Azeri - Judges - 1

1:1  يوشَعئن اؤلوموندن سونرا، ائسرايئل اؤولادلاري ربدن سوروشدولار: "بئزئم اوچون کَنَعانليلارين ضئدّئنه دؤيوشه بئرئنجي کئملر چيخاجاق؟"

1:2  رب ددي: "يهودالي‌لار چيخاجاق، باخ، من اؤلکه‌ني اونلارا تسلئم اتمئشم."

1:3  يهودالي‌لار هموطنلري شَمعونلولارا ددئلر: "تورپاغين بئزه دوشَن حئصّه‌سئنه گلئن، کَنَعانلي‌لارين ضئدّئنه ووروشماق اوچون بئزئمله دؤيوشه چيخين؛ بئز ده تورپاغين سئزه دوشَن حئصّه‌سئنه گله‌رئک." بلجه شمعونلولار اونلارلا گتدئلر.

1:4  يهودالي‌لار دؤيوشه چيخديلار. رب کَنَعانلي‌لارلا پِرئزلی‌لري اونلارا تسلئم اتدي و يهودالي‌لار بازِقده اونلاردان اون مئن نفر آدامي قيرديلار.

1:5  بازِقده اَدوني بازِقي تاپيب اونونلا ووروشدولار و هم کَنَعانليلاري، هم ده پِرئزلی‌لري قيرديلار.

1:6  لاکئن اَدوني بازِق قاچدي. يهودالي‌لار اونون دالينجا گدئب اونو توتدولار و اَللرئنئن و آياقلارينين باش بارماقلاريني کسدئلر.

1:7  اَدوني بازِق ددي: "منئم مئزئمئن آلتيندا، يتمئش پادشاه اَل و آياقلارينين باش بارماقلاري کَسئلمئش حالدا چؤرک قيرينتي‌لاري ييغارديلار. من نجه اتمئشدئم، تاري دا منه عوضئني اِله ورئب." يهودالي‌لار اَدوني بازِقي اورشلئمه گتئردئلر و او اورادا اؤلدو.

1:8  يهودا اؤولادلاري اورشلئمه هوجوم ادئب ووروشدولار و اوراني آليب اهالئسئني قيلينجدان کچئرتدئلر. شهره ده اود ووروب يانديرديلار.

1:9  بوندان سونرا يهودا اؤولادلاري آشاغي اِندئلر کي، داغليق بؤلگه‌ده، نِگِبده و هامار بؤلگه‌ده ياشايان کَنَعانليلارلا ووروشسونلار.

1:10  بلجه يهودالي‌لار خِبروندا (اوّلکي آدي قئريات اَربَع ائدي) ياشايان کَنَعانليلارين ضئدّئنه يوروش ادئب، شئشا‌يي، اَخئماني و تَلمايي مغلوب اتدئلر.

1:11  اورادان دا دِبئر اهالئسئنئن ضئدّئنه يوروش اتدئلر کي، اوّلکي آدي قئريات سِفئر ائدي.

1:12  کالئب ددي: "کئم قئريات سِفئره هوجوم ادئب اوراني آلسا، قيزيم عَکسه‌ني اونا اَره وره‌جيم."

1:13  اوراني عوتنئ‌يِل آلدي کي، کالئبئن کئچئک قارداشي قِنازين اوغلو ائدي. کالئب قيزي عَکسه‌ني اونا اَره وردی.

1:14  قيز عوتنئ‌يِله اَره گدنده اَرئني قانديردي کي، اونون آتاسيندان بئر زمي ده ائسته‌سئن. قيز اِششَکدن دوشنده کالئب اونا ددي: "نه ائسته‌يئرسن؟"

1:15  عَکسه کالئبه ددي: "منه بئر ارمغان دا ور. ائندي کي، منه نِگِب تورپاغيني وردئن، سو قايناقلاريني دا ور." بلجه کالئب اونا يوخاريداکي و آشاغيداکي سو قايناقلاريني وردی.

1:16  موسانين قِنلي قايين‌آتاسينين نسلئندن اولانلار، يهودالي‌لارلا بئرلئکده خورما شهرئندن چيخيب عَرادين جنوبوندا اولان يهودا صحراسينا گتدئلر و او خالقين آراسيندا ساکئن اولدولار.

1:17  سونرا يهودالي‌لار هموطنلري شَمعونلولارلا بئرلئکده گدئب صِفَتده قالان کَنَعانليلاري قيرديلار و اوراني کامئل محو اتدئلر. اونا گؤره ده او شهرئن آدي حورما آدلانديريلدي.

1:18  يهودالي‌لار غَزّه‌ني و بوتون اراضئسئني، اَشقِلونو و بوتون اراضئسئني، عِقرونو و بوتون اراضئسئني آلديلار.

1:19  رب يهودالي‌لارلا ائدي. يهوداليلار داغليق بؤلگه‌سئني اَله کچئرتدئلر؛ لاکئن دره ساکئنلرئني قووا بئلمه‌دئلر، چونکي اونلارين دمئر دؤيوش عارابالاري وار ائدي.

1:20  موسانين ددئيي کئمي خِبرونو کالئبه وردئلر. او دا عناقين اوچ اوغلونو اورادان قوودو.

1:21  لاکئن بِنيامئن اؤولادلاري اورشلئمده قالان يِبوسلولاري قووماديلار؛ بونا گؤره ده يبوسلولار بو گونه قدر بِنيامئن اؤولادلاري ائله بئرلئکده اورشلئمده ياشاييرلار.

1:22  يوسئف نسلی ده بِيت ائله هوجوم اتدئلر و رب اونلارلا ائدي.

1:23  يوسئف نسلی بِيت ائله جاسوسلار گؤندردئلر. شهرئن اوّلکي آدي لوز ائدي.

1:24  جاسوسلار شهردن چيخان بئر آدامي گؤروب ددئلر: "شهرئن گئرئش يولونو بئزه گؤرسد، بئز ده سنئنله مهرئبان رفتار اده‌رئک."

1:25  بو آدام اونلارا شهره گئرمک اوچون يول گؤرستدي. اونلار دا شهر اهالئسئني قيلينجدان کچئرتدئلر، لاکئن بو آدامي قوحوملاري ائله آزاد بوراخديلار.

1:26  بو آدام خئتلی‌لرئن تورپاغينا گتدي و اورادا بئر شهر تئکئب آديني لوز قويدو کي، بو گونه قدر آدي بله‌دئر.

1:27  آمّا مِنَسّه قبئله‌سي بيِت شانلا قصبه‌لرئنئن اهالئسئني، تَعَنَکله قصبه‌لرئنئن اهالئسئني، دورلا قصبه‌لرئنئن اهالئسئني، يِبلِعاملا قصبه‌لرئنئن اهالئسئني و مِگئدّو ائله قصبه‌لرئنئن اهالئسئني قووماديلار. بلجه کَنَعانليلار بو اؤلکه‌ده ياشاماقدا داها قرارلي اولدولار.

1:28  ائسرايئللی‌لر بو تورپاقلاردا قودرتلَنَنده، کَنَعانليلاري زورلا ائش آلتينا باسديلار، آمّا کامئل قووماديلار.

1:29  اِفرايئم قبئله‌سي جازِرده اولان کَنَعانليلاري قوومادي. اونا گؤره ده کَنَعانليلار جازِرده، اونلارين آراسيندا ياشاديلار.

1:30  زِبولون قبئله‌سي قِطرون اهالئسئني و نَهلول اهالئسئني قوومادي. کَنَعانليلار دا اونلارين آراسيندا قاليب زور آلتيندا اونلارا نؤکرچئلئک اتدئلر.

1:31  آشِر قبئله‌سي عَکو اهالئسئني، صئدون، اَحلَب، اَکزئب، حَلَبه، عَفئق و رِحوب اهالئسئني قوومادي.

1:32  بلجه آشِرلئلر بو اؤلکه‌نئن ساکئنلري اولان کَنَعانليلار آراسيندا ياشاديلار؛ چونکي اونلاري قووماديلار.

1:33  نَفتالي قبئله‌سي بِيت شِمِش و بِيت عَنات اهالئسئني قووماييب بو اؤلکه‌نئن ساکئنلري اولان کَنَعانليلار آراسيندا ياشادي. بِيت شِمِش و بِيت عَنات اهالئسي اونلار اوچون زور آلتيندا نؤکرچئلئک اتدئلر.

1:34  اِمورلولار دان اؤولادلاريني وادار اتدئلر کي، داغليق بؤلگه‌سئنه کؤچسونلر و اونلاري دره‌يه دوشمه‌يه قويماديلار.

1:35  اِمورلولار حارِس داغيندا، اَيَلون و شَعلَبئمده قاليب اورادا ياشاماقدا قرارلي ائدئلر. آنجاق يوسئف نسلی قووّتلَنَنده، اِمورلولار اونلار اوچون زور آلتيندا نؤکرچئلئک اتدئلر.

1:36  اِمورلولارين سرحدي عَقره‌بئم کِچئدئندن، سالَعدن يوخارييا اوزانيردي.