TpiKJPB - Judges - 8

8:1  ¶ Na ol man bilong Ifraim i tokim em, Bilong wanem yu bin mekim olsem long mipela, inap long yu no singautim mipela, taim yu go long pait wantaim ol lain Midian? Na ol i bin tok pait wantaim em nogut tru.

8:2  Na em i tokim ol, Mi bin mekim wanem nau taim yumi skelim wantaim yupela. Ating i yes long ol las hap kaikai bilong ol pikinini wain bilong Ifraim i winim nambawan hap pikinini wain bilong Abieser?

8:3  God i bin givim i go long han bilong yupela ol hetman bilong Midian, Orep na Seb. Na mi inap long mekim wanem samting taim yumi skelim wantaim samting bilong yupela? Nau belhat bilong ol long em i go daun, taim em i bin tok olsem.

8:4  ¶ Na Gidion i kam long Jordan, na go hapsait, em, na dispela 300 man husat i stap wantaim em, ol i hap i dai, tasol ol i ran bihainim ol.

8:5  Na em i tokim ol man Sukot, Givim, mi askim yupela plis, ol hap bret i kam long ol manmeri husat i bihainim mi. Long wanem, ol i hap i dai, na mi ran bihainim Seba na Salmuna, ol king bilong Midian.

8:6  Na ol hetman bilong Sukot i tok, Ating ol han bilong Seba na Salmuna i stap nau long han bilong yu, inap long mipela i ken givim bret i go long han bilong ami bilong yu?

8:7  Na Gidion i tok, Olsem na taim BIKPELA i bin givim pinis Seba na Salmuna i kam long han bilong mi, nau mi bai brukim mit bilong yupela wantaim ol nil bilong ples i no gat man na wantaim ol rop i gat nil.

8:8  Na em i go antap long dispela ples long Penyuel, na toktok long ol wankain olsem. Na ol man bilong Penyuel i bekim tok long em olsem ol man bilong Sukot i bin bekim tok long em.

8:9  Na em i tok tu long ol man bilong Penyuel, i spik, Taim mi kam gen wantaim bel isi, Mi bai brukim i go daun dispela taua.

8:10  Nau Seba na Salmuna i stap long Karkor, na ol ami bilong ol wantaim ol, klostu olsem 15,000 man, olgeta husat i stap yet bilong olgeta ol ami bilong ol pikinini bilong hap is. Long wanem, i gat 120,000 man i pundaun pin husat i save kamautim bainat.

8:11  Na Gidion i go antap long rot bilong ol husat i stap long ol haus sel long hap is bilong Noba na Jokbeha, na paitim dispela ami. Long wanem, dispela ami i stap gut tru.

8:12  Na taim Seba na Salmuna i ranawe, em i ran bihainim ol, na kisim tupela king bilong Midian, Seba na Salmuna, na bagarapim olgeta olgeta bilong ami.

8:13  Na Gidion, pikinini man bilong Joas, i kam bek long pait bipo long san i kam antap,

8:14  Na holimpas wanpela yangpela man bilong ol man Sukot, na askim long em. Na em i kolim long em lukluk bilong ol hetman bilong Sukot, na ol lapun hetman bilong en, yes, 77 man.

8:15  Na em i kamap long ol man bilong Sukot, na tok, Lukim Seba na Salmuna, wantaim husat yupela i bin givim sem long mi, i spik, Ating ol han bilong Seba na Salmuna i stap nau long han bilong yu, inap long mipela i ken givim bret long ol lain bilong yu husat i les tru?

8:16  Na em i kisim ol lapun hetman bilong biktaun, na ol nil bilong ples i no gat man na ol rop i gat nil, na wantaim ol em i skulim ol man bilong Sukot.

8:17  Na em paitim i go daun taua bilong Penyuel, na kilim i dai ol man bilong biktaun.

8:18  ¶ Nau em i tokim Seba na Salmuna, Ol man husat yupela kilim i dai long Tebor ol i wanem kain man? Na ol i bekim tok, Olsem yu stap, olsem tasol ol i stap. Olgeta wan wan i luk olsem ol pikinini bilong wanpela king.

8:19  Na em i tok, Ol i ol brata bilong mi, yes, ol pikinini man bilong mama bilong mi. Olsem BIKPELA i stap laip, sapos yupela i bin kisim bek ol i stap laip, mi no inap kilim yupela i dai.

8:20  Na em i tokim Jeter, namba wan pikinini bilong em, Kirap, na kilim ol i dai. Tasol manki i no kamautim bainat bilong em. Long wanem, em i pret, bilong wanem, em i yangpela yet.

8:21  Nau Seba na Salmuna i tok, Yu kirap, na pundaun antap long mipela. Long wanem, olsem man i stap, olsem tasol strong bilong em i stap. Na Gidion i kirap, na kilim i dai Seba na Salmuna, na tekewe ol dispela bilas i stap antap long ol nek bilong ol kemel bilong ol.

8:22  ¶ Nau ol man bilong Isrel i tokim Gidion, Yu bosim mipela, yu, pikinini man bilong yu, na pikinini man bilong pikinini man bilong yu tu wantaim. Long wanem, yu bin kisim bek mipela long han bilong Midian.

8:23  Na Gidion i tokim ol, Mi no inap bosim yupela, na tu pikinini man bilong mi bai i no inap bosim yupela. BIKPELA bai bosim yupela.

8:24  Na Gidion i tokim ol, Mi gat laik long wanpela askim long yupela, long yupela bai givim mi, olgeta wan wan man, ol ring bilong ia bilong ol prais bilong pait bilong em. (Long wanem, ol i bin kisim ol ring gol bilong ia, bilong wanem, ol i ol lain Ismael.)

8:25  Na ol i bekim tok, Mipela bai givim ol wantaim bel. Na ol opim wanpela klos, na ol i bin tromoi long en, olgeta wan wan man, ol ring bilong ia bilong prais bilong pait bilong em.

8:26  Na hevi bilong ol ring gol bilong ia, dispela em i askim long en, em i 1,700 sekel gol. Dispela i no kaunim ol bilas, na ol kola, na ol purpelpela klos, dispela i stap antap long ol king bilong Midian, na i no kaunim ol dispela sen i stap nabaut long ol nek bilong ol kemel bilong ol.

8:27  Na Gidion i wokim wanpela ifot long en, na putim dispela long biktaun bilong em, yes, long Ofra. Na olgeta Isrel i go long dispela hap long pamuk i bihainim dispela. Dispela samting i kamap wanpela trap long Gidion, na long hauslain bilong em.

8:28  Olsem tasol Midian i stap aninit long ai bilong ol pikinini bilong Isrel, inap long ol i no litimapim ol het bilong ol moa. Na dispela hap i stap isi 40 yia long ol de bilong Gidion.

8:29  ¶ Na Jerubeal, pikinini man bilong Joas, i go na stap long haus bilong em yet.

8:30  Na Gidion i gat 70 pikinini man i kamap long bodi bilong em. Long wanem, em i gat planti meri.

8:31  Na namba tu lain meri bilong em husat i stap long Sekem, em tu i karim wanpela pikinini man long em, husat nem bilong em em i kolim Abimelek.

8:32  Na Gidion, pikinini man bilong Joas, i dai pinis taim em i lapun tru, na ol i planim em long matmat bilong Joas, papa bilong em, long Ofra bilong ol lain Abieser.

8:33  Na em i kamap olsem, long taim stret long Gidion i dai pinis, long ol pikinini bilong Isrel i tanim gen, na go pamuk i bihainim Bealim, na mekim Beal-berit god bilong ol.

8:34  Na ol pikinini bilong Isrel i no holim tingting long BIKPELA, God bilong ol, husat i bin kisim bek ol ausait long ol han bilong ol birua bilong ol long olgeta wan wan sait.

8:35  Na tu ol i no soim gutpela pasin long hauslain bilong Jerubeal, em i olsem, Gidion, bilong bihainim olgeta gutpela pasin, dispela em i bin soim long Isrel.