Kapingamarangi - Luke - 19

19:1  Jesus ga-ulu-adu gi Jericho, gaa-hana laa-lodo di waahale.

19:2  Tagi hagabudu dagitedi i-golo, dono ingoo go Zacchaeus, tangada maluagina.

19:3  Mee e-hiihai gi-gidee-ia a Jesus, be Mee tangada e-hai behee. Gei Zacchaeus tama-dangada hua dulii e-deaadee di-mmada gi Jesus, idimaa digau dogologowaahee.

19:4  Gei mee gaa-lele gi-mua digau dogologo aalaa, gaa-gaga gi-tomo di laagau-‘sycamore’ bolo gi-gidee-ia Jesus dela ga-hanimoi-laa-laa.

19:5  Di madagoaa Jesus ne-dau i-golo, ge-Ia ga-mmada-aga gi-nua, ga-helekai, “Zacchaeus, hagalimalima, gaga-ia gi-lala, Au e-hai-loo gii-noho i doo hale dangi-nei.”

19:6  Zacchaeus ga-gaga-ia hagalimalima gi-lala, ga-haga-ulu a-Mee gi-lodo dono hale i-di tenetene huoloo.

19:7  Digau huogodoo ala ne-mmada gi-di mee deenei, ga-daamada ga-helehelekai-tamu, “Taane deenei gu-ulu gi-lodo di hale tangada huaidu!”

19:8  Zacchaeus ga-duu-i-nua ga-helekai gi Tagi, “Hagalongo meenei, au gaa-wanga di baahi ogu goloo gi digau hagaloale, hila-hua au gu-halahalau dagu dangada, gei au gaa-hui gi mee nnolongo e-haa gi-nonua.”

19:9  Gei Jesus ga-helekai, “Dangi-nei di haga-mouli guu-dau i-di hale deenei, i taane deenei hogi la tangada ni di madawaawa o Abraham.

19:10  Tama-Tangada ne-hanimoi belee halahala ge e-haga-mouli digau ala guu-nngala.”

19:11  Di madagoaa-hua digaula nogo hagalongo, gei Jesus gaa-kai labelaa dana ala-kai, idimaa, Mee gu-hoohoo-adu gi Jerusalem, gei digaula e-hagabau bolo Teenua King o God la-gu-hoohoo ga-gila-aga.

19:12  Gei Jesus ga-helekai, “Tangada aamua ne-hana gi tenua mogowaa belee hai di king. Nomuli, geia ga-hanimoi labelaa gi dono hale.

19:13  I-mua dono hagatanga, gei mee ga-gahi-mai ana gau hai-hegau dilongoholu, gaa-wanga ginai ana bahihadu-goolo dagidahi, ga-helekai boloo, ‘Goodou mmada be dehee di-godou hai e-haga-hai-hegau nia bahihadu aanei i dogu madagoaa ma-ga-de-igolo i godou baahi.’

19:14  Gei nia daangada donu o-maa gu-de-hiihai gi mee, gu-hagau nadau gau hai-hegau i-muli o mee, ga-helekai, ‘Gimaadou e-de-hiihai gi taane deenei e-hai di-madau king.’

19:15  “Taane deelaa la-gaa-hai di king, nomuli mee ga-hanimoi, ga-haga-iloo gi ana gau hai-hegau, bolo gi-lloomoi gi ono mua, e-hagadina nia bahihadu e-hia ne-wiini.

19:16  Tangada matagidagi ga-hanimoi ga-helekai boloo, ‘Agu bahihadu-goolo ne-kila-mai e-madangaholu mai i-di bahihadu e-dahi dela ne-gaamai kooe.’

19:17  Tangada aamua deelaa ga-helekai, ‘Gu-humalia, goe tangada hai-hegau humalia. Idimaa goe dela ne-hai-hegau huudonu i-nia mee lligi, au gaa-dugu goe e-dagi au waahale llauehe madangaholu.’

19:18  Togolua dangada hai-hegau ga-hanimoi, ga-helekai, ‘Meenei, au gu-kila-mai agu bahihadu-goolo e-lima mai i-di bahihadu e-dahi dela ne-gaamai kooe.’

19:19  Taane aamua ga-helekai gi tangada hai-hegau deenei, ‘Goe gaa-dagi au waahale llauehe e-lima.’

19:20  “Tangada hai-hegau labelaa i-golo ga-hanimoi, ga-helekai, ‘Meenei, deenei dau bahihadu. Au nogo dugu hagammuni di-maa i-lodo di angkadi.

19:21  Au nogo madagu i-di-goe, idimaa, goe tangada de-daawa i o waalanga. Goe e-kae nia mee ala hagalee ni-aau, gei e-hadi nia mee ala hagalee ni-aau ne-dogi.’

19:22  Taane aamua deelaa ga-helekai gi mee, ‘Goe tangada hai-hegau huaidu. Au ga-hagi-aga goe i au helekai, e-hagahuaidu goe. Goe e-iloo bolo au tangada de-daawa i ogu waalanga, e-kae nia mee ala hagalee nia mee ni-aagu, gei e-hagi nia mee hagalee ni-aagu ne-dogi.

19:23  Malaa, e-aha dela goe digi duguina agu bahihadu gi-lodo di bank? Gei-au gaa-kumi nia maa mo dono wiini i dogu hanimoi.’

19:24  “Gei taane aamua ga-helekai gi digau ala e-tuu i-golo, ‘Daawa di bahihadu-goolo dela i mee, wanga-ina gi tangada dela ana bahihadu-goolo e-madangaholu.’

19:25  Gei digaula ga-helekai gi mee, ‘Meenei, mee ana bahihadu-goolo e-madangaholu!’

19:26  Gei mee ga-helekai, ‘Au e-hagi-adu gi goodou bolo digau ala nadau mee i-golo, gei e-wanga labelaa ginai gii-logo gi-nonua. Gei digau ala nadau mee ai, nia mee hua dulii ala i nadau baahi, le e-daa gi-daha mo digaula.

19:27  Gei ogu hagadaumee ala e-de-hiihai bolo au e-hai di-nadau king, laha-mai digaula, daaligidia i ogu mua gii-mmade.’ ”

19:28  Muli Jesus ne-helekai nia mee aanei, gei Mee gaa-hana i-mua digaula gi Jerusalem.

19:29  Dono dau-hua gi Bethphage mo Bethany i-di Gonduu Olib, gei Mee ga-hagau ana dama-agoago dogolua gi-mua mo ana helekai boloo,

19:30  “Hula gi tama-waahale dela i gulu mua. Goolua ga-ulu gi-lodo, ga-gidee tama-‘donkey’ e-daula, gei digi hana-ai tangada nonua. Weedee, dagia-mai gi-kinei.

19:31  Maa tangada ga-heeu-adu be goolua e-wwede di-maa eimaha, gei goolua helekai boloo, ‘Di Tagi e-hiihai e-hai-hegau-ai di-maa.’ ”

19:32  Meemaa gaa-hula ga-gidee nia mee huogodoo ala nogo helekai-ai a Jesus.

19:33  Di madagoaa-hua meemaa e-wwede tama-‘donkey’, gei digau di-nadau manu, ga-heeu gi meemaa, “Goolua e-wwede di-maa eimaha?”

19:34  Meemaa ga-helekai, “Tagi e-hiihai e-hai-hegau i di-maa.”

19:35  Meemaa gaa-dagi tama-‘donkey’ gi Jesus, gaa-kili nau gahu gi-hongo di manu, ga-hagamaamaa a Jesus e-gaga gi-hongo di-maa.

19:36  Di gaga o Mee gaa-hana, gei nia daangada gaa-holo nadau gahu gi-hongo di ala.

19:37  Dono hoohoo gi Jerusalem, i-di gowaa dela iei di ala e-hana gi-lala i-di Gonduu Olib, ana dama-agoago huogodoo ga-daamada ga-dadaahili mo di haga-hagaamu a God i nadau lee moogo gi-nua i-nia mee haga-goboina huogodoo ala ne-mmada ginai ginaadou,

19:38  ga-wwolowwolo boloo, “God gi-haga-maluagina-ina di King dela e-hanimoi i-di ingoo o Dimaadua! Di aumaalia i-di langi, mo di madamada ang-gi God!”

19:39  Gei hunu Pharisee nogo i-lodo digau dogologo ga-helekai gi Jesus, “Tangada Agoago, helekai gi au dama-agoago bolo gii-noho dee-muu!”

19:40  Jesus ga-helekai, “Au e-hagi-adu gi goodou bolo maa digaula gaa-noho dee-muu, gei nia hadugalaa ga-daamada ga-wwolowwolo gi-nua-loo.”

19:41  Jesus ne-hoohoo-adu ga-gidee-Ia di waahale Jerusalem, ga-madatangi,

19:42  ga-helekai, “Maa nei-boloo goe ne-iloo dangi-nei be di-maa di-aha dela e-humalia gi-di noho i-di aumaalia! Gei goe e-de-gidee di-maa dolomeenei.

19:43  Di madagoaa ga-dau-mai, gei o hagadaumee ga-haganiga goe mo nadau mee abaaba, ga-duuli goe gi-lodo, ga-mmaanege-mai i-nia baahi huogodoo.

19:44  Digaula ga-oho goe hagatau mo digau ala i-lodo do abaaba, ga-deai di hadu e-dahi e-dubu ai, idimaa, goe digi modongoohia di madagoaa a God ne-hanimoi belee haga-dagaloaha goe gi-daha mo di made!”

19:45  Jesus ne-hana gi-lodo i-di Hale Daumaha, ga-hagabagi digau huihui-mee,

19:46  ga-helekai, “Ma-guu-hihi i-lodo di Beebaa-Dabu boloo, ‘Dogu Hale Daumaha la-di hale-dalodalo’, “gei goodou guu-hai di maa be ‘di gowaa pala hagammuni ni digau gaiaa!’ ”

19:47  Nia laangi huogodoo Jesus e-hai ana agoago i-lodo di Hale Daumaha. Gei nia dagi aamua hai-mee-dabu, digau haga-donudonu haganoho, mo nia dagi o nia daangada gu-hiihai belee daaligi a-Mee gii-made.

19:48  Gei digaula digi gida di-nadau hai belee daaligi a-Mee, idimaa, digau huogodoo e-hiihai e-hagalongo, ge hagalee hiihai e-diiagi telekai e-dahi i ana helekai.