Kapingamarangi - Luke - 2

2:1  Di madagoaa deelaa, gei di king Caesar Augustus ne-dugu dana haganoho bolo nia daangada huogodoo dono henua le e-hihi nadau ingoo.

2:2  Deenei di hihi-dangada matagidagi i-di madagoaa Quirinius nogo hai di gobinaa o Syria.

2:3  Digau huogodoo gu-haga-mmaanege gi nadau gowaa-donu, bolo gii-hihi nadau ingoo.

2:4  Joseph, tangada di hagadili o David, gu-hagatanga i-di waahale Nazareth i Galilee, gaa-hana gi Bethlehem, di waahale o David i-lodo Judea,

2:5  bolo gii-dau ia e-hihi ngaadahi mo Mary dela belee lodo gineia. Mary gu-hai-dama i-di madagoaa deelaa.

2:6  Di madagoaa meemaa e-noho i Bethlehem, gei Mary guu-dae gi dono madagoaa e-haanau-ai,

2:7  gei mee ga-haanau dana dama-daane madua, gaa-hii a-Mee gi-di gahu hii-dama, gaa-dugu gi-lodo di mee haangai-manu, idimaa, di hale noho-dangada la-gu-deeoo.

2:8  Digau hagaloohi-siibi nogo hagaloohi nadau siibi i-di boo i lodo henua.

2:9  Tangada di-langi Dimaadua ga-haga-gida ia gi digaula, gei di maahina o Dimaadua ga-ina digaula. Digaula gu-uli nadau gai huoloo.

2:10  Gei tangada di-langi ga-helekai gi digaula, “Goodou hudee mmaadagu, au e-gowadu gi goodou di Longo-Humalia e-haga-tenetene-ai digau huogodoo.

2:11  Idimaa, Tangada Hagamouli gu-haanau adu gi goodou boo-nei i-lodo di waahale o David. Mee go Christ go Tagi!

2:12  Deenei dono haga-modongoohia: Goodou ga-gidee di tama dulii e-hii gi-di gahu hii-dama e-moe i-lodo di mee haangai-manu.”

2:13  Di madagoaa-hua deelaa, digau di-langi dogologowaahee ga-lloomoi gi-baahi tangada di-langi deelaa, ga-haga-hagaamu a God, ga-daahili:

2:14  “Hagaamuina God i-di langi i-nua-loo, gei di aumaalia i henuailala ang-gi digau ala e-manawa-lamalia ginai Mee!”

2:15  Di madagoaa digau di-langi ne-hagatanga, gaa-hula gi-di langi, gei digau hagaloohi-siibi aalaa ga-helehelekai i nadau mehanga, “Gidaadou gaa-hula gi Bethlehem, gi-gidee-gidaadou di-mee dela ne-hai, dela ne-hagi-mai go Dimaadua.”

2:16  Digaula ga-limalima gaa-hula, ga-gidee Mary mo Joseph, mo tama dulii e-moe i-lodo di mee haangai-manu.

2:17  Digau hagaloohi-siibi ne-gidee-ginaadou di tama dulii deelaa, gei digaula ga-hagamodongoohia gi Joseph mo Mary nia helekai a tangada di-langi ala ne-hai ang-gi ginaadou i-di hai o tama dulii deelaa.

2:18  Digau huogodoo ala ne-longono nia helekai digau hagaloohi-siibi, la-gu-goboina huoloo.

2:19  Mary ga-langahia nia mee huogodoo, ga-mamaanadu-hua i ono lodo.

2:20  Digau hagaloohi-siibi gaa-hula gi-muli, e-dadaahili hagaamu a God i-nia mee huogodoo ala ne-longono ginaadou, gei guu-mmada ginai, guu-kila be nnelekai tangada di-langi ala ne-helekai-ai.

2:21  Muli nia laangi e-walu, gei di tama gu-sirkumsais, gei digaula gaa-gahi di ingoo o-Maa bolo Jesus, gii-hai be-di ingoo tangada di-langi dela ne-hagaingoo a-Mee i-mua, gei Mary digi hai-dama.

2:22  I-muli di-nau haga-madammaa be di hai Nnaganoho Moses, gei Joseph mo Mary gaa-lahi di tama gi Jerusalem belee hagadabu ang-gi Dimaadua,

2:23  gadoo be nnelekai ala ne-hihi i-lodo Nnaganoho Dimaadua, “Nia ulu-mmaadua daane huogodoo le e-hagadabu ang-gi Dimaadua.”

2:24  Gei meemaa guu-kae labelaa nau mee e-tigidaumaha gii-hai be-di mee dela gu-haganoho mai baahi Dimaadua, “Nia mwuroi e-lua be nia damaa-manu-‘pigeon’ e-lua.”

2:25  Di madagoaa deelaa, gei taane dono ingoo go Simeon e-noho i Jerusalem. Mee tangada hai-mee donu, ge e-hagalaamua a God, nogo talitali di haga-mouli o Israel, gei di Hagataalunga-Dabu gu-i dono baahi.

2:26  Di Hagataalunga-Dabu la-gu-haga-donu gi mee bolo mee hagalee made i-mua dono gidee-ia di Mesaia dela ne-hagababa go Dimaadua.

2:27  Go di Hagataalunga hua deelaa ne-dagi a-mee gi-di Hale Daumaha. Di madagoaa tamana mo tinana o Jesus ne-laha-mai a-Mee gi-lodo di Hale Daumaha gii-hai be nnelekai o Nnaganoho,

2:28  Simeon gaa-daa di tama, ga-daahi, ga-danggee ang-gi God boloo,

2:29  “Meenei Dimaadua, dolomeenei Goe gu-daahi dau hagababa, gei Goe guu-mee-hua di dugu-anga dau hege gii-hana i-di aumaalia.

2:30  Au guu-mmada donu gi ogu golomada gi dau haga-mouli,

2:31  dela gu-hagatogomaalia Kooe i-mua nia daangada huogodoo.

2:32  Di maalama e-haga-modongoohia do hiihai gi digau tuadimee, ge e-gaamai do madamada gi au dama Israel.”

2:33  Tamana mo tinana o tama gu-goboina i-nia helekai a Simeon ala nogo helekai i-Mee.

2:34  Simeon ga-haga-maluagina meemaa, ga-helekai gi Mary, go tinana o Tama, “Tama deenei ne-hilihili go God belee hagahuaidu gei e-haga-mouli digau dogologo o Israel. Mee gaa-hai di haga-modongoohia mai baahi o God dela ga-helekai hai-baahi ginai digau dogologo,

2:35  ga-haga-modongoohia-aga nadau maanadu hagammuni. Di manawa-gee le e-hai gadoo be tulumanu-dauwa ma-ga-daalo do hadu-manawa.”

2:36  Soukohp-ahina Anna, tama-ahina a Phanuel, tangada di madawaawa Asher nogo i-golo. Mee di ahina gu-madumadua, ne-hai dono lodo i-lodo nia ngadau e-hidu.

2:37  Muli di made dono lodo, gei mee nogo noho-hua dono dina. Mee gu-huowalu maa-haa-(84) ono ngadau, gei mee digi hagatanga gi-daha mo di Hale Daumaha. Boo mo aa, e-daumaha ang-gi God, e-noho hagaonge mo di hai-dalodalo.

2:38  Di aawaa-hua deelaa, gei mee gaa-dau, ga-danggee ang-gi God, mo di helekai i-di Tama ang-gi digau huogodoo ala e-tali gi God bolo gi-haga-mehede-ina Jerusalem.

2:39  Meemaa gaa-lawa-loo i-di nau hai nia hegau gii-hai be Nnaganoho Dimaadua, meemaa gaa-hula gi-muli gi Galilee gi di-nau guongo go Nazareth.

2:40  Di tama ne-madua-aga gu-maaloo, guu-honu i-di kabemee, gei tumaalia dehuia a God gu-madalia a-Mee.

2:41  Nia ngadau huogodoo nia maadua Jesus e-hulahula gi Tagamiami Pasoobaa i Jerusalem.

2:42  Jesus gu-madangaholu maa-lua ono ngadau, gei digaula gaa-hula gi Tagamiami deelaa, be nadau hai nogo hulahula.

2:43  I-muli Tagamiami ne-lawa, gei digaula gaa-hula gi nadau guongo, gei tama-daane go Jesus guu-noho-hua i Jerusalem, gei nia maadua o-Maa digi iloo.

2:44  Meemaa e-hagabau bolo Mee i-lodo digau dogologo ala e-hula, gei meemaa gaa-hula i-di laangi dogomaalia, ga-daamada ga-halahala a-Mee gi-baahi nau gau mo nau ihoo.

2:45  Meemaa digi gidee a-Mee, gaa-hula gi-muli gi Jerusalem, e-halahala a-Mee.

2:46  I-muli nia laangi e-dolu, meemaa ga-gidee a-Mee i-lodo di Hale Daumaha, e-noho i-baahi digau agoago o Jew, e-hagalongolongo gi-nia helekai digaula mo di heheeu ana mee.

2:47  Digau huogodoo ne-longono nia helekai kabemee a-Maa ne-helekai gi-nia heeu digaula, digaula gu-goboina huoloo.

2:48  Nia maadua o-Maa gu-goboina di-nau gidee a-Mee, gei tinana o-Maa ga-helekai, “Dagu dama-daane, ma di-aha ne-hai Kooe? Gimaua gu-uli mau gai i-di mau halahala Goe!”

2:49  Jesus ga-helekai, “Goolua e-halahala Au eiaha? Goolua e-de-iloo bolo Au belee hai-loo gii-noho i-lodo di hale o dogu Damana?”

2:50  Meemaa digi modongoohia nnelekai a-Maa.

2:51  Jesus gaa-hana i-muli meemaa gi Nazareth, di gowaa nogo hagalongo-iei Mee gi meemaa. Tinana o-Maa e-daahi hagahumalia nia mee huogodoo aanei i ono lodo.

2:52  Jesus gu-tomo-aga dono huaidina mo dono iloo-mee, gu-hiihai ginai a God mo nia daangada.