Kapingamarangi - Ezekiel - 28

28:1  Dimaadua ga-helekai-mai,

28:2  “Kooe go tangada-dangada, helekai ang-gi di tagi o Tyre i-nia mee ala e-helekai-iei Au, go Tagi go Yihowah, ang-gi mee: Idimaa i do hagalaamua-aga goe, gei goe gu-hagamaanadu bolo goe guu-hai be dahi god dela e-noho i-lodo dono lohongo e-haganiga-mai go di moana. Goe e-hagamaanadu bolo goe di god, gei deeai, goe tangada hua dangada, hagalee e-mouli deeodi.

28:3  Goe e-hagamaanadu bolo goe koia e-kabemee i Danel, dela deai dahi mee dee-gidee bolo gaa-ngala i-di goe ai.

28:4  Do iloo-mee mo do hai-mee la-ne-hai goe gi-maluagina i-nia goolo mono silber.

28:5  Goe guu-hai au huihui goloo mo-di kae au wiini mai i au huihui-goloo aalaa. Goe gu-hagapuu hualaa behee i o maluagina!

28:6  “Malaa, deenei la nia mee ala e-helehelekai-iei Au, go Tagi go Yihowah: Idimaa i do hagamaanadu bolo goe e-koia e-kabemee i-di god,

28:7  Au ga-hagau-mai dagu llongo dauwa hagamuamua e-heebagi adu gi-di-goe. Digaula gaa-oho nia mee huogodoo madamada ala ne-hai kooe gi o hai-mee mo do iloo-mee.

28:8  Digaula ga-daaligi goe, gaa-hudu goe gi-lodo di moana.

28:9  Di madagoaa digaula ga-lloomoi belee daaligi goe, malaa, gei goe e-hagamaanadu hua igolo bolo goe di god? Do madagoaa ma-gaa-duu i-mua digau ala belee daaligi goe, gei goe gu-hai-hua be tangada-dangada, gu-deai do mouli waalooloo ai.

28:10  Goe gaa-made gadoo be di paana i-lodo nia lima o digau mai-daha ala hagalee daumaha mai gi-di-Au. Ko-Au go Tagi go Yihowah dela e-hagawaalanga-aga nia mee aanei.”

28:11  Dimaadua ga-helekai labelaa mai gi-di-au,

28:12  “Kooe go tangada-dangada, dangi wawwawe gi-di hagaodi di mouli o-di king o Tyre. Hagianga-ina gi mee nia mee ala e-helehelekai-iei Au, go Tagi go Yihowah: Goe guu-hai dahi ala-mee humalia e-dohu dogomaalia, e-honu di iloo mo-di madamada huoloo!

28:13  Goe guu-noho i Eden, di hadagee a God, goe gu-ulu nia hagadilinga mee e-logo: nia hadu hagalabagau go nia ‘ruby’, ‘diamond’, ‘topaz’, ‘beryl’, ‘onyx’, ‘jasper’, ‘sapphire’, ‘emerald’, mono hadu ‘garnet’. Goe guu-hai doo hau goolo dela ne-hai go digaula adu gi-di-goe i-di laangi dela ne-hai goe.

28:14  Gei Au ne-dugu dagu dangada di-langi maaloo dangihi e-loloohi goe. Goe guu-noho i-hongo dagu gonduu dabuaahia gei e-heehee i-mehanga nia hadu madamada hagalabagau huoloo.

28:15  Goe nogo haihai nia mee humalia huogodoo mai i-di laangi dela ne-hai goe gaa-dae-mai-loo gi doo hai di-mee huaidu.

28:16  Goe nogo daadaamee di hui-mai ge di hui gi-daha. Aanei gaa-hidi-ai-iei goe gaa-hai tangada daaligi dangada ge guu-hai di huaidu. Gei Au ga-hagabagi goe gi-daha mo dagu gonduu hagamadagu, gei tangada di-langi dela nogo hagaloohi goe ga-hagabagi goe gi-daha mo nia hagadilinga mee madamada huoloo.

28:17  Goe gu-hagapuu-hua gi do madanga, gei goe gu-hai-hua be tangada dadaulia mai i doo longo guu-dele humalia. I doo hai deenei, dela gaa-hidi-iei Au gaa-hudu goe gi-lala gi-hongo di gelegele, gaa-hudu goe gi-daha belee hai dahi ala-mee ang-gi-nia king ala i-golo.

28:18  Dau hegau huihui mee la koia e-huaidu huoloo dela ne-hidi-mai au gowaa hai-daumaha la-gu-gulugulua. Deenei di-mee ne-hidi-ai Au gaa-dudu di waahale deelaa gi-lala. Digau huogodoo ala ma-gaa-mmada adu gi-di-goe dolomeenei, gu-iloo bolo goe guu-hai nia lehu.

28:19  Goe gu-hagalee, gaa-hana-hua beelaa, gei nia henua huogodoo ala gu-iloo-ginaadou goe ga-mmaadagu ga-uli nadau gai bolo di hagaodi nadau mouli gi-dee-hai-hua be goe.”

28:20  Dimaadua ga-helekai-mai,

28:21  “Tangada-dangada, helekai kokohp hai-baahi gi-di waahale Sidon.

28:22  Hagianga-ina gi digau ala e-noho i-golo i-nia mee ala e-helehelekai-iei Au, go Tagi go Yihowah i digaula: Sidon, ko-Au go di-godou hagadaumee. Nia daangada ga-hagaamu Au idimaa i dagu hai dela e-hai adu gi-di-goe. Digaula ga-iloo bolo ma ko-Au dela go Dimaadua i dogu madagoaa dela ma-ga-hagamodongoohia-aga dogu dabuaahia i dogu hagaduadua digau huogodoo ala e-noho i godou baahi.

28:23  Au ga-hagau-adu tau-magi gi-goodou, gaa-hai nia dodo gii-hali i-hongo oo ala. Nia hagadaumee ga-heebagi-adu gi goodou mai nia baahi huogodoo, gei o daangada ga-daaligi gaa-mmade. Malaa, goodou ga-iloo-laa bolo ma ko-Au go Dimaadua.”

28:24  Dimaadua ga-helekai, “Deai dahi henua i-nia henua ala e-haganiga mai i-daha Israel ala nogo hai hagahuaidu Israel gaa-hai labelaa be di laagau duduia dela belee hagammae Israel ai. Deelaa di-mee digaula ga-iloo-laa bolo ma ko-Au go Tagi go Yihowah.”

28:25  Tagi go Yihowah ga-helekai, “Au ga-laha-mai digau Israel huogodoo mai i-nia henua ala ne-hagau ginai digaula, gei nia henua huogodoo ga-iloo bolo Au e-dabuaahia. Digau huogodoo Israel gaa-noho i-di-nadau henua donu, tenua dela ne-wanga ko-Au gi dagu dangada hai-hegau go Jacob.

28:26  Digaula gaa-noho i-golo i-di aumaalia, gaa-hau nadau hale, gaa-dogi nadau hadagee waini. Au ga-hagaduadua digau ala i-baahi o mee ala nogo hai hagahuaidu a mee, gei Israel gaa-noho i-di aumaalia. Digaula ga-iloo-laa bolo ma ko-Au go Dimaadua go di-nadau God.”