Kekchi - Psalms - 94

94:1  At nimajcual Dios, la̱at li nacatqˈuehoc re̱kaj li ma̱usilal li nequeˈxba̱nu li incˈaˈ useb xnaˈleb. Cˈutbesi la̱ joskˈil chiruheb.

94:2  Cˈutbesi taxak la̱ cuanquil nak tatrakok a̱tin saˈ xbe̱neb li tenamit. Chaqˈueheb taxak chixtojbal rix lix ma̱queb li nequeˈxkˈetkˈeti ribeb.

94:3  ¿Joˈ najtil chic teˈsahokˈ saˈ xchˈo̱leb li incˈaˈ useb xnaˈleb? At nimajcual Dios, ¿Ma toj yo̱keb chi sahokˈ saˈ xchˈo̱leb riqˈuin li cˈaˈru yo̱queb chixba̱nunquil?

94:4  ¿Joˈ najtil chic teˈxkˈetkˈeti ribeb li incˈaˈ useb xnaˈleb? ¿Joˈ najtil chic teˈxnimobresi ribeb riqˈuin li cˈaˈru nequeˈxye?

94:5  At nimajcual Dios, nequeˈnumta saˈ xbe̱neb la̱ tenamit ut nequeˈxrahobtesiheb la̱ cualal a̱cˈajol.

94:6  Nequeˈxcamsiheb li xma̱lcaˈan ut eb li ma̱ ani cuan reheb. Ut nequeˈxcamsiheb ajcuiˈ li jalaneb xtenamiteb li cuanqueb saˈ kanaˈaj.

94:7  Ut nequeˈxye: —Li Dios li nequeˈxlokˈoni li ralal xcˈajol laj Jacob incˈaˈ naril chi moco naxqˈue retal li cˈaˈru yo̱co chixba̱nunquil.—

94:8  Cheqˈuehak retal la̱ex li ma̱cˈaˈ e̱naˈleb, li cuanquex saˈ li katenamit. ¿Jokˈe te̱tau xya̱lal?

94:9  ¿Ma nequecˈoxla la̱ex nak li Dios incˈaˈ narabi li cˈaˈru nequeye? ¿Ma ma̱cuaˈ ta biˈ aˈan quiyi̱ban re li kaxic? ¿Ma nequecˈoxla la̱ex nak li Dios incˈaˈ naril li yo̱quex chixba̱nunquil? ¿Ma ma̱cuaˈ ta biˈ aˈan li quiyi̱ban re li xnakˈ ku?

94:10  ¿Ma ma̱cuaˈ ta biˈ li Dios nakˈusuc reheb li tenamit? ¿Ma incˈaˈ ta biˈ tixqˈue chixtojbal xma̱queb li incˈaˈ useb xnaˈleb? ¿Ma ma̱cuaˈ ta biˈ aˈan naqˈuehoc xnaˈlebeb li cristian? ¿Ma incˈaˈ ta biˈ tixnau chixjunil li cˈaˈru na-uxman?

94:11  Li Dios naxnau cˈaˈru nequeˈxcˈoxla eb li cristian. Naxnau nak yal ma̱cˈaˈ na-oc cuiˈ li nequeˈxcˈoxla li incˈaˈ useb xnaˈleb.

94:12  At Ka̱cuaˈ, us xak reheb li nequeˈxqˈue saˈ xchˈo̱leb lix kˈusbal nacaqˈue. Us xak reheb li nacacˈut li xya̱lal la̱ chakˈrab chiruheb.

94:13  La̱at ta̱tenkˈa eb aˈan re nak teˈxcuy xnumsinquil li raylal li ta̱cha̱lk saˈ xbe̱neb toj teˈqˈuehekˈ chixtojbal rix lix ma̱queb li incˈaˈ useb xnaˈleb.

94:14  Li Ka̱cuaˈ incˈaˈ tixtzˈekta̱naheb li ralal xcˈajol. Incˈaˈ tixcanabeb xjuneseb.

94:15  Ta̱cuulak xkˈehil nak eb laj rakol a̱tin teˈrakok cuiˈchic a̱tin saˈ ti̱quilal. Ut xban aˈan teˈsahokˈ saˈ xchˈo̱leb chixjunil li ti̱queb xchˈo̱l.

94:16  ¿Ani ta cuiˈ ta̱ru̱k ta̱colok cue chiruheb li incˈaˈ useb xnaˈleb? Ut, ¿ani ta̱oque̱nk chicuix chiruheb li nequeˈba̱nun ma̱usilal?

94:17  Cui ta li Ka̱cuaˈ incˈaˈ xinixtenkˈa, ac raj xincam saˈ rukˈeb.

94:18  Nak quinye: Incˈaˈ chic nincuy, at Ka̱cuaˈ, la̱at xina̱tenkˈa xban nak niquina̱ra.

94:19  Nak incˈaˈ chic nintau cˈaˈru tinba̱nu, la̱at nacacˈojob inchˈo̱l. La̱at nacaqˈue xsahil inchˈo̱l.

94:20  La̱at incˈaˈ ta̱cˈam a̱cuib saˈ usilal riqˈuineb laj rakol a̱tin li incˈaˈ nequeˈrakoc a̱tin saˈ ti̱quilal xban nak la̱at incˈaˈ nacuulac cha̱cuu lix naˈlebeb.

94:21  Nequeˈxye nak li ti̱queb xchˈo̱l cuanqueb xma̱c ut nequeˈxteneb ca̱mc saˈ xbe̱neb.

94:22  Li nimajcual Dios, aˈan li nacoloc cue. Li Dios, aˈan chanchan jun sako̱nac bar naru nincol cuiˈ cuib.

94:23  Li Ka̱cuaˈ tixqˈueheb chi sachecˈ ruheb li incˈaˈ useb xnaˈleb xban lix ma̱usilaleb. Li Ka̱cuaˈ li kaDios tixsukˈisi saˈ xbe̱neb lix ma̱usilaleb ut tixsacheb ru.