Esperanto - Job - 23

23:1  Ijob respondis kaj diris:

23:2  Eĉ hodiaŭ mia parolado restas maldolĉa; Mia suferado estas pli peza, ol miaj ĝemoj.

23:3  Ho, se mi scius, kiamaniere mi povas Lin trovi, Veni al Lia trono!

23:4  Mi prezentus al Li juĝan aferon, Kaj mian buŝon mi plenigus per argumentoj.

23:5  Mi ekscius la vortojn, kiujn Li respondus al mi; Mi komprenus, kion Li dirus al mi.

23:6  Ĉu en la grandeco de Sia forto Li luktus kontraŭ mi? Ne, Li nur atentu min;

23:7  Tiam pravulo procesus kun Li, Kaj mi liberiĝus por ĉiam de mia Juĝanto.

23:8  Sed jen mi iras antaŭen, kaj Li tie ne estas; Mi iras malantaŭen, kaj mi Lin ne rimarkas;

23:9  Se Li faras ion maldekstre, mi Lin ne trovas; Se Li kaŝas Sin dekstre, mi Lin ne vidas.

23:10  Sed mian vojon Li konas; Se Li min elprovos, mi eliros kiel oro.

23:11  Sur Lia irejo forte teniĝas mia piedo; Lian vojon mi konservis, kaj ne forkliniĝis.

23:12  Mi ne deturnas min de la ordonoj de Liaj lipoj; Pli ol mian propran leĝon mi konservis la dirojn de Lia buŝo.

23:13  Sed Li estas sola: kiu kontraŭstaros al Li? Kion Lia animo deziras, tion Li faras.

23:14  Kio estas destinita por mi, tion Li plenumos; Kaj Li havas multe da similaj aferoj.

23:15  Tial mi tremas antaŭ Lia vizaĝo, Mi primeditas, kaj mi timas Lin.

23:16  Dio senkuraĝigis mian koron, Kaj la Plejpotenculo min konfuzis.

23:17  Ĉar mi ne estas neniigita antaŭ la mallumo, Kaj antaŭ mia vizaĝo Li ne kovris la mallumon.