TpiKJPB - John - 14

14:1  ¶ No ken larim bel bilong yupela pilim wari. Yupela i bilip long God, bilip tu long mi.

14:2  Long haus bilong Papa bilong mi planti bikpela naispela haus i stap. Sapos em i no olsem, mi bin tokim yupela. Mi go bilong redim wanpela ples bilong yupela.

14:3  Na sapos mi go na redim wanpela ples bilong yupela, mi bai kam bek gen, na kisim yupela i kam long mi yet, inap long we mi stap, long dispela hap yupela tu i ken stap.

14:4  ¶ Na we mi go yupela i save, na rot yupela i save.

14:5  Tomas i tokim em, Bikpela, mipela i no save long yu go we. Na mipela i ken save long rot olsem wanem?

14:6  Jisas i tokim em, Mi stap rot, tok tru, na laip. I no gat man bai kam long Papa long narapela rot, long mi tasol.

14:7  Sapos yupela i bin save long mi, yupela i mas bin save long Papa bilong mi tu. Na i stat long nau i go yupela i save long em, na yupela i bin lukim em.

14:8  Filip i tokim em, Bikpela, soim Papa long mipela, na em bai inap long mipela.

14:9  Jisas i tokim em, Ating mi bin stap longpela taim olsem wantaim yu, na yet yu no bin save long mi, Filip? Em husat i bin lukim mi i bin lukim Papa. Na olsem wanem yu tok nau, Soim Papa long mipela?

14:10  Ating i yes long yu bilip long mi stap insait long Papa, na Papa i stap insait long mi? Ol dispela toktok mi tokim yu mi no toktok long tingting bilong mi yet. Tasol Papa husat i stap insait long mi, em i mekim ol wok.

14:11  Bilipim mi long mi stap insait long Papa, na Papa i stap insait long mi. O sapos nogat, bilipim mi long tingim ol dispela wok stret.

14:12  ¶ Tru tumas, tru tumas, mi tokim yupela, Em husat i bilip long mi, ol dispela wok mi mekim bai em i mekim tu. Na ol wok i bikpela moa long ol dispela bai em i mekim. Bilong wanem, mi go long Papa bilong mi.

14:13  Na wanem samting yupela bai askim long nem bilong mi, dispela bai mi mekim, inap long Papa i ken kisim glori insait long Pikinini Man.

14:14  Sapos yupela bai askim wanpela samting long nem bilong mi, mi bai mekim dispela.

14:15  ¶ Sapos yupela i laikim mi tru, bihainim ol tok strong bilong mi.

14:16  Na mi bai beten long Papa, na em bai givim yupela narapela Poroman, inap long em i ken stap wantaim yupela oltaim oltaim.

14:17  Yes, Spirit bilong tok tru, husat dispela graun i no inap kisim, bilong wanem, em i no lukim em, o save long em. Tasol yupela i save long em. Long wanem, em i stap wantaim yupela, na em bai stap insait long yupela.

14:18  ¶ Mi bai i no inap lusim yupela taim yupela i no gat bel isi. Mi bai kam long yupela.

14:19  Liklik taim tasol, na ol manmeri bilong dispela graun i no inap lukim mi moa. Tasol yupela bai lukim mi. Bikos mi stap laip, yupela bai stap laip tu.

14:20  Long dispela de yupela bai save long mi stap insait long Papa bilong mi, na yupela insait long mi, na mi insait long yupela.

14:21  Em husat i gat ol tok strong bilong mi, na bihainim ol, em i dispela man husat i laikim mi tru. Na em husat i laikim mi tru bai Papa bilong mi i laikim tru, na mi bai laikim em tru, na mi bai soim mi yet ples klia long em.

14:22  Judas i tokim em, i no Iskariot, Bikpela, em bai olsem wanem long yu bai soim yu yet ples klia long mipela, na i no long ol manmeri bilong dispela graun?

14:23  Jisas i bekim na tokim em, Sapos wanpela man i laikim mi tru, em bai bihainim ol toktok bilong mi. Na Papa bilong mi bai laikim em tru, na Mitupela bai kam long em, na mekim ples bilong Mitupela bilong stap wantaim em.

14:24  Em husat i no laikim mi tru i no bihainim ol toktok bilong mi. Na dispela tok yupela i harim em i no bilong mi, tasol em i bilong Papa husat i salim mi.

14:25  ¶ Ol dispela samting mi bin toktok long yupela, taim mi stap yet long pes bilong yupela.

14:26  Tasol Poroman, husat em i Holi Spirit, husat Papa bai salim long nem bilong mi, em bai skulim yupela long olgeta samting, na bringim olgeta samting i kam bek long tingting bilong yupela, wanem samting mi bin tokim yupela.

14:27  Bel isi mi lusim wantaim yupela, bel isi bilong mi mi givim long yupela. Mi no givim yupela olsem dispela graun i givim. No ken larim bel bilong yupela pilim wari, na tu no ken larim em i ken pret.

14:28  ¶ Yupela i bin harim long mi tokim yupela olsem wanem, Mi go, na mi bai kam gen long yupela. Sapos yupela i laikim mi tru, yupela bai wokim amamas tru, bilong wanem, mi tok, Mi go long Papa. Long wanem, Papa bilong mi i winim mi.

14:29  Na nau mi bin tokim yupela bipo em i kamap olsem, inap long, taim em i kamap olsem, yupela i ken bilip.

14:30  Bihain long nau mi bai i no inap toktok planti wantaim yupela. Long wanem, hetman bilong dispela graun i kam, na em i no gat wanpela samting insait long mi.

14:31  Tasol inap long ol manmeri bilong dispela graun i ken save long mi laikim tru Papa, na olsem Papa i givim tok strong long mi, yes, olsem tasol mi mekim. Kirap, yumi go long hap.