Kapingamarangi - II Chronicles - 15

15:1  Di Hagataalunga o God gu-haneia gi-hongo o Azariah tama-daane a Oded,

15:2  gei mee gaa-hana e-heetugi gi King Asa, ga-gahigahi a-mee, “Hagalongo-mai gi-di-au, King Asa, mo goodou huogodoo nia daangada o Judah mo Benjamin! Dimaadua e-madalia goodou i-di-godou madalia a-Mee. Maa goodou ga-halahala a-Mee, Mee ga-dumaalia adu gi goodou gi-gidee goodou a-Mee. Maa goodou gaa-huli gi-daha mo Mee, gei Mee ga-diiagi goodou.

15:3  I-di madagoaa waalooloo Israel nogo mouli, digaula deai di-nadau God donu ai, nadau gau hai-mee-dabu belee aago digaula ai, mo nadau haganoho ai.

15:4  Gei di madagoaa di haingadaa ma-guu-tale ang-gi digaula, digaula gu-huli-adu gi Dimaadua, go di God o Israel. Digaula gu-halahala a-Mee gu-gidee a-Mee.

15:5  I-lodo nia laangi aalaa, e-deai tangada e-mee di-hanimoi be hana i-di aumaalia ai, idimaa nia heheebagi mo nia hinihini la-gu i-lodo nia henua huogodoo.

15:6  Nia henua llauehe gu-hai-baahi gi-nia henua llauehe, nia waahale gu-hai-baahi gi-nia waahale, idimaa God ne-hagauda nia heheebagi mo nia hinihini gi-hongo digaula.

15:7  Malaa goodou e-hai-loo gi-lodo maaloo, hudee manawa paagege. Godou hegau ala e-hai la ono hui i-golo.”

15:8  Di madagoaa Asa ne-hagalongo gi-nia helekai kokohp Azariah, tama a Oded, mee gu-haga-maaloo-aga. Mee gu-hagammaa gi-daha nia ada balu ieidu huogodoo ala i-hongo tenua go Judah mo Benjamin, mo nia ada balu ieidu huogodoo ala i-lodo nia waahale ala ne-kumi go mee i-lodo tenua gonduu o Ephraim. Mee gu-haga-hoou labelaa di gowaa dudu tigidaumaha Dimaadua dela e-duu i-lodo di gowaa daahaa o-di Hale Daumaha.

15:9  Nia daangada dogologo gu-lloomoi gi-baahi o Asa mai Ephraim, Manasseh, mo Simeon, ge guu-noho i-lodo tenua dela e-dagi go mee, idimaa digaula gu-gidee bolo Dimaadua gu-madalia a-mee. Asa ga-haga-dagabuli digaula huogodoo mo nia daangada o Judah mo Benjamin.

15:10  Digaula gu-dagabuli-mai gi Jerusalem i-lodo di tolu malama o-di madangaholu maa-lima ngadau nogo king-ai Asa.

15:11  I-di laangi deelaa digaula guu-hai nadau tigidaumaha ang-gi Dimaadua gi-nia goloo ala ne-gaamai go digaula mai tauwa: nia kau e-hidu-lau-(700) mo nia siibi e-hidu-mana-(7,000).

15:12  Digaula gu-hagababa bolo ginaadou guu-donu ngaadahi e-daumaha gi Dimaadua, di God o nadau maadua mmaadua, mai i-lodo nadau manawa mo nadau mouli hagatau.

15:13  Tei dangada, dulii be madua, taane be-di ahina, dela digi daumaha gi Mee, le e-daaligi gii-made.

15:14  Digaula guu-hai di-nadau hagamodu i-di ingoo Dimaadua i-di lee damana bolo ginaadou ga-daahi di hagababa. Nomuli, digaula ga-wwolowwolo gi-nua mo-di iliili nadau labaa.

15:15  Nia daangada huogodoo o Judah gu-tenetene, idimaa ginaadou ala guu-hai di hagababa deenei mai i-lodo nadau manawa hagatau. Digaula gu-tenetene huoloo hagahagaamu i-di nadau daumaha ang-gi Dimaadua, gei Mee guu-hila ang-gi digaula guu-wanga gi digaula di-noho i-di aumaalia i-hongo tenua damana hagatau.

15:16  King Asa guu-daa dono dinana-madua go Maacah gi-daha mo dono lohongo dinana di king, idimaa mee guu-hai di ada haga-gulugulua di balu god-ahina Asherah. Asa guu-hele di ada balu-ieidu, gu-duuduu hagalligi, guu-dudu nia bida mee i-lodo di Gowaa Baba Kidron.

15:17  Ma e-aha maa Asa digi oho-ina gi-daha nia gowaa hai daumaha huogodoo a-di gau e-noho i-lodo bouli, gei mee e-noho manawa-dahi ang-gi Dimaadua i-di waalooloo o dono mouli.

15:18  Mee guu-dugu gi-lodo di Hale Daumaha nia mee huogodoo dono damana Abijah ne-hagadabu ang-gi God, ngaadahi mo nia goloo goolo, silber ala ne-bida hagadabu koia.

15:19  Tauwa ne-hai ai gaa-dae loo gi-di motolu maa-lima ngadau o dono madagoaa nogo king.