CSlElizabeth - II Maccabees - 1

1:1  Братии сущей во Египте Иудеом радоватися: братия иже во Иерусалиме Иудее и иже во стране Иудейстей, мира благаго:

1:2  и да благосотворит вам Бог и да помянет завет Свой иже ко Аврааму и Исааку и Иакову рабом Своим верным,

1:3  и да даст вам сердце всем во еже чествовати Его и творити хотения Его сердцем великим и душевным изволением,

1:4  и да отверзет сердца ваша в законе Своем и в повелениих, и мир да сотворит,

1:5  и да услышит молитвы вашя и умилится вам и не оставит вас во время лукаво.

1:6  И ныне зде есмы молящеся о вас.

1:7  Царствующу Димитрию лета сто шестьдесят девятаго, мы Иудее писахом вам в скорби и в горести нашедшей нам в летех сих, отнележе отступи Иасон и иже с ним от святыя земли и царства,

1:8  и пожгоша врата, и пролияша кровь неповинну: и молихомся Господеви, и услышани есмы, и принесохом жертву и семидал, и возжгохом светилники, и предложихом хлебы.

1:9  И ныне празднуйте дни скинопигии Хаслева месяца.

1:10  Лета сто осмьдесят осмаго, иже во Иерусалиме и иже во Иудеи, и старейшины и Иуда Аристовулу учителю Птоломеа царея сущему же от помазанных иереев рода, и сущым во Египте Иудеом, радоватися и здравствовати.

1:11  От великих бедств Богом спасени, вельми благодарим Ему, аки на царя ополчающиися.

1:12  Сей бо изведе ополчающихся на святый град:

1:13  в Персиду бо быв вождом, и при нем нестерпимая мнящаяся быти сила, посечени быша в капищи Нанеи, прельщения употребившым жерцем сущым при Нанеи.

1:14  Аки бо спребывати хотя ей, прииде на место Антиох и иже с ним друзи, взятия ради сребреников под именем вена:

1:15  и предложившым сия жерцем Нанеи, и оному вшедшу с малыми в притвор капища, заключивше капище,

1:16  егда вниде Антиох, отверзше свода сокровенную дверь, метающе камение побиша игемона и сущих с ним, и разделивше на уды и главы отсекше изметаша к сущым вне.

1:17  О всех благословен наш Бог, Иже предаде нечествовавших.

1:18  Хотяще убо праздновати двадесять пятаго дне месяца Хаслева очищение церкве, потребно непщевахом известити вам, да и вы празднуете день скинопигии и огня, егда Неемиа создав церковь и олтарь, принесе жертву.

1:19  Ибо егда в Персиду ведяхуся отцы наши, тогда жерцы боящиися Бога вземше от огня олтарнаго отай, скрыша во юдоль кладязя дно имеюща безводное, и в нем соблюдоша, яко всем неведому быти месту.

1:20  Преминувшым же летом многим, егда изволися Богу, посланный Неемиа от царя Персидскаго, внуки жерцев сокрывших посла на взыскание огня: и якоже поведаша нам, не обретоша огня, но воду густу,

1:21  повеле им черпати и принести: егда же принесена быша жертвенная, повеле жерцем Неемиа покропити водою дрова и лежащая на них.

1:22  Егда же бысть сие, и время прииде, егда солнце возсия прежде облачно сущо, возжжеся огнь велик, яко дивитися всем.

1:23  Молитву же творяху жерцы, егда горяще жертва, и жерцы и вси Ионафану начинающу, прочым же отвещающым, якоже Неемии.

1:24  Бе же молитва имеющи образ сей: Господи, Господи Боже, всех Творче, страшный и крепкий, и праведный и милостивый, единый Царю и благий,

1:25  единый дателю, едине праведне и Вседержителю и вечный, спасаяй Израиля от всякаго зла, сотворивый отцы избранны и освятивый их,

1:26  приими жертву за вся люди Твоя Израиля и сохрани часть Твою и освяти:

1:27  собери расточение наше, избави работающих языком, на уничижениых и мерзких призри, и да уведят языцы, яко Ты еси Бог наш:

1:28  показни насилующих и досаждающих в гордыни:

1:29  насади люди Твоя на месте святем Твоем, якоже рече Моисей.

1:30  Жерцы же пояху пения.

1:31  Егда же сгореша жертвенная, оставшею водою Неемиа повеле камение большее полити.

1:32  Егда же сие бысть, пламень возгореся, и от олтаря облиставшу свету, сгоре.

1:33  Егда же явлена бысть вещь, и возвещено бысть царю Персску, яко на месте, в немже огнь скрыша преселеннии жерцы, вода явися, отнележе Неемиа и сущии с ним очистиша жертвы,

1:34  оградив же царь свято сотвори (место то), искушаяй вещь.

1:35  И имже дароваше царь, многи дары взимаше и преподаяше.

1:36  Прозва же Неемиа и иже с ним место то Неффарь, еже сказуется очищение, нарицается же у многих Неффай.