CopSahBible2 - Sirach - 37

37:1  ϣⲃⲏⲣ ⲛⲓⲙ ⲛⲁϫⲟⲟⲥ ϫⲉ ⲁⲓⲣϣⲃⲏⲣ ϩⲱ ⲁⲗⲗⲁ ⲟⲩⲛϣⲃⲏⲣ ⲉⲡⲉϥⲣⲁⲛ ⲙⲙⲁⲧⲉ ⲡⲉ ϣⲃⲏⲣ

37:2  ⲙⲏ ⲙⲛⲗⲩⲡⲏ ϣⲟⲟⲡ ϣⲁϩⲣⲁⲓ ⲉⲡⲙⲟⲩ ⲁⲩⲱ ⲟⲩⲛϣⲃⲏⲣ ⲉⲩⲛⲙⲙⲁⲕ ⲉϣⲁⲩⲕⲟⲧⲟⲩ ⲉⲩⲙⲛⲧϫⲁϫⲉ

37:3  ⲱ ⲡⲙⲉⲉⲩⲉ ⲉⲑⲟⲟⲩ ⲛⲧⲁⲕⲉⲓ ⲧⲱⲛ ⲉϩⲃⲥⲡⲕⲁϩ ϩⲛ ⲟⲩⲕⲣⲟϥ

37:4  ϣⲁⲣⲉⲟⲩϣⲃⲏⲣ ϩⲏⲇⲁⲛⲉ ⲙⲡⲉϥϣⲃⲏⲣ ϩⲛ ⲟⲩⲟⲩⲛⲟϥ ⲁⲩⲱ ϩⲙ ⲡⲉⲟⲩⲟⲉⲓϣ ⲛⲧⲉⲑⲗⲓⲯⲓⲥ ϥⲛⲁϯ ⲟⲩⲃⲏϥ

37:5  ϣⲁⲣⲉⲟⲩϣⲃⲏⲣ ϣⲡϩⲓⲥⲉ ⲙⲛ ⲡⲉϥϣⲃⲏⲣ ⲉⲧⲃⲉ ϩⲏⲧϥ ⲁⲩⲱ ϥⲛⲁϫⲓ ⲛⲟⲩϭⲗ ⲙⲡⲉⲙⲧⲟ ⲉⲃⲟⲗ ⲛⲟⲩⲡⲟⲗⲉⲙⲟⲥ

37:6  ⲙⲡⲣⲣⲡⲱⲃϣ ⲙⲡⲉⲕϣⲃⲏⲣ ϩⲙ ⲡⲉⲕϩⲏⲧ ⲁⲩⲱ ⲙⲡⲣⲣⲡⲱⲃϣ ⲙⲡⲉⲕϣⲃⲏⲣ ϩⲛ ⲛⲉⲕⲭⲣⲏⲙⲁ

37:7  ⲣⲉϥϫⲓϣⲟϫⲛⲉ ⲛⲓⲙ ⲛⲁⲧⲟⲩⲛⲉⲥⲟⲩϣⲟϫⲛⲉ ⲁⲗⲗⲁ ⲟⲩⲛⲣⲉϥϫⲓϣⲟϫⲛⲉ ⲉⲣⲟϥ ⲟⲩⲁⲁϥ

37:8  ⲁⲣⲉϩ ⲧⲉⲕⲯⲩⲭⲏ ⲉⲣⲉϥϫⲓϣⲟϫⲛⲉ [ⲁⲩⲱ ⲉ]ⲓⲙⲉ ⲛϣⲟⲣⲡ ϫⲉ ⲉϥⲁϩⲉ ⲛⲁⲕ ⲛⲟⲩ ⲕⲁ]ⲓ ⲅⲁⲣ ϥⲛⲁϫⲓϣⲟϫⲛⲉ ⲉⲣⲟϥ ⲟⲩⲁⲁϥ ⲙⲏⲡⲟⲧⲉ ⲛϥⲛⲉϫⲕⲗⲏⲣⲟⲥ ⲉϫⲱⲕ

37:9  ⲛϥϫⲟⲟⲥ ⲛⲁⲕ ϫⲉ ⲛⲁⲛⲟⲩⲧⲉⲕϩⲓⲏ ⲛϥⲁϩⲉⲣⲁⲧϥ ⲙⲡⲉⲕⲙⲧⲟ ⲉⲃⲟⲗ ⲉⲛⲁⲩ ⲉⲡⲉⲧⲛⲁϣⲱⲡⲉ ⲙⲙⲟⲕ

37:10  ⲙⲡⲣϫⲓϣⲟϫⲛⲉ ⲙⲛ ⲡⲉⲧⲙⲟⲩϩ ⲛⲉⲓⲁⲧϥ ⲙⲙⲟⲕ ⲁⲩⲱ ϩⲱⲡ ⲛⲛⲉⲕϣⲁϫⲉ ⲉⲛⲉⲧⲕⲱϩ ⲉⲣⲟⲕ

37:11  ⲙⲡⲣϫⲓϣⲟϫⲛⲉ ⲙⲛ ⲟⲩⲥϩⲓⲙⲉ ⲉⲧⲃⲉ ⲧⲉⲥⲕⲟⲓϩⲉ ⲁⲩⲱ ⲙⲛ ⲟⲩϭⲱⲃ ⲉⲧⲃⲉ ⲟⲩⲡⲟⲗⲉⲙⲟⲥ ⲁⲩⲱ ⲙⲛ ⲟⲩⲉϣⲱⲧ ⲉⲧⲃⲉ ⲟⲩⲙⲉⲧⲁⲃⲟⲗⲏ ⲙⲛ ⲡⲉⲧϣⲱⲡ ⲉⲧⲃⲉ ϯ ⲉⲃⲟⲗ ⲁⲩⲱ ⲙⲛ ⲟⲩⲉⲓⲉⲣⲃⲟⲟⲛⲉ ⲉⲧⲃⲉ ⲟⲩⲙⲛⲧⲣⲉϥϯ ⲙⲛ ⲟⲩⲁⲧⲛⲁ ⲉⲧⲃⲉ ⲟⲩⲙⲛⲧⲛⲁⲏⲧ ⲁⲩⲱ ⲙⲛ ⲟⲩⲣⲉϥϫⲛⲁⲁⲩ ⲉⲧⲃⲉ ϩⲱⲃ ⲛⲓⲙ ⲙⲛ ⲟⲩϫⲁⲓⲃⲉⲕⲉ ⲙⲙⲏⲏⲛⲉ ⲉⲧⲃⲉ ⲟⲩϫⲱⲕ ⲉⲃⲟⲗ ⲁⲩⲱ ⲙⲛ ⲟⲩϩⲙϩⲁⲗ ⲛⲁⲣⲅⲟⲥ ⲉⲧⲃⲉ ⲟⲩⲛⲟϭ ⲛϩⲱⲃ ⲙⲡⲣⲕⲁϩⲧⲏⲕ ⲉⲛⲁⲓ ⲉⲧⲃⲉ ϣⲟϫⲛⲉ ⲛⲓⲙ

37:12  ⲁⲗⲗⲁ ⲉⲕⲛⲁⲧⲁϣⲟⲕ ⲙⲛ ⲟⲩⲣⲙⲛⲛⲟⲩⲧⲉ ⲡⲉⲧⲕⲛⲁⲉⲓⲙⲉ ⲉⲣⲟϥ ϫⲉ ϥⲛⲁⲁⲣⲉϩ ⲉⲧⲉⲛⲧⲟⲗⲏ ⲉⲣⲉⲡⲉϥϩⲏⲧ ⲛⲛⲏⲩ ⲉϩ[ⲟⲩⲛ …] ⲁⲩⲱ ⲉⲕϣⲁⲛϫⲱⲣⲡ ϥⲛⲁϣⲡϩⲓⲥⲉ […]

37:13  (b) ⲙⲛⲡⲉⲧⲛϩⲟⲧ ⲅⲁⲣ ⲉⲣⲟϥ ⲛⲁⲕ

37:14  ϣⲁⲣⲉⲧⲉⲯⲩⲭⲏ ⲅⲁⲣ ⲙⲡⲣⲱⲙⲉ ⲧⲟⲛⲧⲛ ⲛϩⲛⲥⲟⲡ ⲉϩⲟⲩⲉⲥⲁϣϥ ⲛⲣⲉⲣϭⲱϣⲧ ⲉⲃⲟⲗ ⲉⲩϩⲙ[ⲟ]ⲟⲥ ⲉⲩϭⲱϣⲧ ϩⲓ ⲟⲩⲙⲁ ⲉϥϫⲟⲥⲉ

37:15  ⲉϫⲛ ⲛⲁⲓ ⲧⲏⲣⲟⲩ ⲥⲟⲡⲥ ⲙⲡⲉⲧϫⲟⲥⲉ ϫⲉ ϥⲥⲟⲟⲩⲛ ⲛⲧⲉⲕϩⲓⲏ ϩⲛ ⲟⲩⲙⲉ

37:16  ⲧⲁⲣⲭⲏ ⲛϩⲱⲃ ⲛⲓⲙ ⲡⲉ ⲡϣⲁϫⲉ ⲁⲩⲱ ⲑⲁⲏ ⲛϩⲱⲃ ⲛⲓⲙ ⲡⲉ ⲡϣⲟϫⲛⲉ

37:17  ⲡⲟⲩⲱⲛϩ ⲉⲃⲟⲗ ⲙⲡϣⲓⲃⲉ ⲡⲉ ⲫⲏⲧ

37:18  ϥⲧⲟⲟⲩ ⲛϩⲱⲃ ⲛⲉⲧⲟⲩⲟⲛϩ ⲉⲃⲟⲗ ⲡⲁⲅⲁⲑⲟⲛ ⲙⲛ ⲡⲡⲉⲑⲟⲟⲩ ⲡⲱⲛϩ ⲙⲛ ⲡⲙⲟⲩ ⲡⲉⲧⲟ ⲇⲉ ⲛϫⲟⲉⲓⲥ ⲉϫⲱⲟⲩ ⲛϩⲁϩ ⲛⲥⲟⲡ ⲡⲉ ⲡⲗⲁⲥ

37:19  ⲟⲩⲛⲣⲱⲙⲉ ⲛⲥⲁⲃⲉ ⲛⲣⲉϥϯⲥⲃⲱ ⲛⲟⲩⲙⲏⲏϣⲉ ⲉⲩⲁⲧϣⲁⲩ ⲡⲉ ⲛⲧⲉϥⲯⲩⲭⲏ ⲙⲙⲓⲛ ⲙⲙⲟϥ

37:20  ⲟⲩⲛⲡⲉⲧϯⲥⲁⲕ ⲙⲙⲟϥ ϩⲛ ⲛⲉϥϣⲁϫⲉ ⲉⲩⲙⲉⲥⲧⲉ ⲡⲉ ⲡⲁⲓ ⲛⲁⲣϭⲣⲱϩ ϩⲛ ⲧⲣⲩⲫⲏ ⲛⲓⲙ

37:21  ⲙⲡⲟⲩϯⲛⲉϥⲭⲁⲣⲓⲥ ⲅⲁⲣ ⲛⲛⲁϩⲣⲛ ⲡϫⲟⲉⲓⲥ ϫⲉ ⲁⲩϩⲟⲩⲣⲱⲱϥ ⲛⲥⲟⲫⲓⲁ ⲛⲓⲙ

37:22  ⲟⲩⲛⲡⲉⲧⲟ ⲛⲥⲟⲫⲟⲥ ϩⲛ ⲧⲉϥⲯⲩⲭⲏ [ⲉ]ⲣⲉⲛⲕⲁⲣⲡⲟⲥ ⲛⲧⲉ ⲧⲉϥⲙⲛⲧⲥⲁⲃⲉ ⲛϩⲟⲧ ϩⲛ ⲧⲉϥⲧⲁⲡⲣⲟ

37:23  ϣⲁⲣⲉⲟⲩⲣⲱⲙⲉ ⲛⲥⲟⲫⲟⲥ ϯⲥⲃⲱ ⲙⲡⲉϥⲗⲁⲟⲥ ⲁⲩⲱ ⲛⲕⲁⲣⲡⲟⲥ ⲛⲧⲉϥⲙⲛⲧⲥⲁⲃⲉ ⲛϩⲟⲧ

37:24  ⲟⲩⲛⲟⲩⲣⲱⲙⲉ ⲛⲥⲟⲫⲟⲥ ⲛⲁⲙⲟⲩϩ ⲛⲟⲩⲥⲙⲟⲩ ⲁⲩⲱ ⲟⲩⲟⲛ ⲛⲓⲙ ⲉⲧⲛⲁⲩ ⲉⲣⲟϥ ⲛⲁⲧⲙⲁⲉⲓⲟϥ

37:25  ⲡⲁϩⲉ ⲙⲡⲣⲱⲙⲉ ⲉϥϩⲛ ⲟⲩⲏⲡⲉ ⲛϩⲟⲟⲩ ⲁⲩⲱ ϩⲛⲁⲧⲏⲡⲉ ⲛⲉ ⲛⲉϩⲟⲟⲩ ⲙⲡ

37:26  ⲡⲥⲟⲫⲟⲥ ϩⲛ ⲡⲉϥⲗⲁⲟⲥ ⲛⲁⲕⲗⲏⲣⲟⲛⲟⲙⲓ ⲛⲟⲩⲡⲓⲥⲧⲓⲥ ⲁⲩⲱ ⲡⲉϥⲣⲁⲛ ⲛⲁⲱⲛϩ ⲛϣⲁⲉⲛⲉϩ

37:27  ⲡⲁϣⲏⲣⲉ ⲡⲉⲓⲣⲁⲍⲉ ⲛⲧⲉⲕⲯⲩⲭⲏ ϩⲙ ⲡⲉⲕⲱⲛϩ ⲛⲅⲛⲁⲩ ϫⲉ ⲟⲩ ⲡⲉⲧϩⲟⲟⲩ ⲛⲁⲥ ⲛⲅⲧⲙⲧⲁⲁϥ ⲛⲁⲥ

37:28  ⲛⲥⲉⲣⲛⲟϥⲣⲉ ⲅⲁⲣ ⲧⲏⲣⲟⲩ ⲁⲛ ⲛⲟⲩⲟⲛ ⲛⲓⲙ ⲁⲩⲱ ⲯⲩⲭⲏ ⲛⲓⲙ ⲧⲏⲧ ⲁⲛ ⲛϩⲏⲧⲟⲩ ⲧⲏⲣⲟⲩ

37:29  ⲙⲡⲣⲣⲁⲧⲥⲉⲓ ϩⲛ ⲟⲩⲙⲏⲏϣⲉ ⲛⲧⲣⲩⲫⲏ ⲁⲩⲱ ⲙⲡⲣⲡⲟⲣϣⲕ ⲉⲃⲟⲗ ⲉϫⲛ ϩⲛϭⲓⲛⲟⲩⲱⲙ

37:30  ⲉⲃⲟⲗ ⲅⲁⲣ ϩⲛ ϩⲁϩ ⲛϭⲓⲛⲟⲩⲱⲙ ϣⲁⲣⲉϣⲱⲛⲉ ϣⲱⲡⲉ ⲁⲩⲱ ϣⲁⲣⲉⲟⲩⲙⲛⲧⲁⲧⲥⲉⲓ ϩⲱⲛ ⲉϩⲟⲩⲛ ⲉⲩⲭⲟⲗⲏ

37:31  ⲁϩⲁϩ ⲙⲟⲩ ⲉⲧⲃⲉ [ⲟⲩⲙⲛⲧⲁⲧⲥⲉⲓ] ⲡⲉ[ⲧ… …]