SP - Leviticus - 15

15:1  וידבר יהוה אל משה ואל אהרן לאמר

15:2  דברו אל בני ישראל ואמרתם אליהם איש איש כי יהיה זב מבשרו זובו טמא הוא

15:3  וזאת תהיה טמאתו בזובו רר בשרו את זובו או החתים בשרו מזובו טמא הוא כל ימי זב בשרו או החתים בשרו מזובו טמאתו היא . . . . . . . . . . .

15:4  כל המשכב אשר ישכב עליו הזב יטמא וכל הכלי אשר ישב עליו יטמא

15:5  ואיש אשר יגע במשכבו יכבס בגדיו ורחץ במים וטמא עד הערב

15:6  והישב על הכלי אשר ישב עליו הזב יכבס בגדיו ורחץ במים וטמא עד הערב

15:7  והנגע בבשר הזב יכבס בגדיו ורחץ במים וטמא עד הערב

15:8  וכי ירק הזב בטהור יכבס בגדיו ורחץ במים וטמא עד הערב

15:9  וכל המרכב אשר ירכב עליו הזב יטמא

15:10  וכל הנגע בכל אשר יהיה תחתיו יטמא עד הערב והנשא אתם יכבס בגדיו ורחץ במים וטמא עד הערב

15:11  וכל אשר יגע בו הזב וידו לא שטף במים יכבס בגדיו ורחץ במים וטמא עד הערב

15:12  וכלי חרש אשר יגע בו הזב ישבר וכל כלי עץ ישטף במים

15:13  וכי יטהר הזב מזובו וספר לו שבעת ימים לטהרתו וכבס בגדיו ורחץ את בשרו במים חיים וטהר

15:14  וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן

15:15  ועשה אתם הכהן אחד חטאת ואחד עלה וכפר עליו הכהן לפני יהוה מזובו

15:16  ואיש כי תצא ממנו שכבת זרע ורחץ במים את כל בשרו וטמא עד הערב

15:17  וכל בגד וכל עור אשר יהיה עליו שכבת זרע וכבס במים וטמא עד הערב

15:18  ואשה אשר ישכב אישה אתה שכבת זרע ורחצו במים וטמאו עד הערב

15:19  ואשה כי תהיה זבה דם יהיה זובה בבשרה שבעת ימים תהיה בנדתה כל הנגע בה יטמא עד הערב

15:20  וכל אשר תשכב עליו בנדתה יטמא וכל אשר תשב עליו יטמא

15:21  וכל הנגע במשכבה יכבס בגדיו ורחץ במים וטמא עד הערב

15:22  וכל הנגע בכל הכלי אשר תשב עליו יכבס בגדיו ורחץ במים וטמא עד הערב

15:23  ואם על המשכבה היא או על הכלי אשר היא ישבת עליו בנגעו בו יטמא עד הערב

15:24  ואם שכב ישכב אישה אתה ותהי נדתה עליו יטמא שבעת ימים וכל המשכב אשר ישכב עליו יטמא

15:25  ואשה כי יזוב זוב דמה ימים רבים בלא עת נדתה או כי תזוב על נדתה כל ימי זוב טמאתה כימי נדתה תהיה טמאה היא

15:26  כל המשכב אשר תשכב עליו כל ימי זובה כמשכב נדתה יהיה לה וכל הכלי אשר תשב עליו טמא יהיה כטמאת נדתה

15:27  וכל הנגע בם יטמא וכבס בגדיו ורחץ במים וטמא עד הערב

15:28  ואם טהרה מזובה וספרה לה שבעת ימים ואחר תטהר

15:29  וביום השמיני תקח לה שתי תרים או שני בני יונה והביאה אתם אל הכהן אל פתח אהל מועד

15:30  ועשה הכהן את האחד חטאת ואת האחד עלה וכפר עליה הכהן לפני יהוה מזוב טמאתה

15:31  והזהרתם את בני ישראל מטמאתם ולא ימותו בטמאתם בטמאם את משכני אשר בתוכם

15:32  זאת תורת הזב ואשר תצא ממנו שכבת זרע לטמאה בה

15:33  והדוה בנדתה והזב את זובו לזכר ולנקבה ולאיש אשר ישכב עם טמאה