VulgHetzenauer - Sirach - 9

9:1  Non zeles mulierem sinus tui, ne ostendat super te malitiam doctrinæ nequam.

9:2  Non des mulieri potestatem animæ tuæ, ne ingrediatur in virtutem tuam, et confundaris.

9:3  Ne respicias mulierem multivolam: ne forte incidas in laqueos illius.

9:4  Cum saltatrice ne assiduus sis: nec audias illam, ne forte pereas in efficacia illius.

9:5  Virginem ne conspicias, ne forte scandalizeris in decore illius.

9:6  Ne des fornicariis animam tuam in ullo: ne perdas te, et hereditatem tuam.

9:7  Noli circumspicere in vicis civitatis, nec oberraveris in plateis illius.

9:8  Averte faciem tuam a muliere compta, et ne circumspicias speciem alienam.

9:9  propter speciem mulieris multi perierunt: et ex hoc concupiscentia quasi ignis exardescit.

9:10  Omnis mulier, quæ est fornicaria, quasi stercus in via conculcabitur.

9:11  Speciem mulieris alienæ multi admirati, reprobi facti sunt. colloquium enim illius quasi ignis exardescit.

9:12  Cum aliena muliere ne sedeas omnino, nec accumbas cum ea super cubitum:

9:13  et non alterceris cum illa in vino, ne forte declinet cor tuum in illam, et sanguine tuo labaris in perditionem.

9:14  Ne derelinquas amicum antiquum: novus enim non erit similis illi.

9:15  Vinum novum, amicus novus: veterascet, et cum suavitate bibes illud.

9:16  Non zeles gloriam, et opes peccatoris: non enim scis quæ futura sit illius subversio.

9:17  Non placeat tibi iniuria iniustorum, sciens quoniam usque ad inferos non placebit impius.

9:18  Longe abesto ab homine potestatem habente occidendi, et non suspicaberis timorem mortis.

9:19  et si accesseris ad illum, noli aliquid committere, ne forte auferat vitam tuam.

9:20  Communionem mortis scito: quoniam in medio laqueorum ingredieris, et super dolentium arma ambulabis.

9:21  Secundum virtutem tuam cave te a proximo tuo, et cum sapientibus et prudentibus tracta.

9:22  Viri iusti sint tibi convivæ, et in timore Dei sit tibi gloriatio,

9:23  et in sensu sit tibi cogitatus Dei, et omnis enarratio tua in præceptis Altissimi.

9:24  In manu artificum opera laudabuntur, et princeps populi in sapientia sermonis sui, in sensu vero seniorum verbum.

9:25  Terribilis est in civitate sua homo linguosus: et temerarius in verbo suo odibilis erit.