Kapingamarangi - Luke - 24

24:1  Hagaluada-loo di laangi-tabu, nia ahina ne-hula gi taalunga, e-kae nadau lolo-hagakala ala ne-hagatogomaalia.

24:2  Digaula gu-gidee bolo di hadu la-gu-haga-daga gi-daha mo di bongoo taalunga,

24:3  gei digaula ga-ulu-adu gi-lodo, digi gidee tuaidina Tagi Jesus.

24:4  Digaula gaa-tuu hua igolo gu-gologolo i-di mee dela ne-hai, i-di madagoaa-hua deelaa, nia daane dogolua e-gahu i-nia gahu maahina ge dabadaba, e-tuu i nadau baahi.

24:5  Nia ahina gu-mmaadagu huoloo, gaa-pala gi-lala-loo gi-hongo di gelegele, gei nia daane ga-helekai, “Goodou e-aha ala e-halahala tangada e-mouli gi-lodo digau guu-mmade?

24:6  Mee hagalee i-ginei, Mee gu-haga-mouli-aga. Goodou gi-langahia ana helekai ne-hai i Galilee boloo,

24:7  ‘Tama-Tangada le e-hai gii-wanga-loo gi digau huaidu, e-hai gi-daudau gi-di loobuu, i-muli nia laangi e-dolu, ga-mouli-aga.’ ”

24:8  Gei nia ahina ga-langahia nia helekai a-Maa,

24:9  gaa-hula ga-hagi-anga nia mee aanei huogodoo gi-nia dama-agoago dilongoholu maa-dahi a Jesus, mo digau ala i-golo.

24:10  Nia ahina aanei la-go Mary mai Magdala, Joanna, mo Mary tinana James. Digau aanei mo nia hoo digaula gu-hagi-anga gi digau agoago-hagau.

24:11  Gei digau agoago-hagau digi hagadonu nia helekai nia ahina aalaa, idimaa digaula e-hagamaanadu bolo nnelekai digaula la ono hadinga ai.

24:12  Gei Peter ga-duu-i-nua, gaa-lele gi taalunga, ga-bala gi-lala, gaa-mmada gi-lodo taalunga, ga-gidee-ia di gahu-daalunga, deai di mee labelaa i-dono baahi ai. Gei mee gaa-hana gi dono hale, gu-gologolo be ma di-aha dela ne-hai.

24:13  Di laangi-hua deelaa, gei nia daangada dogolua i digau ala nogo daudali a Jesus e-hula gi-di waahale Emmaus, holongo nia maele e-hidu mai Jerusalem.

24:14  Gei meemaa e-ngudungudu-kai i-nia mee ala ne-hai.

24:15  I-di-nau hula mo di ngudungudu-kai, gei Jesus ga-menege-adu ga-haele i-baahi meemaa.

24:16  Meemaa gaa-mmada gi Mee, gei digi modongoohia-ginaua a-Mee.

24:17  Jesus ga-helekai-adu gi meemaa, “Goolua e-helehelekai i di-aha, dela e-helehelekai mo di hula?” Gei meemaa gaa-tuu de-ngalungalua-loo mo nau golomada guu-mmada lodo-huaidu.

24:18  Tangada e-dahi i meemaa dono ingoo go Cleopas, ga-heeu gi Mee, “Goe tangada dogo hanimoi-hua madamada gi Jerusalem dela e-de-iloo nia mee ala ne-hai i-nia laangi dulii ala guu-too gi-daha?”

24:19  Jesus ga-heeu, “Nia mee aha?” Meemaa ga-helekai, “Go nia mee ala ne-hai gi Jesus o Nazareth. Tangada deenei la soukohp dela guu-dugu go God mo digau dogologowaahee, bolo Mee e-mogobuna i ana mee nogo helehelekai-ai mo ana mee ala nogo hai.

24:20  Tadau dagi hai-mee-dabu mo tadau dagi aamua guu-wanga a-Mee gi-di gabunga e-hagamodu e-daaligi gii-made, gei Mee gu-daudau i-di loobuu.

24:21  Gei gimaadou nogo noho hagadagadagagee bolo ma go Mee dela ga-haga-dagaloaha Israel! Gei dangi-nei la-go di tolu laangi i-muli di laangi ne-hai di mee deenei.

24:22  Hunu ahina o tadau hagabuulinga gu-haga-homouli gimaadou. Digaula ne-hula heniheni gi taalunga,

24:23  gei digaula digi gidee-ginaadou tuaidina o-Maa, ga-lloomoi-hua, ga-helekai bolo ginaadou guu-mmada gi nia daangada di-langi, ne-helekai ang-gi ginaadou, bolo Mee gu-mouli-aga.

24:24  Hunu gau i-di madau hagabuulinga guu-hula gi taalunga, gu-gidee-ginaadou nia mee huogodoo e-hai be nia helekai nia ahina, malaa digaula digi gidee-ginaadou a-Mee.”

24:25  Gei Jesus ga-helekai gi meemaa, “Goolua e-de-kabemee! E-buna huoloo di-gulu hagadonu nia mee huogodoo ala gu-helekai-ai nia soukohp!

24:26  Ma hagalee e-donu bolo di Mesaia le e-hai-loo gi-hagaduadua i-nia mee aanei, ga-ulu gi-lodo ono madamada?”

24:27  Gei Jesus ga-haga-donu gi meemaa nia mee ala ne-helekai i-de-Ia i-lodo nia helekai beebaa dabu huogodoo, e-daamada i Nnaganoho Moses mo nia Beebaa o nia Soukohp.

24:28  Digaula ga-hoohoo gi-di waahale dela e-hula ginai meemaa, gei Jesus gaa-hai be-di mee bolo Ia e-hana hua igolo.

24:29  Gei meemaa ga-helekai maaloo gi Mee bolo gii-noho hua i nau baahi ma-gu-hoohoo ga-bouli. Gei Mee guu-noho i-baahi meemaa.

24:30  Mee gaa-noho gi-lala i-baahi meemaa belee miami, ga-dahi-aga di palaawaa, ga-danggee ang-gi God, ga-ginigini di palaawaa, gaa-wanga gi meemaa.

24:31  Gei nau golomada gu-gidee, gu-modongoohia a Mee, gei Mee gu-haga-ngala e-Ia i meemaa.

24:32  Meemaa ga-helekai i nau mehanga, “Ma hagalee guu-hai be-di ahi nogo ulaula i tau lodo i-di madagoaa nogo helekai iei Mee i-hongo di ala, mo di haga-donu-mai nia helekai di Beebaa Dabu?”

24:33  Meemaa ga-tuu-i-nua, gaa-hula gi-muli gi Jerusalem, ga-gidee nia dama-agoago dilongoholu maa-dahi a Jesus la-gu-dagabuli mo nadau ihoo ala i-golo.

24:34  Digaula ga-helekai gi meemaa, “Tagi le e-donu-hua bolo gu-haga-mouli-aga! Mee gu-haga-gida gi Simon!”

24:35  Gei nia daangada dogolua aanei ga-haga-modongoohia gi digaula nia mee ala ne-hai i-hongo di ala, mo di-nau modongoohia-ginaua di Tagi i-di madagoaa Mee nogo ginigini dana palaawaa.

24:36  Di madagoaa-hua meemaa nogo helekai nia mee aanei, gei Tagi ga-gila-aga i nadau lodo, ga-helekai, “Di aumaalia gi-madalia goodou.”

24:37  Gei digaula gu-homouli nadau lodo, bolo ginaadou ne-mmada-hua gi-di ieidu.

24:38  Gei Mee ga-helekai, “Goodou e-homouli beleiaha? Ma e-aha nia manawa-logo e-kila-aga i-lodo godou hagamaanadu?

24:39  Mmada gi ogu lima mo ogu babaawae gi-modongoohia bolo ma ko-Au. Bili-mai gei goodou ga-iloo bolo ma ko-Au, idimaa, di ieidu la ono goneiga mo ono iwi ai, gei Au ogu goneiga mo ogu iwi i-golo.”

24:40  Mee ne-lawa di-helekai beenei, ga-haga-gida ono lima mo ono babaawae gi digaula.

24:41  Gei digaula digi hagadonu hua igolo, ginaadou gu-tenetene huoloo mo di goboina, gei Mee ga-heeu, “Godou meegai i-ginei?”

24:42  Digaula gaa-wanga di iga mmoo gi Mee,

24:43  ga-dahi-mai, gaa-gai i-mua digaula.

24:44  Mee ga-helekai, “Aanei nia mee dahidamee ala ne-hagi-adu ko-Au gi goodou i dogu madagoaa dela nogo i godou baahi: Nia mee huogodoo ala ne-hihi i-di-Au i-lodo Nnaganoho Moses mo nia Beebaa o nia Soukohp mono Pisalem ne-belee hai gii-kila.”

24:45  Gei Mee gaa-huge nadau libogo gi-iloo-ginaadou nia helekai di Beebaa-Dabu,

24:46  ga-helekai, “Deenei di hai ne-hihi nia mee aanei: di Mesaia le e-hai-loo gi-hagaduadua, ga-mouli-aga mai di made i-muli nia laangi e-dolu.

24:47  Di Longo-Humalia o-di maliu o-di manawa mo tumaalia gi-nia huaidu, le e-hai gi-agoago i dono ingoo ang-gi nia henua huogodoo, e-daamada i Jerusalem.

24:48  Goodou lago digau haga-modongoohia nia mee ala ne-mmada ginai goodou.

24:49  Ma ko-Au dela ga-hagau-adu gi goodou di mee dela ne-hagababa go dogu Damana. Goodou gi-taalia i-lodo di waahale deenei, gaa-dae-loo gi-nia mogobuna mai i-di langi ga-dugu-ia gi godou nua.”

24:50  Gei Mee gaa-dagi digaula gi-daha mo Jerusalem gaa-dau-adu gi Bethany, gei Mee ga-dahi-aga ono lima ga-haga-maluagina digaula.

24:51  Di madagoaa o-Mee ne-haga-maluagina digaula, Mee ga-hagatanga i-baahi digaula gaa-lahi gi-di langi.

24:52  Digaula ga-daumaha ang-gi Mee, gaa-hula gi-muli gi Jerusalem mo di tenetene huoloo,

24:53  gaa-noho-hua i-lodo di Hale Daumaha mo di hagahagaamu a God.