Kapingamarangi - II Samuel - 1

1:1  Muli di made o Saul, David ne-lawa-mai i dono aali i tauwa ang-gi digau Amalek, gaa-noho i Ziklag nia laangi e-lua.

1:2  Hooaga dono daiaa, tama-daane ga-dau-mai ne-hanimoi i-baahi di waahale-laa o Saul. Mee ne-haahi dono gahu dela e-ulu-ai, gaa-wanga ana dogolia gi-hongo dono libogo belee haga-modongoohia-aga dono lodo-huaidu, ga-hana-laa gi-baahi o David, ga-bala gi-lala e-hai dana hagalaamua.

1:3  David ga-heeu gi mee boloo, “Goe ne-hanimoi i-hee?” Gei mee ga-helekai, “Au ne-lele-mai i-baahi nia hale-laa digau dauwa Israel.”

1:4  David ga-heeu, “Aahee-laa au longo?” Gei mee ga-helekai, “Madau gau-dauwa gu-lellele dagidahi i-lodo tauwa, digau dauwa dogologo guu-mmade. Saul mo dana dama-daane go Jonathan la-guu-mmade labelaa.”

1:5  David ga-heeu, “Goe e-iloo di-aha bolo Saul mo Jonathan la-guu-mmade?”

1:6  Mee ga-helekai, “Dogu madagoaa dela nogo i-hongo di Gonduu Gilboa, au gu-gidee Saul e-haga-haa i-hongo dana daalo, gei nia waga dauwa hongo-henua o madau hagadaumee mo digau-dauwa ala e-llele nia hoodo gu-hoohoo-mai gi mee.

1:7  Gei Saul ga-huli-mai ga-gidee-ia au, ga-gahigahi-mai au, gei au ga-helekai boloo, ‘Meenei, deenei au.’

1:8  Mee ga-heeu-mai be au koai, gei au gaa-hai bolo au tangada Amalek.

1:9  Mee ga-helekai, ‘Au gu-lauwa gaa-made-hua. Hanimoi gi kinei, daaligidia au gii-made.’

1:10  Au ga-menege-adu gi mee, ga-daaligi a-mee gii-made, i-di-au gu-iloo bolo mee gaa-made-hua muli i dono doo gi-lala. Gei au ga-dahi-aga di hau-king dela nogo i dono libogo mo dono duu lima dela nogo i dono lima, malaa, aanei ne-gaamai ko-au belee gowadu gi-di-goe, meenei.”

1:11  Gei-ogo David ga-haahi ono gahu gi ono lima i dono lodo-huaidu, mo ono ehoo huogodoo gu-hahaahi nadau gahu labelaa.

1:12  Digaula gu-lodo-huaidu huoloo, guu-hai di-nadau hangihangi gi Saul mo Jonathan, mo digau-dauwa o Israel huogodoo, go nia daangada Dimaadua, mo-di hagaonge gaa-dae-loo gi-di hiahi, i digau dogologo ala guu-mmade i tauwa.

1:13  David ga-heeu gi tama-daane dela ne-gaamai dana haga-iloo, “Goe tangada o-hee?” Mee ga-helekai, “Au tangada Amalek, gei au e-noho i-hongo do henua.”

1:14  David ga-heeu gi mee, “Goe e-aha dela hagalee e-madagu di-dahi-aga oo lima e-daaligi di king dela ne-hilihili go Dimaadua?”

1:15  Gei David ga-gahi-mai taane-dauwa bolo gi-daaligidia a-mee gii-made, gei taane-dauwa ga-daaligi a-mee gii-made.

1:16  David ne-helekai gi taane Amalek boloo, “Goe ne-bida hai-adu gi-di-goe di mee deenei, i dau haga-modongoohia-aga bolo goe ne-daaligi di king dela ne-hilihili go Dimaadua.”

1:17  David ne-daahili dana daahili manawa-gee gi-di made a Saul mo dana dama-daane go Jonathan,

1:18  gaa-hai bolo taahili deenei la-gi-aago-ina gi digau Judah gi-iloo taahili deenei: (Taahili deenei la-ne-hihi gi-lodo Di Beebaa Jashar)

1:19  “I-hongo nia gonduu o Israel ne-mmade-ai tadau dagi, tadau gau-dauwa maaloo guu-mmade!

1:20  Gi-hudee heia gi-iloo digau Gath. Gi-hudee haga-iloo-ina i-hongo nia ala i Ashkelon. Goodou gi-dee-hai-hua dahi mee ga-haga-tene nia manawa o-nia ahina o Philistia, mono dama-ahina o digau tuadimee.

1:21  “Di magalillili o-di boo mo dono uwa la-gi-hudee haga-magalillili-ina nia gonduu o Gilboa. Nia gowaa maalama o Gilboa la-gi-hudee tomo nia lii! Idimaa, di gowaa deenei e-hagabae-ai nia mee abaaba madau gau-dauwa maaloo. Di gowaa deenei dela e-iai di mee abaaba a Saul e-moe-ai gei guu-tomo.

1:22  “Di maalei Jonathan nogo daaligi ono hagadaumee gii-mmade, tulumanu-dauwa o Saul la-digi balumee, nogo daaligi digau maaloo, nogo daaligi nia hagadaumee gii-mmade.

1:23  “Saul mo Jonathan i-di-nau madagoaa nogo mouli-ai, nia daangada nogo aloho i meemaa, gei nogo humalia gi meemaa, gaa-dae-loo gi-di-nau mmade, gei meemaa nogo buni huoloo i-nia madagoaa huogodoo. Meemaa e-koia e-limalima i-nia ‘eagle’ gei e-maaloo i-nia laion.

1:24  “Nia ahina o Israel, goodou gi-tangi i Saul! Mee nogo haga-gahu goodou gi-nia gahu humalia mono gahu mmee, gei ne-laagei goodou gi-nia hadu hagalabagau mono goolo.

1:25  “Tadau gau-dauwa maaloo la-guu-mmade, ne-mmade i-lodo tauwa. Jonathan guu-made, e-moe i-tomo nia gonduu.

1:26  “Jonathan dogu ihoo nei, au e-aloho i-di-goe dela e-haga-hali ginai nia dangi o ogu golomada. Do aloho i-di au e-humalia huoloo, ge e-humalia i-di aloho di ahina.

1:27  “Tadau gau-dauwa maaloo la-guu-mmade, nadau goloo-dauwa gu-diiagi, gu-deai ono hadinga ai.”