ABPGRK - Proverbs - 7

7:1  υιέ φύλασσε εμούς λόγους τας δε εμάς εντολάς κρύψον παρά σεαυτώ

7:2  υιέ τίμα τον κύριον και ισχύσεις πλην δε αυτού μη φοβού άλλον φύλαξον εμάς εντολάς και βιώσεις τους δε εμούς λόγους ώσπερ κόρας ομμάτων

7:3  περίθου αυτούς σοις δακτύλοις επίγραψον δε επί το πλάτος της καρδίας σου

7:4  είπον την σοφίαν σην αδελφήν είναι την δε φρόνησιν γνώριμον περιποίησαι σεαυτώ

7:5  ίνα σε τηρήση από γυναικός αλλοτρίας και πονηράς εάν σε λόγοις τοις προς χάριν εμβάλληται

7:6  από γαρ θυρίδος εκ του οίκου αυτής εις τας πλατείας παρακύπτουσα

7:7  ον αν ίδη των αφρόνων τέκνων νεανίαν ενδεή φρενών

7:8  παραπορευόμενον εν γωνία εν διόδοις οίκων αυτής λαλούντα

7:9  εν σκότει εσπερινώ ηνίκα αν ησυχία νυκτερινή η και γνοφώδης

7:10  η δε γυνή συναντά αυτώ είδος έχουσα πορνικόν η ποιεί νέων εξίπτασθαι καρδίας

7:11  ανεπτερωμένη δε εστι και άσωτος εν οίκω δε ουχ ησυχάζουσιν οι πόδες αυτής

7:12  χρόνον γαρ τινα έξω ρέμβεται χρόνον δε εν πλατείαις παρά πάσαν γωνίαν ενεδρεύει

7:13  είτα επιλαβομένη εφίλησεν αυτόν αναιδεί δε προσώπω προσείπεν αυτώ

7:14  θυσία ειρηνική μοι εστί σήμερον αποδίδωμι τας ευχάς μου

7:15  ένεκα τούτου εξήλθον εις συνάντησίν σου ποθούσα το σον πρόσωπον εύρηκά σε

7:16  κειρίαις τέτακα την κλίνην μου αμφιτάποις διέστρωσα τοις απ΄ Αιγύπτου

7:17  διέρραγκα την κοίτην μου κρόκω τον δε οίκόν μου κινναμώμω

7:18  ελθέ και απολαύσωμεν φιλίας έως όρθρου δεύρο και εγκυλισθώμεν έρωτι

7:19  ου γαρ πάρεστιν ο ανήρ μου εν οίκω πεπόρευται οδόν μακράν

7:20  ένδεσμον αργυρίου λαβών εν χερσίν αυτού δι΄ ημερών πολλών επανήξει εις τον οίκον αυτού

7:21  απεπλάνησε δε αυτόν πολλή ομιλία βρόχοις τε τοις από χειλέων εξώκειλεν αυτόν

7:22  ο δε επηκολούθησεν αυτή κεπφωθείς ωσπερ δε βους επί σφαγήν άγεται και ώσπερ κύων επί δεσμούς και ως έλαφος τοξεύματι

7:23  πεπληγώς εις το ήπαρ σπεύδει δε ώσπερ όρνεον εις παγίδα ουκ ειδώς ότι περί ψυχής τρέχει

7:24  νυν ουν υιέ άκουέ μου και πρόσεχε ρήμασι στόματός μου

7:25  μη εκκλινάτω εις τας οδούς αυτής η καρδία σου και μη πλανηθής εν ατραποίς αυτής

7:26  πολλούς γαρ τρώσασα καταβέβληκε και αναρίθμητοί εισιν ους πεφόνευκεν

7:27  οδοί άδου ο οίκος αυτής κατάγουσαι εις τα ταμιεία του θανάτου