekai labelaa di agoago deenei ai. Helekai gi digaula di-mee deenei: ‘Di madagoaa ga-dau-mai, gei nia kokohp la-ga-kila-aga!’

12:24  “Deai nia midi tilikai be nia helekai kokohp tilikai e-kila-aga i-baahi digau Israel ai.

12:25  Au go Dimaadua ga-helekai gi digaula, gei agu mee ala ga-helekai-iei Au la-ga-kila-aga-hua, hagalee hagaduai. I-di waalooloo o godou mouli, Au ga-hagagila-aga agu helekai ala ne-hai-adu gi goodou, go digau e-dee-hagalongo, bolo e-hai ko-Au. Ko-Au dela ne-helekai.” Aanei la nnelekai mai baahi o Tagi go Yihowah.

12:26  Dimaadua ga-helekai-mai,

12:27  “Kooe go tangada-dangada, digau Israel e-hagamaanadu bolo dau moe mo au helekai kokohp digi hagawoua bolo ga-dau-mai.

12:28  Helekai gi digaula bolo ko-Au go Tagi go Yihowah dela e-helekai: ‘Agu mee ala ne-helekai-iei Au la-ga-kila-aga, hagalee hagaduai.’ Ko-Au go Tagi go Yihowah ne-helekai!”