CopSahBible2 - Sirach - 9

9:1  ⲙⲡⲣⲕⲱϩ ⲉⲧⲉⲕⲥϩⲓⲙⲉ ⲙⲡⲣϯⲥⲃⲱ ⲛⲁⲥ ⲉϫⲱⲕ ⲛⲟⲩⲥⲃⲱ ⲉⲥϩⲟⲟⲩ

9:2  ⲙⲡⲣϯ ⲙⲡⲉⲕϩⲏⲧ ⲉⲧⲉⲕⲥϩⲓⲙⲉ ⲉⲧⲣⲉⲥⲁⲗⲉ ⲉϩⲣⲁⲓ ⲉϫⲛ ⲧⲉⲕϭⲟⲙ

9:3  ⲙⲡⲣⲧⲱⲙⲛⲧ ⲉⲩⲥϩⲓⲙⲉ ⲛϩⲉⲧⲉⲣⲁ ⲙⲏⲡⲟⲧⲉ ⲛⲅϩⲉ ϩⲛ ⲛⲉⲥϭⲟⲣϭⲥ

9:4  ⲙⲡⲣⲧⲁϣⲟⲕ ϩⲁⲧⲛ ⲧⲉⲧⲯⲁⲗⲗⲉⲓ ⲙⲏⲡⲟⲧⲉ ⲛⲅⲧⲁⲕⲟ ϩⲛ ⲛⲉⲥϩⲃⲏⲩⲉ

9:5  ⲙⲡⲣⲙⲉϣⲧⲟⲩⲡⲁⲣⲑⲉⲛⲟⲥ ⲙⲏⲡⲟⲧⲉ ⲛⲅⲥⲕⲁⲛⲇⲁⲗⲓⲍⲉ ϩⲙ ⲡⲉⲥⲥⲁ

9:6  ⲙⲡⲣϯⲡⲉⲕϩⲏⲧ ⲛϩⲉⲛⲡⲟⲣⲛⲏ ϫⲉⲕⲁⲥ ⲛⲛⲉⲕⲧⲁⲕⲉⲧⲉⲕⲕⲗⲏⲣⲟⲛⲟⲙⲓⲁ

9:7  ⲙⲡⲣⲙⲟⲩⲣϣ ⲛⲛϩⲓⲣ ⲛⲟⲩⲡⲟⲗⲓⲥ ⲟⲩⲇⲉ ⲙⲡⲣⲕⲱⲧⲉ ϩⲛ ⲛⲉⲥⲙⲁ ⲛϫⲁⲓⲉ

9:8  ⲕⲧⲉⲛⲉⲕⲃⲁⲗ ⲉⲃⲟⲗ ⲛⲟⲩⲥϩⲓⲙⲉ ⲛⲥⲁⲓⲏ ⲁⲩⲱ ⲙⲡⲣⲙⲟⲩϣⲧ ⲛⲟⲩⲥⲁ ⲙⲡⲱⲕ ⲁⲛ ⲡⲉ ⲁϩⲁϩ ⲁⲩⲥⲱⲣⲙ ϩⲙ ⲡⲥⲁ ⲛⲛⲉϩⲓⲟⲙⲉ ⲁⲩⲱ ⲉⲃⲟⲗ ϩⲙ ⲡⲁⲓ ϣⲁⲣⲉⲟⲩⲙⲛⲧϣⲃⲏⲣⲙⲟⲩϩ ⲛⲑⲉ ⲛⲟⲩⲕⲱϩⲧ

9:9  ⲙⲡⲣϩⲙⲟⲟⲥ ⲗⲁⲁⲩ ϩⲁⲧⲛ ⲟⲩⲥϩⲓⲙⲉ ⲉⲩⲛⲧⲥϩⲁⲓ ⲁⲩⲱ ⲙⲡⲣϯⲥⲩⲙⲃⲟⲗⲏ ⲛⲙⲙⲁⲥ ⲉⲩⲏⲣⲡ ⲙⲏⲡⲟⲧⲉ ⲛⲧⲉⲡⲉⲕϩⲏⲧⲣⲁⲕⲧⲕ ⲉϫⲱⲥ ⲛⲅⲥⲗⲁⲁⲧⲉ ϩⲙ ⲡⲉⲕⲡⲛⲉⲩⲙⲁ ⲉⲡⲧⲁⲕⲟ

9:10  ⲙⲡⲣⲕⲱ ⲛⲥⲱⲕ ⲛⲟⲩϣⲃⲏⲣ ⲛⲁⲥ: ⲙⲡⲃⲣⲣⲉ ⲅⲁⲣ ϣⲏϣ ⲛⲙⲙⲁϥ ⲁⲛ ϫⲉ ⲛⲑⲉ ⲛⲟⲩⲏⲣⲡ ⲃⲃⲣⲣⲉ ⲧⲁⲓ ⲧⲉ ⲑⲉ ⲛⲟⲩϣⲃⲏⲣ ⲃⲃⲣⲣⲉ ⲉϣⲱⲡⲉ ⲉϥϣⲁⲛⲱⲥⲕ ϣⲁⲕⲥⲟⲟϥ ϩⲛ ⲟⲩⲟⲩⲛⲟϥ

9:11  ⲙⲡⲣⲕⲱϩ ⲉⲡⲉⲟⲟⲩ ⲙⲡⲣⲉϥⲣⲛⲟⲃⲉ ⲛⲅⲥⲟⲟⲩⲛ ⲅⲁⲣ ⲁⲛ ϫⲉ ⲟⲩ ⲡⲉ ⲡⲉϥϣⲟⲣϣⲣ

9:12  ⲙⲡⲣⲟⲩⲱϣ ϩⲛ ⲛⲟⲩⲱϣ ⲛⲛⲁⲥⲉⲃⲏⲥ ⲁⲣⲓⲡⲙⲉⲉⲩⲉ ϫⲉ ⲛⲥⲉⲛⲁⲧⲙⲁⲓⲟ ⲁⲛ ϣⲁ ⲁⲙⲛⲧⲉ

9:13  ⲥⲁϩⲱⲕ ⲉⲃⲟⲗ ⲛⲟⲩⲣⲱⲙⲉ ⲉⲩⲛⲧϥⲧⲉⲝⲟⲩⲥⲓⲁ ⲛϩⲱⲧⲃ ⲁⲩⲱ ⲛⲛⲉⲕⲙⲉⲉⲩⲉ ⲉⲑⲟⲧⲉ ⲙⲡⲙⲟⲩ ⲕⲁⲛ ⲉⲕϣⲁⲛϯⲡⲉⲕⲟⲩⲟⲓ ⲉⲣⲟϥ ⲙⲡⲣⲣⲛⲟⲃⲉ ϫⲉⲕⲁⲁⲥ ⲉⲛⲛⲉϥϥⲓ ⲙⲡⲉⲕⲱⲛϩ ⲉⲓⲙⲉ ϫⲉ ⲉⲕⲙⲟⲟϣⲉ ϩⲛ ⲧⲙⲏⲧⲉ ⲛϩⲉⲛϭⲟⲣϭⲥ ⲁⲩⲱ ϩⲓϫⲛ ⲛⲥⲟⲃⲧ ⲛⲟⲩⲡⲟⲗⲓⲥ

9:14  ⲕⲁⲧⲁ ⲧⲉⲕϭⲟⲙ ϯϩⲧⲏⲕ ⲉⲣⲟⲕ ⲉⲡⲉⲧϩⲓⲧⲟⲩⲱⲕ ⲁⲩⲱ ⲛⲅϫⲓϣⲟϫⲛⲉ ⲙⲛ ϩⲉⲛⲥⲟⲫⲟⲥ

9:15  ⲙⲁⲣⲉⲡⲉⲕϣⲟϫⲛⲉϣⲱⲡⲉ ⲙⲛ ϩⲉⲛⲥⲁⲃⲉ ⲁⲩⲱ ⲛⲉⲕϣⲁϫⲉ ⲧⲏⲣⲟⲩ ϩⲙ ⲡⲛⲟⲙⲟⲥ ⲙⲡⲉⲧϫⲟⲥⲉ

9:16  ⲙⲁⲣⲉϩⲉⲛⲣⲱⲙⲉ ⲛⲇⲓⲕⲁⲓⲟⲥ ϣⲱⲡⲉ ⲛϣⲃⲏⲣⲟⲩⲱⲙ ϩⲓ ⲥⲱ ⲁⲩⲱ ⲙⲁⲣⲉⲡⲉⲕϣⲟⲩϣⲟⲩϣⲱⲡⲉ ϩⲛ ⲑⲟⲧⲉ ⲙⲡϫⲟⲉⲓⲥ

9:17  ϣⲁⲩⲧⲁⲓⲉⲫⲱⲃ ϩⲛ ⲧϭⲓϫ ⲙⲡⲣⲉϥⲣⲉⲓⲟⲡⲉ ⲁⲩⲱ ⲡⲛⲟϭ ⲛⲟⲩⲗⲁⲟⲥ ⲟⲩⲥⲟⲫⲟⲥ ⲡⲉ ϩⲙ ⲡⲉϥϣⲁϫⲉ

9:18  ⲟⲩⲣⲉϥϯϩⲟⲧⲉ ϩⲛ ⲧⲉϥⲡⲟⲗⲓⲥ ⲡⲉ ⲟⲩⲣⲱⲙⲉ ⲛⲣⲉϥⲱϣ ⲉⲃⲟⲗ ⲁⲩⲱ ϣⲁⲩⲙⲉⲥⲧⲉⲡⲣⲉϥϥⲟϭϥ ⲉⲃⲟⲗ ϩⲙ ⲡⲉϥϣⲁϫⲉ