Kapingamarangi - II Samuel - 7

7:1  King David gu-haga-noho hagahumalia gi-lala i-lodo dono hale damana, gei Dimaadua gu-benebene a-mee gi-daha mo ono hagadaumee huogodoo.

7:2  Di king ga-helekai gi soukohp go Nathan, “Deenei au e-noho i-lodo di hale dela ne-hau gi-nia laagau-‘cedar’, gei Tebedebe o-di Hagababa o God e-dugu-hua i-lodo di hale-laa!”

7:3  Nathan ga-helekai gi-di king, “Heia dau mee dela gu-hagamaanadu, idimaa, Dimaadua e-madalia goe.”

7:4  Di boo-hua deelaa, gei Dimaadua ga-helekai gi Nathan boloo,

7:5  “Hana gi dagu dangada hai-hegau go David. Hagi-anga-ina gi mee boloo, ‘Ma hagalee kooe dela belee hau di hale dela belee noho-iei Au no-lodo.

7:6  Mai i-di laangi dela ne-laha-mai digau Israel gi-daha mo Egypt, gaa-dae-mai gi dangi-nei, Au hagalee nogo noho i-lodo di hale-daumaha, Au nogo heehee-hua mo-di nohonoho i-lodo di hale-laa.

7:7  I-lodo ogu holongo huogodoo ala nogo hana-iei Au dalia nia daangada Israel, Au digi heeu gi tei dangada i-nia dagi ala ne-dongo ko-Au boloo, ‘Goodou e-aha ala hagalee hau dagu hale gi-nia laagau-‘cedar’?’

7:8  “Malaa, goe helekai gi dagu dangada hai-hegau go David, bolo Au go Yihowah Koia e-Aamua ne-helekai boloo, ‘Au ne-laha-mai-loo goe gi-daha mo-di gowaa dela nogo benebene au siibi, belee dagi agu daangada digau Israel.

7:9  Au nogo madalia goe i di-ingoo-hua di madagoaa dela ne-hana ginai goe, gei Au gu-daaligi o hagadaumee huogodoo gi-daha i oo mua. Au gaa-hai do ingoo gi-aamua be nia ingoo o digau aamua huoloo ala i henuailala.

7:10  Au gu-hilihili di gowaa ang-gi agu daangada digau Israel, gei Au gu-haga-noho digaula gi-lala, gii-mee di noho i-golo, deai dahi mee e-hagahuaidu digaula ai. Digau huaidu ga-hagalee heheebagi labelaa gi digaula, ga-hagalee hai be nadau hai nogo heheebagi gi digaula mai taamada di-nadau lloomoi gi kinei. Nia haingadaa aanei ga-hagalee kila-aga, Au e-hai dagu hagababa adu gi-di-goe bolo Au ga-dugu-adu gi-di-goe do hagamolooloo gi-daha mo o hagadaumee, ga-gowadu gi-di-goe do hagadili.

7:11  Au gu-hilihili di gowaa ang-gi agu daangada digau Israel, gei Au gu-haga-noho digaula gi-lala, gii-mee di noho i-golo, deai dahi mee e-hagahuaidu digaula ai. Digau huaidu ga-hagalee heheebagi labelaa gi digaula, ga-hagalee hai be nadau hai nogo heheebagi gi digaula mai taamada di-nadau lloomoi gi kinei. Nia haingadaa aanei ga-hagalee kila-aga, Au e-hai dagu hagababa adu gi-di-goe bolo Au ga-dugu-adu gi-di-goe do hagamolooloo gi-daha mo o hagadaumee, ga-gowadu gi-di-goe do hagadili.

7:12  Do madagoaa ma-gaa-made-iei goe, gaa-danu gi-lala i-baahi o maadua-mmaadua, gei Au ga-haga-gila-aga dau dama-daane e-dahi e-hai di king, gei Au ga-hagamaaloo-aga dono henua.

7:13  Deelaa go mee dela e-haga-duu-aga dogu Hale Daumaha. Au gaa-dugu dono madawaawa bolo aalaa digau e-hai nia king gaa-hana-hua beelaa.

7:14  Au gaa-hai tamana ni mee, gei mee gaa-hai di tama ni-aagu. Mee gaa-hai dana mee hala, gei au ga-hagaduadua a-mee be tamana e-hagaduadua dana dama.

7:15  Gei Au hagalee daa gi-daha dogu aloho i mee, gadoo be dagu hai ang-gi Saul dela ne-daa a-mee gi-daha bolo gii-mee goe di hai di king.

7:16  Do madawaawa mo do henua-king la-hagalee-loo e-ngala i ogu mua, do lohongo-king dela-hua e-noho beelaa.’ ”

7:17  Malaa, Nathan ga-hagi-anga gi David nia mee huogodoo a God ala ne-haga-modongoohia ang-gi deia.

7:18  Nomuli, gei King David gaa-hana gi-lodo di Hale-laa Dimaadua dela e-noho-ai no-lodo, gaa-noho gi-lala, ga-dalodalo boloo, “Meenei Tagi go Yihowah, deenei au go dau dangada hai-hegau hagalee-loo e-tau gi-nia mee huogodoo ala gu-dugu-mai Kooe gi-di-au mo digau o dogu hale.

7:19  Meenei Tagi go Yihowah, dolomeenei gei goe e-hai bolo Goe gaa-hai nia mee humalia ala i-golo. Goe guu-hai au hagababa i-di gili dogu madawaawa i-lodo nia ngadau ala gaa-dae-mai. Meenei Tagi go Yihowah, Goe gu-haga-modongoohia nia mee aanei gi-nia daangada dangada!

7:20  Ma di-aha labelaa i-golo e-mee di-helekai-iei au adu gi di-Goe? Goe koia e-iloo-e-Goe au go dau dangada hai-hegau, meenei Tagi go Yihowah.

7:21  Ma Kooe dela ne-hai nia mee haga-goboina huogodoo aanei mai i do hiihai, gei Goe ga-haga-gida mai gi-di-au, go dau dangada hai-hegau.

7:22  Goe e-maaloo huoloo, meenei Tagi go Yihowah! Gimaadou guu-lawa di-iloo bolo ma deai di God labelaa i-golo be Goe ai, deelaa-hua Kooe!

7:23  Ma deai tenua i henuailala e-hai be tenua go Israel ai, dela ne-haga-dagaloaha Kooe gi-daha mo nadau hai-hege bolo gii-hai digaula nia daangada ni-aau. Goe guu-hai do ingoo gi-aamua huoloo i henuailala hagatau mai i au mogobuna haga-goboina ala ne-hai gi digau o do henua, gei gu-daaligi nia henua mo nadau balu-god i-mua au daangada ala ne-laha-mai i Egypt.

7:24  Meenei Dimaadua, Goe gu-hai-mee gi digau Israel ga-hana-hua dee-odi, Goe guu-hai di God ni digaula.

7:25  “Meenei Yihowah=God, haga-gila-aga-ina i-nia madagoaa huogodoo dau hagababa dela ne-hai i-di-au mo dogu hagadili gi-muli. Heia au mee ala bolo e-hai gii-hai be au helekai.

7:26  Gei do ingoo ga-aamua huoloo, deai dono hagaodi ai. Nia daangada ga-helekai boloo, ‘Yihowah Koia e-Aamua deelaa go di God o digau Israel.’ Gei Goe ga-daahi dogu hagadili ala e-hai nia king, gaa-hana-hua beelaa.

7:27  Meenei Dimaadua Koia e-Aamua, ma Kooe dela go di God o Israel! Mai i dau haga-modongoohia ang-gi dau dangada hai-hegau deenei bolo Goe ga-benebene dogu hagadili gi-muli e-hai nia king gaa-hana-hua beelaa, deenei-laa, au gu-manawa-maaloo e-hai dagu dangidangi deenei adu gi-di-Goe.

7:28  “Meenei Tagi go Yihowah, ma Kooe hua dela go di God e-donu, Goe e-haga-gila-aga au hagababa. Goe gu-hagababa-mai gi di-au nia mee haga-goboina dangada aanei.

7:29  Goe gi-hila-mai gi-di hagadili ni dau dangada hai-hegau deenei, bolo ginaadou la-gi-mouli i-lala do dumaalia gaa-hana-hua beelaa. Meenei Tagi go Yihowah, deenei dau hagababa dela ne-hai, do manawa humalia ga-madalia dogu hagadili gaa-hana-hua beelaa dono hagaodi ai.”