SPVar - Deuteronomy - 23

23:1  לא יקח איש את אשת אביו ולא יגלה כנף אביו

23:2  לא יבוא פצע דכה וכרות שפכת בקהל יהוה

23:3  לא יבוא ממזר בקהל יהוה גם דור עשירי לא יבוא לו בקהל יהוה

23:4  לא יבוא עמוני ומואבי בקהל יהוה גם דור עשירי לא יבוא להם בקהל יהוה עד עולם

23:5  על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור פתרה ארם נהרים לקללך

23:6  ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך

23:7  לא תדרש שלמם וטובתם כל ימיך לעלם

23:8  לא תתעב אדמי כי אחיך הוא ולא תתעב מצרי כי גר היית בארצו

23:9  בנים אשר יולדו להם דור שלישי יבוא להם בקהל יהוה

23:10  כי תצא מחנה על איביך ונשמרת מכל דבר רע

23:11  כי יהיה בך איש אשר לא יהיה טהור מקרי לילה ויצא מחוץ למחנה לא יבוא אל תוך המחנה

23:12  כי אם רחץ בשרו במים ובא השמש ואחרי כן יבוא אל המחנה

23:13  ויד יהיה לך מחוץ למחנה ויצאת שמה החוצה

23:14  ויתד תהיה לך על אזנך והיה בשבתך החוצה וחפרת בה ושבת וכסית את צאתך

23:15  כי יהוה אלהיך מתהלך בקרב מחנך להצילך ולתת איביך לפניך והיה מחנך קדוש ולא יראה בך ערות דבר ושב מאחריך

23:16  לא תסגיר עבד אל אדניו אשר ינצל אליך מעם אדניו

23:17  עמך ישב בקרבך במקום אשר יבחר באחת שעריך בטוב לו לא תוננו

23:18  לא תחיה קדשה מבנות ישראל ולא יחיה קדש מבני ישראל

23:19  לא תביא אתנן זונה ומחיר כלב בית יהוה אלהיך לכל נדר כי תועבת יהוה אלהיך גם שניהם

23:20  לא תשיך לאחיך נשך כסף נשך אכל נשך כל דבר אשר ישך

23:21  לנכרי תשיך ולאחיך לא תשיך למען יברכך יהוה אלהיך בכל משלח ידיך על הארץ אשר אתה בא שמה לרשתה

23:22  כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא

23:23  וכי תחדל לנדר לא יהיה בך הטא

23:24  מוצא שפתיך תשמר ועשית כאשר נדרת ליהוה נדבה אשר דברת בפיך

23:25  כי תבוא בכרם רעך ואכלת ענבים כנפשך שבעך ואל כליך לא תתן

23:26  כי תבוא בקמת רעך וקטפת מלילת בידך וחרמש לא תניף על קמת רעך