CopSahBible2 - Sirach - 2

2:1  ϩⲙϩⲁⲗ ⲙⲡϫⲟⲉⲓⲥ ⲥⲃⲧⲉⲧⲉⲕⲯⲩⲭⲏ ⲉⲩⲡⲓⲣⲁⲥⲙⲟⲥ

2:2  ⲥⲟⲩⲧⲛⲡⲉⲕϩⲏⲧ ⲁⲩⲱ ⲛⲅϥⲓ ⲉⲣⲟⲕ ⲛⲅⲧⲙϭⲉⲡϭⲡ ϩⲙ ⲡⲉⲟⲩⲟⲉⲓϣ ⲙⲡⲉⲕϩⲓⲥⲉ

2:3  ⲧⲟϭⲕ ⲉⲣⲟϥ ⲛⲅⲧⲙⲥⲁϩⲱⲕ ⲉⲃⲟⲗ ⲙⲙⲟϥ ϫⲉ ⲉⲕⲉⲁⲩⲝⲁⲛⲉ ϩⲛ ⲧⲉⲕϩⲁⲏ

2:4  ϩⲱⲃ ⲛⲓⲙ ⲉⲧⲛⲛⲏⲩ ⲉϫⲱⲕ ϣⲟⲡϥ ⲉⲣⲟⲕ ⲛⲅⲣϩⲁⲣϣϩⲏⲧ ϩⲙ ⲡⲉⲙⲕⲁϩ ⲙⲡⲉⲕⲑⲃⲃⲓⲟ

2:5  ϫⲉ ⲉϣⲁⲩⲇⲟⲕⲓⲙⲁⲍⲉ ⲙⲡⲛⲟⲩⲃ ϩⲙ ⲡⲕⲱϩⲧ ⲛⲥⲱⲧⲡ ϩⲱⲟⲩ ⲛⲣⲱⲙⲉ ϩⲛ ⲟⲩϩⲣⲱ ⲛⲑⲃⲃⲓⲟ

2:6  ⲡⲓⲥⲧⲉⲩⲉ ⲉⲣⲟϥ ⲁⲩⲱ ϥⲛⲁϣⲟⲡⲕ ⲉⲣⲟϥ ⲛⲅⲥⲟⲟⲩⲧⲛ ⲛⲛⲉⲕϩⲓⲟⲟⲩⲉ ⲛⲅϩⲉⲗⲡⲓⲍⲉ ⲉⲣⲟϥ

2:7  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϭⲱϣⲧ ⲉⲃⲟⲗ ϩⲏⲧϥ ⲙⲡⲉϥⲛⲁ ⲙⲡⲣⲣⲓⲕⲉ ϫⲛⲛⲉⲕϩⲉ

2:8  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲡⲓⲥ[ⲧⲉⲩⲉ] ⲉⲣⲟ[ϥ] ⲁⲩⲱ ⲛⲉⲡⲉⲧⲛⲃⲉⲕⲉ ϩⲉ ⲉⲃⲟⲗ

2:9  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϩⲉⲗⲡⲓⲍⲉ ⲉⲛⲉⲡⲁⲅⲁⲑⲟⲛ ⲁⲩⲱ ⲟⲩⲟⲩⲛⲟϥ ϣⲁⲉⲛⲉϩ ⲙⲛ ⲟⲩⲛⲁ

2:10  [ϭ]ⲱϣⲧ ⲛⲁⲩ ⲛⲓⲙ ⲡⲓⲥⲧⲉ[ⲩⲉ] ⲏ ⲛⲓⲙ ⲡⲉⲛⲧⲁϥϭⲱ ϩⲛ ⲛⲉϥⲉⲛⲧⲟ[ⲗⲏ] ⲁϥⲕⲁⲁϥ ⲛⲥⲱϥ ⲏ ⲛⲓⲙ ⲡⲉⲛⲧⲁϥⲱϣ ⲉϩⲣⲁⲓ ⲉⲣⲟϥ ⲁϥⲟⲃϣϥ ⲉⲣⲟϥ

2:11  ϫⲉ ⲟⲩϣⲁⲛϩⲧⲏϥ ⲛⲛⲁⲏⲧ ⲡⲉ ⲡϫⲟⲉⲓⲥ ⲁⲩⲱ ϣⲁϥⲕⲁⲛⲟⲃⲉ ⲉⲃⲟⲗ ⲛϥⲧⲟⲩϫⲟ ϩⲛ ⲛⲉⲟⲩⲟⲉⲓϣ ⲛⲧⲉⲑⲗⲓⲯⲓⲥ

2:12  ⲟⲩⲟⲓ ⲛⲟⲩϩⲏⲧ ⲛϭⲱⲃ ⲙⲛ ϩⲉⲛϭⲓϫ ⲉⲩⲕⲏ ⲁⲩⲱ ⲟⲩⲣⲉϥⲣⲛⲟⲃⲉ ⲉϥⲙⲟⲟϣⲉ ϩⲓ ϩⲓⲏ ⲥⲛⲁⲩ

2:13  ⲟⲩⲟⲓ ⲛⲟⲩϩⲏⲧ ⲛϭⲱⲃ ϫⲉ ⲛϥⲡⲓⲥⲧⲉⲩⲉ ⲁⲛ ⲉⲧⲃⲉ ⲛⲁⲓ ⲛⲥⲉⲛⲁⲥⲕⲉⲡⲁⲍⲉ ⲙⲙⲟϥ ⲁⲛ

2:14  ⲟⲩⲟⲓ ⲛⲏⲧⲛ ⲛⲉⲛⲧⲁⲩⲕⲁⲧⲟⲟⲧⲟⲩ ⲉⲃⲟⲗ ⲛⲑⲩⲡⲟⲙⲟⲛⲏ ⲁⲩⲱ ⲉⲣⲉⲧⲛⲁⲣⲟⲩ ⲉⲣϣⲁⲛⲡϫⲟⲉⲓⲥ ϭⲙⲡⲉⲧⲛϣⲓⲛⲉ

2:15  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲙⲉⲩⲣⲁⲧⲥⲱⲧⲙ ⲛⲥⲁ ⲛⲉϥϣⲁϫⲉ ⲁⲩⲱ ⲛⲉⲧⲙⲉ ⲙⲙⲟϥ ϣⲁⲩϩⲁⲣⲉϩ ⲉⲛⲉϥϩⲓⲟⲟⲩⲉ

2:16  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϣⲁⲩϣⲓⲛⲉ ⲛⲥⲁ ⲡⲉⲧⲉϩⲛⲁϥ ⲁⲩⲱ ⲛⲉⲧⲙⲉ ⲙⲙⲟϥ ϣⲁⲩϣⲓⲛⲉ ⲛⲥⲁ ⲡⲉϥⲛⲟⲙⲟⲥ

2:17  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲥⲉⲛⲁⲥⲟⲃⲧⲉ ⲛⲛⲉⲩϩⲏⲧ ⲁⲩⲱ ϣⲁⲩⲑⲃⲃⲓⲟ ⲛⲛⲉⲩⲯⲩⲭⲏ ⲙⲡⲉϥⲙⲧⲟ ⲉⲃⲟⲗ

2:18  ⲉⲛⲛⲁϩⲉ ϩⲛ ⲛϭⲓϫ ⲙⲡϫⲟⲉⲓⲥ ⲛϩⲛ ⲛϭⲓϫ ⲛⲛⲣⲱⲙⲉ ⲁⲛ ⲛⲉ ⲛⲑⲉ ⲅⲁⲣ ⲛⲧⲉϥⲙⲛⲧⲛⲟϭ ⲧⲁⲓ ⲧⲉ ⲧⲉϥⲙⲛⲧⲛⲁ