CopSahBible2 - Sirach - 45

45:1  ⲉⲁⲩⲙⲉⲣⲓⲧϥ ϩⲓⲧⲛ ⲡⲛⲟⲩⲧⲉ ⲙⲛ ⲛⲣⲱⲙⲉ ⲙⲱⲩ̈ⲥⲏⲥ ⲡⲁⲓ ⲉⲧⲉⲡⲉϥⲣⲙⲉⲉⲩⲉ ϩⲛ ⲛⲉⲥⲙⲟⲩ

45:2  ⲁϥⲧⲛⲧⲱⲛ[ϥ] ⲉⲡⲉⲟⲟⲩ [ⲛⲛⲉⲧⲟⲩⲁⲁⲃ] ⲁⲩⲱ ⲁϥϫⲁⲥⲧϥ ϩⲛ ⲛϩⲟⲧ[ⲉ ⲛⲛϫⲁϫⲉ]

45:3  ⲁϥⲉⲓⲣⲉ ⲛϩⲛⲙⲁⲉⲓⲛ ϩⲛ ⲛⲉϥϣⲁϫⲉ ⲁϥϯⲉⲟⲟⲩ ⲛⲁϥ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲁϥϩⲱⲛ ⲉⲧⲟⲟⲧϥ ⲛⲛⲁϩⲣⲛ ⲡⲗⲁⲟⲥ ⲁⲩⲱ ⲁϥⲧⲟⲩⲟϥ ⲉⲃⲟⲗ ϩⲙ ⲡⲉϥⲉⲟⲟⲩ

45:4  ⲁϥⲧⲃⲃⲟϥ ϩⲛ ⲧⲡⲓⲥⲧⲓⲥ ⲙⲛ ⲧⲉϥⲙⲛⲧⲣⲙⲣⲁϣ ⲁϥⲥⲟⲧⲡϥ ⲉⲃⲟⲗ ϩⲛ ⲥⲁⲣⲝ ⲛⲓⲙ

45:5  ⲁϥⲧⲣⲉϥⲥⲱⲧⲙ ⲉⲧⲉϥⲥⲙⲏ ⲁⲩⲱ ⲁϥϫⲓⲧϥ ⲉϩⲟⲩⲛ ⲉⲡϭⲟⲥⲙ ⲁϥϯ ⲛⲁϥ ⲛⲛⲉⲛⲧⲟⲗⲏ ⲙⲡⲉϥⲙⲧⲟ ⲉⲃⲟⲗ ⲡⲛⲟⲙⲟⲥ ⲙⲡⲱⲛϩ ⲙⲛ ⲧⲉⲥⲃⲱ ⲉⲧⲥⲁⲃⲉⲓⲁⲕⲱⲃ ⲉⲧⲉϥⲇⲓⲁⲑⲏⲕⲏ ⲁⲩⲱ ⲡⲓⲏⲗ ⲉⲛⲉϥϩⲁⲡ

45:6  ⲁϥϫⲓⲥⲉ ⲛⲁⲁⲣⲱⲛ ⲡⲉϥⲥⲟⲛ ⲉⲧⲟⲩⲁⲁⲃ ⲉϯⲛⲉ ⲙⲙⲟϥ ⲉⲃⲟⲗ ϩⲛ ⲧⲉⲫⲩⲗⲏ ⲛⲗⲉⲩⲉⲓ

45:7  ⲁϥⲥⲙⲓⲛⲉ ⲛⲙⲙⲁϥ ⲛⲧⲉϥⲇⲓⲁⲑⲏⲕⲏ ⲛϣⲁⲉⲛⲉϩ ⲁϥϯ ⲛⲁϥ ⲛⲧⲙⲛⲧⲟⲩⲏⲏⲃ ⲙⲡⲗⲁⲟⲥ ⲁϥⲙⲁⲕⲁⲣⲓⲍⲉ ⲙⲙⲟϥ ϩⲛ ⲟⲩⲧⲥⲁⲛⲟ ⲁⲩⲱ ⲁϥⲙⲟⲣϥ ϩⲛⲟⲩⲥⲧⲟⲗⲏ ⲛⲉⲟⲟⲩ

45:8  ⲁϥϯ ϩⲓⲱⲱϥ ⲛⲟⲩⲥⲩⲛⲧⲉⲗⲓⲁ ⲛϣⲟⲩϣⲟⲩ ⲁⲩⲱ ⲁϥⲧⲁϫⲣⲟϥ ϩⲛ ϩⲉⲛⲥⲕⲉⲩⲏ ⲛϭⲟⲙ ϩⲛ ϩⲉⲛⲡⲉⲣⲓⲥⲕⲉⲗⲏ ⲙⲛ ⲟⲩⲡⲟⲇⲏⲣⲏ [ⲙⲛ ⲟⲩⲉ]ⲡⲱⲙⲓⲥ

45:9  [ⲁϥⲕⲟⲧϥ ϩ]ⲛ ϩⲉⲛϩⲣⲟⲓⲥⲕⲟⲥ ϩⲛ ⲟⲩⲙⲏⲏϣⲉ ⲛϣϭⲗϭⲓⲗ ⲛⲛⲟⲩⲃ ⲙⲡⲉϥⲕⲱⲧⲉ ⲉⲧⲣⲉⲩϯϩⲣⲟⲟⲩ ϩⲛ ⲧⲉϥⲧⲁϭⲥⲉ ⲉⲧⲣⲉⲩⲥⲱⲧⲙ ⲉⲡⲉⲩϩⲣⲟⲟⲩ ϩⲙ ⲡⲉⲣⲡⲉ ⲉⲩⲣⲡⲙⲉⲉⲩⲉ ⲛⲛϣⲏⲣⲉ ⲙⲡⲉϥⲗⲁⲟⲥ

45:10  ϩⲛ ⲟⲩⲥⲧⲟⲗⲏ ⲉⲥⲟⲩⲁⲁⲃ ⲛⲛⲟⲩⲃ ϩⲓ ϩⲩⲁⲕⲓⲛⲑⲓⲛⲟⲛ ⲙⲛ ⲟⲩϫⲏϭⲉ ⲛϩⲱⲃ ⲙⲡⲟⲓⲕⲓⲗⲧⲏⲥ ϩⲛ ⲟⲩⲗⲟⲅⲓⲟⲛ ⲛⲕⲣⲓⲥⲓⲥ ⲛⲟⲩⲱⲛϩ ⲉⲃⲟⲗ ⲛⲧⲙⲉ

45:11  ϩⲛ ⲟⲩⲕⲟⲕⲕⲟⲥ ⲉϥϩⲟⲥⲉ ⲛϩⲱⲃ ⲛⲧⲉⲭⲛⲓⲧⲏⲥ ϩⲛ ϩⲉⲛⲉⲛⲉⲙⲙⲉ ⲛϣⲟϣⲧ ⲛⲥⲫⲣⲁⲅⲓⲥ ϩⲛ ⲟⲩⲙⲣⲣⲉ ⲛⲛⲟⲩⲃ ⲛϩⲱⲃ ⲛⲣⲉϥⲕⲉϩⲕⲱⲛⲉ ⲉⲥϣⲉⲧϣⲱⲧ ϩⲛ ⲟⲩⲥϩⲁⲓ ⲉⲩⲣⲡⲙⲉⲉⲩⲉ ⲕⲁⲧⲁ ⲧⲏⲡⲉ ⲛⲛⲉⲫⲩⲗⲏ ⲙⲡⲓⲏⲗ

45:12  ϩⲛ ⲟⲩⲕⲗⲟⲙ ⲛⲛⲟⲩⲃ ϩⲓ ⲧⲡⲉ ⲛⲧϭⲓⲇⲁⲣⲓⲥ ⲟⲩⲧⲩⲡⲟⲥ ⲛⲥⲫⲣⲁⲅⲓⲥ ⲛⲧⲃⲃⲟ ⲟⲩϣⲟⲩϣⲟⲩ ⲛⲧⲁⲉⲓⲟ ⲛϩⲱⲃ ⲛϭⲟⲙ ⲉⲛⲉⲥⲱⲟⲩ ⲛⲛⲃⲁⲗ ⲉⲩⲧⲥⲁⲛⲏⲩ

45:13  ⲙⲡⲉⲟⲩⲟⲛ ϣⲱⲡⲉ ⲛⲧⲉϥϩⲉ ϩⲁⲧⲉϥϩⲏ ⲁⲩⲱ ⲙⲛϣⲙⲙⲟ ⲛⲁϯ ϩⲓⲱⲱϥ ⲛϣⲁⲉⲛⲉϩ ϣⲁⲧⲛⲛⲉϥϣⲏⲣⲉ ⲙⲙⲁⲧⲉ ⲁⲩⲱ ⲛϣⲏⲣⲉ ⲛⲛⲉϥϣⲏ[ⲣⲉ ⲛϣⲁⲉⲛ]ⲉϩ

45:14  ⲥⲉⲛⲁⲧⲁⲗⲉⲧⲉⲩⲑⲩⲥⲓⲁ ⲉϩⲣⲁⲓ ⲧⲏⲣⲥ ⲛⲥⲟⲡ ⲥⲛⲁⲩ ⲙⲙⲏⲏⲛⲉ ϣⲁⲃⲟⲗ

45:15  ⲁⲙⲱⲩ̈ⲥⲏⲥ ⲙⲉϩⲛⲉϥϭⲓϫ ⲁϥⲧⲱϩⲥ ⲙⲙⲟϥ ⲛⲟⲩⲛⲉϩ ⲉϥⲟⲩⲁⲁⲃ ⲁϥϣⲱⲡⲉ ⲛⲁϥ ⲉⲩⲇⲓⲁⲑⲏⲕⲏ ⲛϣⲁⲉⲛⲉϩ ⲁⲩⲱ ⲙⲛ ⲡⲉϥⲥⲡⲉⲣⲙⲁ ϩⲛ ⲛⲉϩⲟⲟⲩ ⲛⲧⲡⲉ ⲉϣⲙϣⲉ ⲛⲁϥ ⲁⲩⲱ ⲉⲣⲟⲩⲏⲏⲃ ⲁⲩⲱ ⲉⲥⲙⲟⲩ ⲉⲡⲉϥⲗⲁⲟⲥ ϩⲛ ⲡⲉϥⲣⲁⲛ

45:16  ⲁϥⲥⲱⲧⲡ ⲙⲙⲟϥ ϩⲛ ⲣⲱⲙⲉ ⲛⲓⲙ ⲉⲧⲣⲉϥⲧⲁⲗⲟ ⲉϩⲣⲁⲓ ⲛⲛⲁϩⲣⲛ ⲡϫⲟⲉⲓⲥ ⲉⲩϣⲟⲩϩⲏⲛⲉ ⲙⲛ ⲟⲩⲥϯⲛⲟⲩϥⲉ ⲉⲩⲣⲡⲙⲉⲉⲩⲉ ⲉⲕⲱ ⲉⲃⲟⲗ ⲙⲡⲉⲕⲗⲁⲟⲥ

45:17  ⲁϥⲧⲁⲁϥ ⲛⲛⲉϥⲉⲛⲧⲟⲗⲏ ⲛⲉⲝⲟⲩⲥⲓⲁ ϩⲛ ⲧⲇⲓⲁⲑⲏⲕⲏ ⲛϩⲁⲡ ⲉⲧⲥⲁⲃⲉⲓⲁⲕⲱⲃ ⲉⲛⲉϥⲙⲛⲧⲙⲛⲧⲣⲉ ⲁⲩⲱ ⲉⲙⲟⲩⲧⲉ ⲉⲡⲓⲏⲗ ϩⲙ ⲡⲉϥⲛⲟⲙⲟⲥ

45:18  ⲉⲃⲟⲗ ϫⲉ ⲁⲩⲧⲱⲟⲩⲛ ⲉⲣⲟϥ ⲛϭⲓ ϩⲛϣⲙⲙⲟ ⲁⲩⲱ ⲁⲩⲕⲱϩ ⲉⲣⲟϥ ϩⲓ ⲡϫⲁⲉⲓⲉ ⲛϭⲓ ⲛⲣⲱⲙⲉ ⲛⲇⲁⲑⲁⲛ ⲙⲛ ⲁⲃⲓⲣⲱⲛ ⲁⲩⲱ ⲧⲥⲩⲛⲁⲅⲱⲅⲏ ⲛⲕⲟⲣⲉ ϩⲛ ⲟⲩϭⲱⲛⲧ ⲙⲛ ⲟⲩⲟⲣⲅⲏ

45:19  ⲁⲡϫⲟⲉⲓⲥ ⲛⲁⲩ ⲁⲩⲱ ⲙⲡϥⲟⲩⲱϣ ⲁϥϥⲟⲧⲟⲩ ⲉⲃⲟⲗ ϩⲙ ⲡϭⲱⲛⲧ ⲛⲧⲉϥⲟⲣⲅⲏ [ⲁϥⲉⲓⲣⲉ ⲛϩ]ⲏⲧⲟⲩ ⲛϩⲛϣⲡⲏⲣⲉ [……] ⲙⲡⲕⲱϩⲧ ⲙⲡⲉϥϣⲁϩ

45:20  ⲁϥⲟⲩⲉϩⲉⲟⲟⲩ ⲉⲁⲁⲣⲱⲛ ⲁⲩⲱ ⲁϥϯ ⲛⲁϥ ⲛⲟⲩⲕⲗⲏⲣⲟⲛⲟⲙⲓⲁ ⲛⲁⲡⲁⲣⲭⲏ ⲛⲛϣⲣⲡⲛϭⲣⲱϭ ⲁⲩⲱ ⲁϥⲧⲱϣ ⲛⲁϥ ⲛⲟⲩⲟⲉⲓⲕ ⲛϣⲟⲣⲡ ⲉⲩⲥⲉⲓ

45:21  ⲕⲁⲓⲅⲁⲣ ⲥⲉⲛⲁⲟⲩⲱⲙ ⲛⲛⲉⲑⲩⲥⲓⲁ ⲙⲡϫⲟⲉⲓⲥ ⲛⲉⲛⲧⲁϥⲧⲁⲁⲩ ⲛⲁϥ ⲙⲛ ⲡⲉϥⲥⲡⲉⲣⲙⲁ

45:22  ⲡⲗⲏⲛ ϥⲛⲁⲕⲗⲏⲣⲟⲛⲟⲙⲓ ⲁⲛ ϩⲙ ⲡⲕⲁϩ ⲙⲡⲗⲁⲟⲥ ⲁⲩⲱ ⲙⲛⲧϥⲙⲉⲣⲓⲥ ⲙⲙⲁⲩ ϩⲙ ⲡⲉϥⲗⲁⲟⲥ ⲛⲧⲟϥ ⲅⲁⲣ ⲧⲉ ⲧⲉⲕⲙⲉⲣⲓⲥ ⲁⲩⲱ ⲧⲉⲕⲕⲗⲏⲣⲟⲛⲟⲙⲓⲁ

45:23  ⲫⲓⲛⲉⲉⲥ ⲡϣⲏⲣⲉ ⲛⲉⲗⲉⲁⲍⲁⲣ ⲡⲙⲉϩϣⲟⲙⲛⲧ ⲉⲡⲉⲟⲟⲩ ϩⲙ ⲡⲧⲣⲉϥⲕⲱϩ ϩⲛ ⲑⲟⲧⲉ ⲙⲡϫⲟⲉⲓⲥ ⲁⲩⲱ ⲛϥⲁϩⲉⲣⲁⲧϥ ϩⲙ ⲡϭⲱⲛⲧ ⲙⲡⲗⲁⲟⲥ ϩⲛ ⲧⲙⲛⲧⲁⲅⲁⲑⲟⲥ ⲙⲡⲟⲩⲣⲟⲧ ⲛⲧⲉϥⲯⲩⲭⲏ ⲁⲩⲱ ⲁϥϥⲓ ⲉⲃⲟⲗ ϩⲓϫⲛ ⲡⲗⲁⲟⲥ ⲙⲡⲓⲏⲗ

45:24  ⲉⲧⲃⲉ ⲡⲁⲓ ⲁⲩⲥⲙⲓⲛⲉ ⲛⲙⲙⲁϥ ⲛⲟⲩⲇⲓⲁⲑⲏⲕⲏ ⲛⲉⲓⲣⲏⲛⲏ ⲉⲁϩⲉⲣⲁⲧϥ ⲉⲡⲉⲧⲟⲩⲁⲁⲃ ⲙⲡⲉϥⲗⲁⲟⲥ ϫⲉ ⲉⲥⲉϣⲱⲡⲉ ⲛⲁϥ ⲙⲛ ⲡⲉϥⲥⲡⲉⲣⲙⲁ ⲧⲙⲛⲧⲛⲟϭ ⲙⲛ ⲧⲙⲛⲧⲟⲩⲏⲏⲃ ϣⲁⲉⲛⲉϩ

45:25  ⲁⲩⲱ ⲟⲩⲇⲓⲁⲑⲏⲕⲏ ⲙⲡϣⲏ[ⲣⲉ ⲇⲁⲩⲓⲇ] ⲉⲃⲟⲗ ϩⲛ ⲧⲉⲫⲩⲗⲏ ⲛ[ⲓⲟⲩⲇⲁ] ⲟⲩⲕⲗⲏⲣⲟⲛⲟⲙⲓⲁ ⲙⲡϣⲏⲣⲉ ⲙⲡⲣⲣⲟ ⲉⲃⲟⲗ ϩⲛ ⲟⲩϣⲏⲣⲉ ⲛⲟⲩⲱⲧ ⲧⲉⲕⲗⲏⲣⲟⲛⲟⲙⲓⲁ ⲛⲁⲁⲣⲱⲛ ⲙⲛ ⲡⲉϥⲥⲡⲉⲣⲙⲁ

45:26  ⲉϥⲉϯ ⲛⲏⲧⲛ ⲛⲟⲩⲥⲟⲫⲓⲁ ϩⲙ ⲡⲉⲧⲛϩⲏⲧ ⲉⲕⲣⲓⲛⲉ ⲙⲡⲉϥⲗⲁⲟⲥ ϩⲛ ⲟⲩⲇⲓⲕⲁⲓⲟⲥⲩⲛⲏ ϫⲉ ⲛⲉⲛⲉⲩⲁⲅⲁⲑⲟⲛ ⲧⲁⲕⲟ ⲛⲧⲉⲡⲉⲩⲉⲟⲟⲩ ϣⲱⲡⲉ ϣⲁ ϩⲛϫⲱⲙ ⲛϫⲱⲙ