Kapingamarangi - II Chronicles - 17

17:1  Jehoshaphat guu-pono di lohongo king dono damana, gu-hagamaaloo-aga nia mogobuna dono waawa hai-baahi gi Israel.

17:2  Mee gu-haganoho ana gau dauwa i-lodo nia waahale abaaba o Judah, i-lodo nia gowaa o Judah i-daha mo nia waahale, mo i-lodo nia waahale ala ne-kumi go Asa i-lodo tenua go Ephraim.

17:3  Dimaadua gu-hagahumalia Jehoshaphat idimaa mee e-daudali nia hangaahai o dono damana dono madagoaa nogo dama-daane, gei hagalee nogo daumaha gi Baal.

17:4  Mee gu-hai-hegau gi-di God o dono damana, gu-daudali nia haganoho a God, gei mee hagalee daudali di mouli o-nia king o Israel.

17:5  Dimaadua guu-wanga gi Jehoshaphat di mogobuna maaloo e-dagi tenua go Judah, gei nia daangada huogodoo e-gaamai gi mee nadau kisakis, gei mee gu-maluagina, gu-hagalaamua go digaula.

17:6  Mee gu-hagalaamua dana hagagila-aga Dimaadua, gu-oho gi-daha nia gowaa balu daumaha huogodoo mo nia ada o-di god Asherah i-lodo Judah.

17:7  I-lodo tolu ngadau nogo king, mee gu-hagau gi-daha digau aamua aanei e-agoago i-lodo nia waahale o Judah: Benhail, Obadiah, Zechariah, Nethanel, mo Micaiah.

17:8  Digaula ne-hula ginaadou mo digau Levi dogo-hiwa ge dogo-lua daangada hai-mee-dabu. Digau Levi la-go Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, mo Tobadonijah; nia daangada hai-mee-dabu la-go Elishama mo Jehoram.

17:9  Digaula guu-kae di beebaa Nnaganoho Dimaadua, guu-hula laa-lodo nia waahale huogodoo o Judah, e-agoago gi-nia daangada nia mee ala i-lodo di beebaa deelaa.

17:10  Dimaadua guu-hai nia henua llauehe huogodoo ala e-haganiga tenua di King Jehoshaphat gi mmaadagu di hula e-dauwa gi mee.

17:11  Hunu daangada o Philistia gu-gaamai nadau hagabae silber logowaahee mo nia kisakis ala i-golo gi Jehoshaphat, mo hunu daangada o Arabia gu-gaamai labelaa nadau siibi e-hidu mana ge hidu-lau-(7,700) mono kuudi e-hidu mana ge hidu-lau-(7,700) gi mee.

17:12  Deenei di mogobuna o Jehoshaphat e-tomo gi-nua i-nia madagoaa huogodoo. Mee gu-hagaduu ana abaaba waahale, ge guu-hau ana waahale laa-lodo Judah hagatau,

17:13  ala nia gowaa e-benebene-ai nia goloo e-logowaahee. Mee gu-haganoho ana daangada aamua ala e-kaedahi i-lodo Jerusalem,

17:14  e-hagatau gi nadau madahaanau. Adnah la-di tagi aamua o-nia buini dauwa mai nia madahaanau o Judah, e-dagi ana gau dauwa dogo-dolu-lau mana-(300,000).

17:15  Togolua dagi la-go Jehohanan, e-dagi ana gau dauwa dogo-lualau mo huwowalu mana-(280,000).

17:16  Togodolu dagi la-go Amasiah tama-daane a Zichri e-dagi ana gau dauwa dogo-lua-lau mana-(200,000). (Amasiah guu-bida hiihai bolo e-hai nnegau Dimaadua.)

17:17  Tagi aamua o-nia buini dauwa o-nia madahaanau o Benjamin la-go Eliada, taane dauwa e-aali huoloo, e-dagi ana gau dauwa dogo-lua-lau mana-(200,000) guu-hau ginaadou gi-nia duuli abaaba dangada mo nia maalei.

17:18  Dono togolua dagi la-go Jehozabad e-dagi ana gau dauwa e-lau mo huwowalu mana-(180,000), guu-hau gu-togomaalia humalia gi tauwa.

17:19  Nia daane aanei gu-ngalua gi-di king i Jerusalem, e-hagapuni labelaa, mee gu-haganoho labelaa ana gau dauwa gi-lodo nia waahale o Judah ala gu-abaaba.