Kapingamarangi - Luke - 12

12:1  Dogologowaahee ne-lloomoi gi-di gowaa e-dahi, gu-deeoo di-heehee. Jesus ga-helekai matagidagi gi ana dama-agoago, “Goodou hagaligaliga i-daha mo nia ‘yeast’ o nia Pharisee, aalaa go nia hegau ngudu-golomada digaula.

12:2  Nia mee ala guu-gahu gii-nngala, le e-huge-aga. Gei nia mee huogodoo ala gu-hagammuni, le e-haga-modongoohia gi-iloo.

12:3  Gei godou mee ala ne-helekai-ai i-lodo di bouli, la-ga-longono i-lodo di maalama. Gei godou mee ala ma-ga-helekai haga-moolee i-lodo di ruum tai, la-ga-longono mai i-nia dahuhu o nia hale.

12:4  “Au e-hagi-adu gi goodou, ogu ihoo hagaaloho, hudee mmaadagu i digau ala e-daaligi tuaidina, ga-nomuli ga-deemee di-hai di mee dela koia e-mada-huaidu.

12:5  Au ga-haga-modongoohia-adu gi goodou, be di-maa ko-ai belee madagu-ai. Madagu i-God, dela ono mogobuna e-hudu goe gi-lodo di ahi dee-odi, i-muli do daaligi gii-made. Au e-helekai-adu, goodou gi-mmaadagu i-Mee.

12:6  “Nia lomilomi e-lima le e-hui-hua gi-nia teenedi e-lua, gei God e-hagalee de-langahia dahi lomilomi.

12:7  Nia ngaahulu o godou libogo hogi la-guu-lawa di-dau. Deelaa-laa, hudee mmaadagu, goodou koia e-mada-hagalabagau laa-hongo nia lomilomi e-logo!

12:8  “Au e-hagi-adu gi goodou bolo digau ala e-haga-modongoohia ginaadou i-mua digau dogologo bolo ginaadou nia dama ni-aagu, gei Tama-Tangada e-haga-modongoohia-aga digaula labelaa i-mua digau di-langi a God.

12:9  Gei digau ala e-haga-de-iloo ginaadou Au i-mua digau dogologo, gei Tama-Tangada ga-haga-de-iloo digaula labelaa i-mua digau di-langi a God.

12:10  “Tangada dela ga-helekai hai-baahi gi Tama-Tangada le e-mee-hua di-dumaalia ginai, gei tangada dela ga-helekai hai-baahi gi-di Hagataalunga-Dabu, le e-deemee di-dumaalia ginai.

12:11  “Di madagoaa digaula gaa-lahi goodou e-gabunga i-lodo nia synagogee, be i-mua nia gobinaa mo nia dagi, goodou hudee mamaanadu e-logo be goodou ga-duuli goodou behee, be goodou ga-helekai bolo-aha.

12:12  Idimaa, di Hagataalunga-Dabu ga-aago-laa goodou i-di madagoaa deelaa, be goodou e-helekai bolo-aha.”

12:13  Taane i-lodo digau dogologo ga-helekai gi Jesus, “Tangada Agoago, helekai gi dogu duaahina gi-duwwaa i gimaua nia mee di-mau damana.”

12:14  Jesus ga-helekai, “Dogu ihoo hagaaloho, ma koai ne-gaamai gi-di-Au di tonu e-haga-donu goolua, be e-duwwe di maluagina i goolua?”

12:15  Gei Mee ga-helekai gi digaula huogodoo, “Gii-pula i goodou i-nia hagagailaa huogodoo, idimaa, di mouli hagatau o tangada la-hagalee go nia mee ala e-hai-mee ginai, eimaha hogi ma mee tangada maluagina behee.”

12:16  Jesus ga-helekai gi digaula di ala-kai deenei: “Tangada maluagina dana gowaa dela koia e-huwa nia huwa-laagau humalia.

12:17  Gei mee ga-hagabaubau boloo, ‘Dagu gowaa ai e-benebene agu huwa-laagau huogodoo. Au gaa-hai dagu-aha?’

12:18  Mee gaa-bida hagamaanadu boloo, ‘Deenei dagu hai gaa-hai: Au ga-oho gi-lala agu doogoo, gaa-hau gi-mada-llauehe gi-oo, e-dugu agu huwa-laagau huogodoo, mo ogu goloo ala i-golo.

12:19  Gei-au ga-hagamaanadu-mai gi-di-au boloo: Goe taane haadanga-lamalia, goe guu-hai au mee humalia huogodoo ala ga-hai-hegau-iei goe nia ngadau e-logo. Mouli haingoohia, miami, inu mo di tenetene adu gi-di-goe.’

12:20  Gei God ga-helekai gi mee, ‘Goe tangada dadaulia! Di boo-hua deenei gei goe ga-diiagi do mouli, gei di-maa koai dela ga-hai-mee gi-nia mee huogodoo nogo benebene kooe?’ ”

12:21  Jesus ga-helekai haga-muliagina, “Deenei di hai e-hai gi digau ala e-haga-bae nadau maluagina anga-hua gi ginaadou, gei digaula la-hagalee maluagina i-mua o God.”

12:22  Jesus ga-helekai gi ana dama-agoago, “Deelaa-laa Au e-helekai-adu bolo gi-hudee hei-e-goodou nia meegai ala e-hiihai ginai belee mouli-ai, be go nia goloo ala e-gahu-ai goodou.

12:23  Di mouli le e-mada-hagalabagau i-nia meegai, ge tuaidina le e-mada-hagalabagau i-nia goloo gahu.

12:24  Mmada gi-nia manu-mamaangi: digaula hagalee dogi nadau lii-laagau, be e-hadi taugai. Digaula nadau hale-dugu-mee ai, gei God e-haangai digaula! Goodou le e-mada-hagalabagau i-nia manu-mamaangi!

12:25  Ma tangada i goodou e-mee di-mouli mada-waalooloo i dana hagabaubau e-logo?

12:26  Maa goodou e-deemee di-hai di mee dulii-loo deenei, gei goodou e-hagabaubau e-logo i-nia mee ala i-golo eimaha?

12:27  Mmada gi-nia akai lodo-geinga ala e-tomo. Digaula hagalee ngalua e-gahu ginaadou. Gei-Au e-hagi-adu gi goodou bolo di King Solomon mo ono maluagina la-hagalee madamada i-tei akai aanei.

12:28  Go God dela e-haga-gahu nia geinga lodo-henua, nia geinga ala e-tomo dangi-nei, daiaa gu-hagalee, guu-dudu i-lodo di mee dudu geinga, malaa, Mee hagalee ga-haga-gahu labelaa goodou? Godou hagadonu le e-lligi!

12:29  “Goodou hudee manawa-gee i-nia madagoaa e-logo, be goodou gaa-gai be e-inu godou-aha.

12:30  Idimaa, digau e-noho i-lodo di bouli henuailala e-hagabaubau nia mee beenei. Di-godou Damana le e-iloo di-godou dee-dohu.

12:31  Gei goodou gi-haa-manawa-hua i dono Henua, gei Mee ga-hagahumalia goodou gi-nia mee aanei.

12:32  “Hudee mmaadagu dagu hagabuulinga-siibi dulii-nei, i-di godou Damana le e-manawa-tenetene di-gowadu gi goodou Teenua King o God.

12:33  Huia gi-daha godou mee huogodoo, wanga-ina nia bahihadu gi digau hagaloale. Heia godou mee-dugu-hadu hagalee mooho, mo di benebene godou maluagina i-di langi i-di gowaa dela hagalee ngudu-ai, idimaa, digau gaiaa e-kae nia maa ai, ge hagalee gai go manu.

12:34  Idimaa, di gowaa dela iai godou maluagina, deelaa di gowaa e-haa-manawa-ai goodou.

12:35  “Gi-togomaalia gi tei mee ga-hanimoi, gi-ulu i-nia goloo hai-hegau, ge godou malama gi-ula,

12:36  gadoo be digau hai-hegau e-tali nadau dagi e-hanimoi gi-muli i tagamiami haga-hai-lodo. Mee ga-hanimoi ga-dugidugi, gei digaula ga-hagalimalima gaa-huge di bontai gi mee.

12:37  E-maluagina go digau hai-hegau ala gaa-mmada ginai di-nadau dagi e-aala, gu-togomaalia gi dono hanimoi. Au e-hagi-adu gi goodou di tonu, mee ga-daa gi-daha dono gahu-mahaa, gaa-hai digaula gii-noho gi-lala, ga-ngalua gi digaula.

12:38  E-maluagina go digau ala ma-gaa-mmada ginai mee gu-togomaalia, ma e-aha maa mee ga-hanimoi i-di madahidi-waelua di boo, be no-muli!

12:39  Gei goodou guu-mee-hua di-iloo bolo maa tangada dono hale ga-iloo di madagoaa tangada gaiaa ga-hanimoi, gei mee hagalee hai a-mee gi-ulu gi-lodo dono hale.

12:40  Goodou gi-togomaalia labelaa, idimaa, Tama-Tangada le e-hanimoi i-di aawaa dela hagalee e-kana go goodou.”

12:41  Peter ga-helekai, “Meenei Tagi, di ala-kai deenei laa-mai gi gimaadou, be gi digau huogodoo?”

12:42  Gei Tagi ga-helekai, “Ma koai tangada hai-hegau manawa-dahi ge kabemee? Tangada beenei gaa-dugu go dono dagi e-dagi di hale mono hegau, ge e-wanga nia duhongo meegai gi digau hai-hegau i-di madagoaa e-tau-anga.

12:43  E-maluagina huoloo go tangada hai-hegau ma-gaa-mmada ginai dono dagi e-hai nia mee aanei i dono hanimoi gi dono hale!

12:44  Au e-hagi-adu gi goodou di tonu bolo tangada dono hale, la-gaa-dugu a mee e-dagi ono goloo huogodoo.

12:45  Maa tangada hai-hegau ga-maanadu bolo dono dagi le e-duai-nau ga-hanimoi-laa, gei mee ga-daamada ga-dadaaligi nia daane mono ahina huogodoo, geia ga-miami ga-inuinu gi-libaliba.

12:46  Dahi laangi hua di tagi ga-hanimoi, gei tangada hai-hegau deelaa e-hagalee talitali a-mee, e-de-iloo-ia di madagoaa dela e-hanimoi-iei mee. Di tagi ga-duuduu a-mee haga-ligiligi, gaa-hai a-mee gii-dau gi-di hagaduadua o digau de-hagalongo.

12:47  “Tangada hai-hegau dela e-iloo nia mee o dono dagi ala bolo gi-heia, geia hagalee hai nia maa, tangada deelaa le e-hagaduadua kono.

12:48  Gei tangada hai-hegau dela e-de-iloo nia mee o dono dagi ala bolo gi-heia, geia gu-hai-hala, tangada deelaa le e-hagaduadua maamaa. “Nia mee e-logo e-hai gii-hai go tangada dela ne-wanga ginai nia mee e-logo, gei nia mee e-mada-logo gi-nonua le e-hai gii-hai go tangada dela ne-wanga ginai nia mee mada-logo.

12:49  “Au ne-hanimoi belee dudu henuailala, gei dogu hiihai le e-hai bolo ma-gii-lawa di-gaa!

12:50  Au belee kae di babdais, gei Au gu-lodo huaidu huoloo gaa-dae-loo gi-di kae di-maa.

12:51  Goodou e-hagabau bolo Au ne-hanimoi belee gaamai di aumaalia gi henuailala? Deeai, hagalee di aumaalia, gei go di waewae.

12:52  Dangi-nei gaa-hana, gei digau o-di hale dogolima ga-dee-buni, dogodolu ga-hai-baahi gi dogolua, gei dogolua ga-hai-baahi gi dogodolu.

12:53  “Nia damana ga-hai-baahi ang-gi nadau dama-daane, gei nia dama-daane ang-gi nadau damana. Nia dinana ga-hai-baahi ang-gi nadau dama-ahina, gei nia dama-ahina ang-gi nadau dinana. Nia dinana dau-aga ga-hai-baahi ang-gi nadau dama-ahina dau-aga, gei nia dama-ahina dau-aga ga-hai-baahi ang-gi nadau dinana dau-aga.”

12:54  Jesus e-helekai labelaa gi-nia daangada, “Goodou ma-gaa-mmada gi-di gololangi e-hanaga i-dai, gei goodou ga-helekai bolo di uwa gaa-doo, gei di-maa gaa-doo.

12:55  Goodou ga-hagalongoia di madangi e-hanimoi i-ngaaga, gei goodou e-helekai bolo ma-ga-welengina, gei di-maa ga-welengina.

12:56  Goodou digau hai-hegau ngudu-golomada! Goodou e-iloo nia hagamodongoohia i-di gili di langi mo henuailala, malaa, goodou le e-aha ala e-de-iloo nia hagamodongoohia o-di madagoaa dolomeenei?

12:57  “Goodou e-aha ala e-hagalee halahala gii-donu goodou di hai di-mee dela e-hai donu?

12:58  Maa tangada ga-hai-baahi-adu gi-di-goe i nnaganoho, gaa-lahi goe gi-di gabunga, hagahumalia-ina gulu mehanga i-mua doo hana gi-di gabunga. Maa goe ga-hagalee hai beenei, mee gaa-dagi goe gi-mua tangada hai-gabunga, gaa-wanga goe gi tinggee, gaa-haa gi-lodo di hale-galabudi.

12:59  Au e-hagi-adu gi-di-goe bolo goe gaa-noho i-golo gaa-dae-loo gi-di madagoaa ma-gaa-hui do boibana gii-odi!”