CSlElizabeth - II Maccabees - 12

12:1  Содеянным же бывшым заветом сим, Лисиа убо отиде ко царю, Иудее же в земледелии упражняхуся.

12:2  От сущих же по местом воевод, Тимофей и Аполлоний сын Генеов, еще же Иероиим и Димофон, к сим же и Никанор Киприарх, не оставляху их благостояти и в покои быти.

12:3  Июппиане же толико сотвориша нечестие, умоливше Иудей с ними живущих внити во представленыя от них ладии с женами и чады, акибы ни единей вражде между ими настоящей:

12:4  на общее же уставление градское и сим соизволившым, яко мир имети хотящым и ничтоже подозрения имущым, отвезше их погрузиша, сущих не мнее дву сот.

12:5  Познав же Иуда бывшую на сродники своя жестокость, возвестив мужем иже с ним и призвав праведнаго судию Бога,

12:6  прииде на скверноубийц братий его, и пристанища нощию сожже, и ладии попали, избегших же от огня закла.

12:7  Стране же заключене бывшей отиде, яко паки приити имущь и все Июппиан искоренити гражданство.

12:8  Уразумев же, яко и во Амнии живущий хотят обитающым Иудеом темже образом сотворити,

12:9  и на Иамнитян нощию напад, зажже пристанище с кораблями яко явитися зарям огня во Иерусалиме, стадиям сущым двум стам четыредесяти.

12:10  Оттуду же отшедшым девять стадий, творящым путь на Тимофеа, сразишася с ним Аравлян множае пяти тысящ мужей и конник пять сот.

12:11  Бывшей же крепцей брани, и сущым при Иуде помощию Божиею преуспевающым, напольнии Аравляне одолени, прошаху от Иуды десницы себе, обещающе и пажить дати и во прочиих пользовати их.

12:12  Иуда же уразумев, яко истинно во многих они потребни, обеща мир содержати с ними: взявше же десницу, отидоша в кущы своя.

12:13  Нападе же и на некий град мостами тверд и стенами огражден, иже от всяких смешеных языков обитаемый, емуже имя Каспин.

12:14  Сущии же внутри надеющеся на крепость стен и на уготовление брашен, нерадиво пребываху, проклинающе сущих при Иуде, и ктому хуляще, и глаголюще, яже не подобает.

12:15  Сущии же со Иудою призвавше великаго Обладателя мира, Иже без овнов и механических орудий во времена Иисуса разруши Иерихон, нападоша зверообразно на стену.

12:16  И вземше град Божиею волею, безчисленна заклания сотвориша, яко прилежащему езеру, в широту имущему стадии две, текущею (убиенных) кровию исполнену явитися.

12:17  Оттуду же отшедше стадий седмь сот пятьдесят, приидоша в Харак, ко глаголемым Тувиином Иудеом.

12:18  И Тимофеа убо на местех не достигоша, ни едино дело совершивша от мест отшедша, оставльша же стражу в некоем месте зело тверду:

12:19  Досифей же и Сосипатр сущии от воевод, иже со Маккавеом, изшедше погубиша от Тимофеа оставших в твердыни более десяти тысящ мужей.

12:20  Маккавей же устроив воя своя по полком, постави их над полками, и на Тимофеа пойде имущаго с собою сто двадесять тысящ пешец, конник же две тысящы и пять сот.

12:21  Познав же Тимофей пришествие Иудино, посла жены и дети и прочая уготования в твердыню нарицаемую Карнию: бе бо непреборима и ко всходу неудобна ради тесноты всех мест.

12:22  Егда же полк Иудин первый явися, и бысть ужас на супостаты и страх от явления Всевидящаго бывшаго на них, в бегство устремишася един от другаго бежащь, яко множицею от своих повредишася и оружии своими прободахуся.

12:23  Творяше же Иуда гонение прилежно, убивая иноплеменников, и изби от них тридесять тысящ мужей.

12:24  Сам же Тимофей впад между сущих со Досифеем и Сосипатром, со многим ухищрением моляше, да жив отпустится: зане многих убо (от Иудей) родителей и некиих братию имеяше (у себе), и сим зло случится, аще умрет.

12:25  Егда же многими словесы вероятен сотвори обет, еже возвратити оных невредных, пустиша его ради спасения братии.

12:26  Изшед же (Маккавей) на Карнию и на Атаргатию, уби двадесять пять тысящ.

12:27  По победе же сих и погублении обрати Иуда воинство и на Ефрон, град твердый, в немже живяше Лисиа и множество разных язык: юноши же сильнии стояще пред стенами крепко противуратоваху, в немже беху орудия и стрел многое уготовление.

12:28  Призвавше же Всесильнаго с державою сокрушающаго ратных силы, взяша град под руку и убиша сущих внутрь двадесять пять тысящ:

12:29  и отшедше оттуду устремишася на Скифский град, отстоящь от Иерусалима стадий шесть сот.

12:30  Освидетелствовавшым же живущым тамо Иудеом о Скифских гражданех, яко имеют к ним благоприятство и во времена злополучная кротцы пребываху,

12:31  благодаривше им и умоливше, дабы и в прочее к роду их благоприятни были, приидоша во Иерусалим, дню великаго праздника седмиц настоящу.

12:32  По глаголемей же Пентикостии, идоша противу Горгиа стратига Идумейска.

12:33  Изыде же с пешцы треми тысящьми, и конник четыре ста,

12:34  и сотворшым брань, случися пасти малым от Иудей.

12:35  Досифей же некто от Вакинора, конный муж и крепок, ят Горгию, и взем его за хламиду, ведяше его крепко, и хотящь проклятаго взяти жива, некто от Фракийских конник нападе нань и рамо отсече, Горгиа же избеже во Марису.

12:36  Воином же Горгиевым на мнозе борющымся и утружденным бывшым, призвав Иуда Господа спомощника, да будет и воевода брани,

12:37  начат гласом отеческим с песньми вопль, возопив и нечаянне на воя Горгиевы напад, в бегство их обрати.

12:38  Иуда же собрав воя прииде во град Одоллам: и егда седмый день прмииде, по обычаю очистившеся в том месте субботу праздноваша.

12:39  На утрие же прииде со своими Иуда, да, якоже подобаше, телеса падших возмет и со сродниками положит во гробех отеческих.

12:40  Обретоша же у коегождо от умерших под ризами убиенных от даров идолских, яже во Иамнии, о нихже закон запрещаше Иудеом, всем же яве бысть, яко сея ради вины тии падоша.

12:41  Вси убо благословивше правый суд Господень, яко тайная сотвори явлена,

12:42  к молению обратишася моливше, да сотвореный грех весьма изгладится: добльственный же Иуда моляше людий, да сохранят себе от греха, очима видяще бывшая падших за грех.

12:43  И сотворив от мужей собрание утварей, яко две тысящы драхм сребра, посла во Иерусалим принести за грех (мертвых) жертву, предобре и благочестно творя, о воскресении помышляя.

12:44  Аще бо падшым востати не чаял бы, излишно было бы и всуе о мертвых молитися.

12:45  Ктому взирающь, яко во благочестии усопшым изряднейшая уготовася благодать: преподобное и благочестивое помышление: отонуду же за умерших моление сотвори, яко да от греха очистятся.