LinVB - Judith - 16

16:1  Boyembela Nzambe wa ngai nzembo, bobete mbonda, boyembela Mokonzi na miziki mpe na migbala, bobongisela ye nzembo ya kotondo ye, bokumisa ye mpe bobondela nkombo ya ye.

16:2  Mokonzi azali Nzambe mosukisi bitumba, apiki nganda o kati ya bato ba ye, mpo ’te abikisa ngai o maboko ma banguna.

16:3  Ba-Asur bautaki o ngomba epai ya Nordi, bayaki na mampinga ma basoda nkoto na nkoto ; bakangaki mai ma miluka, mpe farasa ya bango itondaki o ngo­mba bipai binso.

16:4  Balayaki ’te bakotumba mokili mwa ngai, bakoboma bilenge ba ngai na mopanga, bakobwaka bana bake ba ngai o mabelé. Bakopesa bana ba ngai na nyama, mpe bakoteke bilenge basi ba ngai.

16:5  Kasi Mokonzi wa bokasi bonso apekisi bango, alendisi loboko la mwasi moko.

16:6  Bilenge bato bakweisi elombe ona te, bana ba Titan babeti ye te, bato balai babundi na ye te ; kasi Yudite, mwana wa Merari, alongi ye ; akweisi ye mpo ya bonzenga bwa elongi ya ye.

16:7  Alongolaki bilamba bya ye bya mpili mpo ya kolendisa bato ba Israel bazalaki na mawa. Apakolaki elongi ya ye malasi,

16:8  azingaki nsuki ya ye na ngabuni, alataki elamba ya motuya mpo ya kosenginya ye.

16:9  Mapapa ma ye mabendaki miso ma ye. Bonzenga bwa ye botambwisaki ye mayele ; bongo akati ye motó na mopanga.

16:10  Ba-Persi balengi mpo ya molende mwa ye, ba-Medi babulangani mpo ya bokasi bwa ye.

16:11  Babola ba ngai bagangi mpe banguna bayoki nsomo, awa bato batau babeleli, banguna bakomi kobanga, ntango batomboli mongongo, banguna bakimi.

16:12  Bana basi batau babomaki bango, batubolaki bango lokola basoda bakimi etumba, bakufaki o etumba ya Mokonzi wa ngai.

16:13  Nalingi koyembela Nzambe wa ngai nzembo ya sika. Mokonzi, ozali monene, oleki lokumu, ozali na nguya ya kokamwa, bakoki kolonga yo te.

16:14  Bikelamo binso bisalela yo ! Mpo ya liloba lya yo binso bisalemi, opemeli binso mpema, mpe binso bitongami, moto moko te akoki na liloba lya yo.

16:15  Ngomba ikoki kokweya mpo ya mbonge ya mai, mabanga makoki konyangwa lokola mafuta o miso ma yo, kasi baye babangi yo, okoyokela bango mawa.

16:16  Solo, libonza lya nsolo mpimbo lizali na ntina mpenza te ; se bongo, mafuta batumbeli yo bo libonza ; moto wa lokumu solo, se oyo akobangaka Mokonzi.

16:17  Mawa na bikolo bikobundisa ekolo ya ngai ! Mokonzi monene akokitisa bango o mokolo mwa likambo. Akotindela bango móto mpe nyama o misuni mpe bakolela mpo ya mpasi seko.

16:18  Ekomi bango penepene na Yeruzalem, banso bakumbameli Nzambe, bamipetoli, na nsima babonzeli Nza­mbe mabonza maye bapesi na motema mwa bango moko, mabonza ma bolei na makabo masusu.

16:19  Yudite abonzeli Nzambe biloko binso bya Oloferne, biye bato bapesaki ye, ela­mba eye ye moko akamataki o mbeto ya Oloferne, atikeli Nzambe yango seko.

16:20  Bato banso ba Yeruzalem basepeli pene na ndako esantu sanza isato mobimba. Yudite atikali na bango.

16:21  Nsima ya mikolo mina, banso bazongi o mboka ya bango. Yudite akei o Betulia kofanda o lopango la ye. Ntango azalaki na bomoi azalaki na lokumu lonene o ekolo ya ye mobimba.

16:22  Babali baike balingaki kobala ye, kasi ayebaki mobali moko te banda ntango mobali wa ye Manase akufa mpe akundama.

16:23  Awa ye akomi mobange bobele o lopango la mobali wa ye Manase, lokumu la ye lokoli naino. Akokisi mibu monkama na mitano. Apesi mosaleli mwasi wa ye bonsomi ; nsima awei o Betulia mpe bakundi ye o lilita liye bakundaki mobali wa ye Manase.

16:24  Ba-Israel basali lilaka mikolo nsambo. Liboso ’te akufa akaboli biloko bya ye binso na bandeko ba mobali wa ye Manase mpe na bandeko ba ye moko.

16:25  Moto moko atungisi ba-Israel lisusu te o ntango Yudite azalaki na bomoi mpe o eleko elai nsima ya liwa lya ye.