Vulgate - II Maccabees - 1

1:1  fratribus qui sunt per Aegyptum Iudaeis salutem dicunt fratres qui sunt in Hierosolymis Iudaei et qui in regione Iudaeae et pacem bonam

1:2  benefaciat vobis Deus et meminerit testamenti sui quod est ad Abraham et Isaac et Iacob servorum suorum fidelium

1:3  et det vobis cor omnibus ut colatis eum et faciatis eius voluntatem corde magno et animo volente

1:4  adaperiat cor vestrum in lege sua et in praeceptis eius et faciat pacem

1:5  exaudiat orationes vestras et reconcilietur vobis nec vos deserat in tempore malo

1:6  et nunc hic sumus orantes pro vobis

1:7  regnante Demetrio anno centesimo sexagesimo nono nos Iudaei scripsimus vobis in tribulatione et impetu qui supervenit nobis in istis annis ex quo recessit Iason a sancta terra et a regno

1:8  portam succenderunt et effuderunt sanguinem innocentem et oravimus ad Dominum et exauditi sumus et obtulimus sacrificium et similaginem et accendimus lucernas et proposuimus panes

1:9  et nunc frequentate dies scenophegiae mensis casleu

1:10  anno centesimo octogesimo octavo populus qui est Hierosolymis et in Iudaea senatusque et Iudas Aristobolo magistro Ptolomei regis qui est de genere christorum sacerdotum et his qui in Aegypto sunt Iudaeis salutem et sanitatem

1:11  de magnis periculis a Deo liberati magnifice gratias ipsi utpote qui adversus talem regem dimicavimus

1:12  ipse enim ebullire fecit de Perside eos qui pugnaverunt contra nos

1:13  nam cum in Perside esset dux ipse et cum ipso inmensus exercitus cecidit in templo Naneae consilio deceptus sacerdotis Naneae

1:14  ut enim cum ea habitaturus venit ad locum Antiochus et amici eius et ut acciperet pecunias multas dotis nomine

1:15  cumque proposuissent eas sacerdotes Naneae et ipse cum paucis ingressus esset intra ambitum fani clauserunt templum

1:16  cum intrasset Antiochus apertoque occulto aditu templi mittentes lapides percusserunt ducem et qui cum eo erant et diviserunt membratim et capitibus amputatis foras proiecerunt

1:17  per omnia benedictus Deus qui tradidit impios

1:18  facturi igitur quinta et vicesima mensis casleu purificationem templi necessarium duximus significare vobis ut vos quoque agatis diem scenophegiae et diem ignis qui datus est quando Neemias aedificato templo et altari obtulit sacrificia

1:19  nam cum in Persidem ducerentur patres nostri sacerdotes qui tunc Dei cultores erant acceptum ignem de altario occulte absconderunt in valle ubi erat puteus altus siccus et in eo contutati sunt eum ita ut omnibus ignotus esset locus

1:20  cum praeterissent autem multi anni et placuit Deo ut mitteretur Neemias a rege Persidis nepotes sacerdotum illorum qui absconderant misit ad requirendum ignem et sicut narraverunt nobis non invenerunt ignem sed aquam crassam

1:21  et iussit eos haurire et adferre sibi et sacrificia quae inposita erant iussit sacerdos Neemias aspargi aqua ipsa et ligna et quae erant superposita

1:22  utque hoc factum est et tempus adfuit quo sol refulsit qui prius erat in nubilo accensus est ignis magnus ita ut omnes mirarentur

1:23  orationem autem faciebant omnes sacerdotes dum consummaretur sacrificium Ionatha inchoante ceteris autem respondentibus

1:24  et Neemiae erat oratio hunc habens modum Domine Deus omnium creator terribilis et fortis iustus et misericors qui solus es rex bonus

1:25  solus praestans solus iustus et omnipotens et aeternus qui liberas Israhel de omni malo qui fecisti patres electos et sanctificasti eos

1:26  accipe sacrificium pro universo populo tuo Israhel et custodi partem tuam et sanctifica

1:27  congrega dispersionem nostram libera eos qui serviunt gentibus contemptos et abominatos respice ut sciant gentes quod tu es Deus noster

1:28  adflige opprimentes et contumeliam facientes in superbia

1:29  constitue populum tuum in loco sancto tuo sicut dixit Moses

1:30  sacerdotes autem psallebant hymnos usquequo consumptum esset sacrificium

1:31  cum autem consummatum fuisset sacrificium ex residua aqua Neemias iussit lapides maiores perfundi

1:32  quod ut factum est flamma ex eis accensa est sed ex lumine quod refulsit ab altari consumpta est

1:33  ut vero manifestata essent haec renuntiatum est regi Persarum quod in loco in quo ignem absconderant hii qui translati erant sacerdotes aqua apparuit de qua Neemias et qui cum eo erant purificaverunt sacrificia

1:34  considerans autem rex et rem diligenter examinans fecit ei templum

1:35  et si quibus donaverat rex multa bona accipiebat ex hoc et tribuebat

1:36  appellavit autem Neemias hoc Nepthar quod interpretatur purificatio vocatur autem apud plures Nephi