Kapingamarangi - Luke - 13

13:1  Di madagoaa deelaa, hunu gau nogo i-golo ga-helekai gi Jesus i digau Galilee ala ne-daaligi go Pilate i-di nadau madagoaa nogo hai nadau tigidaumaha ang-gi God.

13:2  Jesus ga-helekai, “Idimaa digau Galilee ala ne-daaligi beelaa, gei goodou e-hagabau bolo nadau huaidu le e-huaidu laa-hongo nia huaidu digau Galilee ala i-golo?

13:3  Gei deeai! Au e-hagi-adu gi goodou bolo maa goodou ga-hagalee huli gi-daha mo godou huaidu, goodou huogodoo le e-mmade be digaula.

13:4  E-hai behee go digau dilongoholu maa-walu nogo i Siloam ala ne-mmade i-di angulaa ne-hinga gi-hongo digaula? Goodou e-hagabau bolo digaula koia e-huaidu i-digau huogodoo ala i Jerusalem?

13:5  Gei deeai! Au e-helekai-adu bolo maa goodou hagalee huli gi-daha mo godou huaidu, gei goodou huogodoo le e-mmade gadoo be digaula.”

13:6  Jesus ga-helekai gi digaula i-di ala-kai deenei, “Taane dana laagau-‘fig’ e-tomo i-lodo dana gowaa dogi-waini. Mee e-haga-dinadina di ‘fig’ be di-maa guu-huwa, gei digi huwa.

13:7  Gei mee ga-helekai gi dana dangada hai-hadagee boloo, ‘Nia ngadau e-dolu nogo hani-hanimoi-iei au belee mmada be di-maa guu-huwa, gei au digi gidee nia huwa. Hele-ina di-maa gi-lala. Ma e-aha dela e-haga-hai-hegau balumee nia gelegele.’

13:8  Gei tangada hai-hadagee ga-helekai, ‘Meenei, dugua gii-hai dono ngadau e-dahi i-golo, gei au gaa-geli di gili di-maa, ga-haga-oho di-maa.

13:9  Hila-hua di laagau-‘fig’ deenei gaa-huwa humalia i-lodo di ngadau e-dahi, gei di-maa gu-humalia, maa ga-hagalee, gei goe gaa-hele-laa di-maa gi-lala.’ ”

13:10  Dahi Laangi-Sabad, gei Jesus nogo agoago i-lodo synagogee.

13:11  Di ahina i-golo iai di hagataalunga huaidu i ono lodo dela ne-hai a-mee gii-magi nia ngadau e-madangaholu maa-walu. Mee guu-biga gi-mua, gu-deemee di-duu donu gi-nua.

13:12  Di madagoaa Jesus ne-gidee-Ia, ga-gahi-mai a-mee, “Di ahina, goe gu-mehede gi-daha mo doo magi!”

13:13  Jesus gaa-dugu ono lima gi-hongo o mee. Di madagoaa-hua deelaa, di ahina deelaa gu-duu donu gi-nua mo di hagaamu a God.

13:14  Gei tagi synagogee gu-hagawelewele gi Jesus dela ne-haga-hili dana magi i-di Laangi-Sabad, ga-helekai gi-nia daangada, “Nia laangi e-ono ala e-ngalua-ai gidaadou, goodou hagahili-ina godou magi i-nia laangi aalaa, hagalee i-di Laangi-Sabad.”

13:15  Gei Tagi ga-helekai gi mee, “Goodou digau hai-hegau ngudu-golomada! Goodou e-hagamaahede godou kau mo godou ‘donkey’ i nadau lohongo, e-dagi gi-daha belee haga-inu i-di Laangi-Sabad.

13:16  Deenei la tangada ni di hagadili o Abraham dela nogo lawalawa go Setan i-nia ngadau e-madangaholu maa-walu. Mee hagalee belee hagamehede i-di Laangi-Sabad?”

13:17  Telekai a-Mee deenei la-gu-haga-langaadia ono hagadaumee, gei nia daangada dogologo le e-tenetene gi-nia mee haga-goboina huogodoo ala nogo hai go Mee.

13:18  Jesus ga-heeu, “Teenua King o God le e-hai be di-aha? Ma e-hagatau ko-Au gi-di-aha?

13:19  Ma e-hai beenei: Dahi daane ne-kae ana lii laagau-‘mustard’, gaa-dogi i dana gowaa. Di laagau gaa-tomo, ga-damana, gei nia manu gaa-hai nadau waehongo i-nia manga o di-maa.”

13:20  Jesus ga-heeu labelaa, “Au ga-hagatau Teenua King o God gi-di-aha?

13:21  Ma e-hai beenei: Di ahina ne-kae ana ‘yeast’, ga-unugi dana haga-munga palaawaa, gei di palaawaa la-gaa-tanga.”

13:22  Jesus guu-hana laa-lodo nia waahale llauehe mo lligi e-agoago i-dono ala adu gi Jerusalem.

13:23  Tangada ga-heeu gi Mee, “Meenei, ma digau hua dulii ala ga-mouli?” Jesus ga-helekai gi digaula,

13:24  “Heia godou mee ala e-mee gi-ulu goodou i-di bontai mada-giigi, idimaa, digau dogologo e-hagamahi bolo ginaadou e-ulu, gei e-deemee.

13:25  Di tagi o-di hale gaa-tai di bontai, gei goodou gaa-tuu i-malaelae ga-daamada ga-dugidugi di bontai mo di helekai boloo, ‘Meenei, hugea-mai di bontai gi gimaadou.’ Gei mee ga-helekai-adu gi goodou boloo, ‘Au e-de-iloo be goodou ne-lloomoi i-hee!’

13:26  Gei goodou ga-helekai boloo, ‘Gimaadou nogo miami, nogo inu madalia goe, gei goe nogo agoago i-di madau waahale!’

13:27  Gei mee ga-helekai labelaa, ‘Au e-de-iloo be goodou ne-lloomoi i-hee. Tuu-i-daha mo au, goodou huogodoo digau huaidu!’

13:28  Goodou ga-tangitangi ga-gadigadi godou niha i-di-godou madagoaa ma-gaa-mmada gi Abraham, Isaac mo Jacob, mo nia soukohp huogodoo i-lodo Teenua King o God, i-di madagoaa dela e-kili goodou gi-daha.

13:29  Nia daangada ga-lloo-ia i-dua ge e-lloo-aga i-dai, ga-lloomoi i-ngeia ge e-lloomoi i-ngaaga, gaa-noho gi-lala i tagamiami i-lodo Teenua King o God.

13:30  Gei digau ala mugi-muli dolomeenei gaa-hula laa-mua, gei digau ala e-mugi-mua dolomeenei gaa-hula laa-muli.”

13:31  Di madagoaa hua deelaa, hunu Pharisee ne-loomoi gi Jesus, ga-helekai gi Mee, “Hana gi-daha gi tuai gowaa, idimaa, Herod e-hiihai e-daaligi Goe.”

13:32  Gei Jesus ga-helekai gi digaula, “Hula, haga-iloo gi-di manu-‘fox’ deelaa, bolo Au e-hagabagi agu hagataalunga huaidu, gei e-hagahili agu magi dangi-nei mo daiaa, gei au gaa-lawa agu hegau i tolu laangi.

13:33  Au gaa-hana i dogu ala dangi-nei, daiaa mo dono daiaa. Ma hagalee donu bolo soukohp e-daaligi i tuai gowaa, dela-hua i Jerusalem.

13:34  “Jerusalem, Jerusalem! Goe gu-daaligi nia soukohp mo di dilidili digau kae-hegau a God ala ne-hagau-adu gi-di-goe. Nia holongo e-hia Au ne-hiihai di-holo ogu lima, e-daabui-mai goodou huogodoo, gadoo be teduu-ahina ma-ga-daabui-mai ana dama gi-lala ono bakau, gei goe digi dumaalia-mai gi-di-Au!

13:35  Gei dau Hale Daumaha la-ga-diiagi. Au e-haga-modongoohia-adu gi-di-goe, bolo goe ga-deemee di-mmada-mai gi-di-Au, gaa-dae-loo gi do madagoaa ma-ga-helekai boloo, ‘God gu-haga-maluagina Tangada dela ga-hanimoi i-di ingoo o Dimaadua.’ ”