ABPGRK - Proverbs - 12

12:1  ο αγαπών παιδείαν αγαπά αίσθησιν ο δε μισών ελέγχους άφρων

12:2  κρείσσων ο ευρών χάριν παρά κυρίω ανήρ δε παράνομος παρασιωπηθήσεται

12:3  ου κατορθώσει άνθρωπος εξ ανόμου αι δε ρίζαι των δικαίων ουκ εξαρθήσονται

12:4  γυνή ανδρεία στέφανος τω ανδρί αυτής ώσπερ δε εν ξύλω σκώληξ ούτως άνδρα απόλλυσι γυνή κακοποιός

12:5  λογισμοί δικαίων κρίματα κυβερνώσι δε ασεβείς δόλους

12:6  λόγοι ασεβών δόλιοι εις αίμα στόμα δε ορθών ρύσεται αυτούς

12:7  ου εάν στραφή ο ασεβής αφανίζεται οίκοι δε δικαίων παραμενούσι

12:8  στόμα συνετού εγκωμιάζεται υπό ανδρός νωθροκάρδιος δε μυκτηρίζεται

12:9  κρείσσων ανήρ εν ατιμία δουλεύων εαυτώ η τιμήν εαυτώ περιτιθείς και προσδεόμενος άρτου

12:10  δίκαιος οικτείρει ψυχάς κτηνών αυτού τα δε σπλάγχνα των ασεβών ανελεήμονα

12:11  ο εργαζόμενος την εαυτού γην εμπλησθήσεται άρτων οι δε διώκοντες μάταια ενδεείς φρενών ος εστιν ηδύς εν οίνων διατριβαίς εν τοις εαυτού οχυρώμασι καταλείψει ατιμίαν

12:12  επιθυμίαι ασεβών κακαί αι δε ρίζαι των ευσεβών εν οχυρώμασι

12:13  διά αμαρτίαν χειλέων εμπίπτει εις παγίδας αμαρτωλός εκφεύγει δε εξ αυτών δίκαιος

12:14  από καρπών στόματος ψυχή ανδρός πλησθήσεται αγαθών ανταπόδομα δε χειλέων αυτού αποδοθήσεται αυτώ

12:15  οδοί αφρόνων ορθαί ενώπιον αυτών εισακούει δε συμβουλίας σοφός

12:16  άφρων αυθήμερον εξαγγέλλει οργήν αυτού κρύπτει δε την εαυτού ατιμίαν πανούργος

12:17  επιδεικνυμένην πίστιν απαγγέλλει δίκαιος ο δε μάρτυς των αδίκων δόλιος

12:18  εισίν οι λέγοντες τιτρώσκουσιν ως μάχαιρα γλώσσαι δε σοφών ιώνται

12:19  χείλη αληθινά κατορθοί μαρτυρίαν μάρτυς δε ταχύς γλώσσαν έχει άδικον

12:20  δόλος εν καρδία τεκταινομένου κακά οι δε βουλόμενοι ειρήνην ευφρανθήσονται

12:21  ουκ αρέσει τω δικαίω ουδέν άδικον οι δε ασεβείς πλησθήσονται κακών

12:22  βδέλυγμα κυρίω χείλη ψευδή ο δε ποιών πίστεις δεκτός παρ΄ αυτώ

12:23  ανήρ συνετός θρόνος αισθήσεως καρδία δε αφρόνων συναντήσεται αραίς

12:24  χειρ εκλεκτών κρατήσει ευχερώς δόλιοι δε έσονται εις προνομήν

12:25  φοβερός λόγος καρδίαν ταράσσει ανδρός αγγελία δε αγαθή ευφραίνει αυτόν

12:26  επιγνώμων δίκαιος εαυτού φίλος έσται αμαρτάνοντας δε καταδιώξεται κακά η δε οδός των ασεβών πλανήσει αυτούς

12:27  ουκ επιτεύξεται δόλιος θήρας κτήμα δε τίμιον ανήρ καθαρός

12:28  εν οδοίς δικαιοσύνης ζωή οδοί δε μνησικάκων εις θάνατον