CopSahBible2 - Sirach - 4

4:1  ⲡⲁϣⲏⲣⲉ ⲙⲡⲣϩⲟⲩⲣⲱⲟⲩϩⲏⲕⲉ ⲙⲡⲉϥⲱⲛϩ ⲁⲩⲱ ⲙⲡⲣ[ⲕⲧⲉⲛⲉⲕ]ⲃⲁⲗ ⲉⲃⲟⲗ ⲛⲛⲉⲧϣⲁⲁⲧ

4:2  ⲙⲡⲣⲗⲩⲡⲓ ⲛⲟⲩⲯⲩⲭⲏ ⲉⲥϩⲕⲁⲉⲓⲧ ⲙⲡⲣϯⲛⲟⲩϭⲥ ⲛⲟⲩⲣⲱⲙⲉ ϩⲙ ⲡⲉϥϩⲃⲁ

4:3  ⲙⲡⲣϣⲧⲣⲧⲣⲟⲩϩⲏⲧ ⲉϥⲛⲟϭⲥ ⲙⲡⲣⲟⲃϣⲕ ⲉⲡϯ ⲙⲡⲉⲧⲣϭⲣⲱϩ

4:4  ⲙⲡⲣⲕⲱ ⲛⲥⲱⲕ ⲙⲡⲉⲧⲥⲟⲡⲥ ⲙⲙⲟⲕ ⲉϥⲑⲗⲓⲃⲉ ⲙⲡⲣⲕⲧⲉⲡⲉⲕϩⲟ ⲉⲃⲟⲗ ⲛⲟⲩϩⲏⲕⲉ

4:5  ⲙⲡⲣⲕⲧⲉⲛⲉⲕⲃⲁⲗ ⲉⲃⲟⲗ ⲙⲡⲉⲧϣⲁⲁⲧ ⲙⲡⲣϯⲑⲉ ⲛⲟⲩⲣⲱⲙⲉ ⲉⲧⲣⲉϥⲥϩⲟⲩⲱⲣⲕ

4:6  ⲉϥϣⲁⲛⲥϩⲟⲩⲱⲣⲕ ⲅⲁⲣ ϩⲙ ⲡⲛⲟⲩϭⲥ ⲛⲧⲉϥⲯⲩⲭⲏ ⲡⲉⲛⲧⲁϥⲧⲁⲙⲓⲟϥⲛⲁⲥⲱⲧⲙ ⲉⲡⲉϥⲥⲟⲡⲥ

4:7  ⲁⲁⲕ ⲛϣⲟⲩⲙⲉⲣⲓⲧ ⲛⲧⲉⲕⲥⲩⲛⲁⲅⲱⲅⲏ ⲛⲅⲧϩⲃⲃⲓⲉⲧⲉⲕⲁⲡⲉ ⲙⲡⲉⲕⲛⲟϭ

4:8  ⲣⲓⲕⲉⲡⲉⲕⲙⲁⲁϫⲉ ⲉⲩϩⲏⲕⲉ ⲁⲩⲱ ⲛⲅⲟⲩⲱϣⲃ ⲛⲁϥ ϩⲛ ϩⲉⲛϣⲁϫⲉ ⲛⲉⲓⲣⲏⲛⲏ ϩⲛ ⲟⲩⲙⲛⲧⲣⲙⲣⲁϣ

4:9  ⲛⲉϩⲙⲡⲉⲧϫⲏⲩ ⲛϭⲟⲛⲥ ⲉⲧϭⲓϫ ⲙⲡⲉⲧϫⲓ ⲙⲙⲟϥ ⲛϭⲟⲛⲥ ⲙⲡⲣⲣⲕⲟⲩⲉⲓ ⲛϩⲏⲧ ϩⲛ ⲧⲉⲕⲯⲩⲭⲏ ⲉⲕⲛⲁϯϩⲁⲡ

4:10  ϣⲱⲡⲉ ⲉⲕⲟ ⲛⲑⲉ ⲛⲉⲓⲱⲧ ⲛⲛⲓⲟⲣⲫⲁⲛⲟⲥ ⲛⲅⲣⲡⲙⲁ ⲛⲟⲩϩⲁⲓ ⲛⲧⲉⲩⲙⲁⲁⲩ ⲧⲁⲣⲉⲕϣⲱⲡⲉ ⲛϣⲏⲣⲉ ⲙⲡⲉⲧϫⲟⲥⲉ ⲛⲧⲉⲧⲉⲕⲙⲁⲁⲩⲙⲉⲣⲓⲧⲕ ⲛϩⲟⲩⲟ

4:11  ⲧⲥⲟⲫⲓⲁ ⲁⲥϫⲓⲥⲉ ⲛⲛⲉⲥϣⲏⲣⲉ ⲁⲩⲱ ϣⲁⲥϣⲱⲡ ⲉⲣⲟⲥ ⲛⲛⲉⲧϣⲓⲛⲉ ⲛⲥⲱⲥ

4:12  ⲡⲉⲧⲙⲉ ⲙⲙⲟⲥ ⲉϥⲙⲉ ⲙⲡⲱⲛⲉϩ ⲁⲩⲱ ⲛⲉⲧϣⲱⲣⲡ ⲙⲙⲟⲟⲩ ⲉⲣⲟⲥ ⲥⲉⲛⲁⲥⲓ ⲛⲟⲩⲟⲩⲛⲟϥ

4:13  ⲡⲉⲧⲁⲙⲁϩⲧⲉ ⲙⲙⲟⲥ ⲛⲁⲕⲗⲏⲣⲟⲛⲟⲙⲓ ⲛⲟⲩⲉⲟⲟⲩ ⲁⲩⲱ ⲡⲙⲁ ⲉⲧⲥⲛⲁⲃⲱⲕ ⲉϩⲟⲩⲛ ⲉⲣⲟϥ ϣⲁⲣⲉⲡϫⲟⲉⲓⲥⲥⲙⲁⲙⲟⲩⲟⲩϥ

4:14  ⲛⲉⲧϣⲙϣⲉ ⲛⲁⲥ ⲉⲩⲉϣⲙϣⲉ ⲙⲡⲉⲧⲟⲩⲁⲁⲃ ⲁⲩⲱ ⲛⲉⲧⲙⲉ ⲙⲙⲟⲥ ⲡϫⲟⲉⲓⲥ ⲙⲉ ⲙⲙⲟⲟⲩ

4:15  ⲡⲉⲧⲥⲱⲧⲙ ⲛⲥⲱⲥ ⲛⲁⲕⲣⲓⲛⲉ ⲛⲛϩⲉⲑⲛⲟⲥ ⲡⲉⲧⲕⲱ ⲛϩⲏⲧϥ ⲉⲣⲟⲥ ⲛⲁⲟⲩⲱϩ ⲉϥⲧⲁϫⲣⲏⲩ

4:16  ⲉϣⲱⲡⲉ ⲉⲕϣⲁⲛⲡⲓⲥⲧⲉⲩⲉ ⲕⲛⲁⲕⲗⲏⲣⲟⲛⲟⲙⲉⲓ ⲙⲙⲟⲥ ⲁⲩⲱ ⲛⲉϥⲅⲉⲛⲉⲁⲛⲁϣⲱⲡⲉ ϩⲛ ⲟⲩⲙⲁ ⲛⲁⲙⲁϩⲧⲉ

4:17  ⲥⲛⲁⲥⲟⲧⲡϥ ⲛϣⲟⲣⲡ ϩⲛ ⲟⲩϭⲱⲱⲙⲉ ⲥⲛⲁⲧⲟⲩⲛⲥ ⲛⲟⲩϩⲟⲧⲉ ⲙⲛ ⲟⲩⲙⲛⲧϭⲱⲃ ⲉϩⲣⲁⲓ ⲉϫⲱϥ ⲛⲥⲃⲁⲥⲁⲛⲓⲍⲉ ⲙⲙⲟϥ ϩⲛ ⲧⲉⲥⲥⲃⲱ ϣⲁⲛⲧⲥⲧⲁⲛϩⲟⲩⲧⲥ ⲙⲛ ⲧⲉϥⲯⲩⲭⲏ ⲁⲩⲱ ⲥⲛⲁⲡⲓⲣⲁⲍⲉ ⲙⲙⲟϥ ϩⲛ ⲛⲉⲥⲇⲓⲕⲁⲓⲱⲙⲁ

4:18  ⲁⲩⲱ ⲥⲛⲁⲕⲟⲧⲥ ⲟⲛ ⲉⲣⲟϥ ϩⲛ ⲟⲩⲥⲟⲟⲩⲧⲛ ⲛⲥⲉⲩⲫⲣⲁⲛⲉ ⲙⲙⲟϥ ⲛⲥϭⲱⲗⲡ ⲛⲁϥ ⲉⲃⲟⲗ ⲛⲉⲥⲡⲉⲑⲏⲡ

4:19  ⲉϣⲱⲡⲉ ⲉϥϣⲁⲛⲥⲱⲣⲙ ⲥⲛⲁⲕⲁⲁϥ ⲛⲥⲱⲥ ⲛⲥⲧⲁⲁϥ ⲉⲛϭⲓϫ ⲙⲡⲉϥϩⲉ

4:20  ϯϩⲧⲏⲕ ⲉⲡⲉⲩⲟⲉⲓϣ ⲛⲅⲁⲣⲉϩ ⲉⲣⲟⲕ ⲉⲡⲡⲉⲑⲟⲟⲩ ⲁⲩⲱ ⲙⲡⲣϫⲓϣⲓⲡⲉ ⲉⲧⲃⲉ ⲧⲉⲕⲙⲛⲧⲁⲧⲥⲃⲱ

4:21  ⲟⲩⲛⲟⲩϣⲓⲡⲉ ⲅⲁⲣ ⲉϣⲁϥⲉⲓⲛⲉ ⲙⲡⲛⲟⲃⲉ ⲁⲩⲱ ⲟⲩⲛⲟⲩϣⲓⲡⲉ ⲉⲩⲉⲟⲟⲩ ⲡⲉ ⲙⲛ ⲟⲩⲭⲁⲣⲓⲥ

4:22  ⲙⲡⲣϫⲓϩⲟ ⲉⲩⲡⲉⲑⲟⲟⲩ ⲛⲧⲉⲕⲯⲩⲭⲏ ⲁⲩⲱ ⲙⲡⲣϣⲓⲡⲉ ϩⲙ ⲡⲉⲕϩⲉ

4:23  ⲙⲡⲣⲁⲙⲁϩⲧⲉ ⲛⲟⲩϣⲁϫⲉ ⲛⲟⲩⲟⲩⲟⲉⲓϣ ⲛⲟⲩϫⲁⲓ

4:24  ⲉϣⲁⲩⲥⲟⲩⲛⲧⲥⲟⲫⲓⲁ ⲅⲁⲣ ϩⲙ ⲡϣⲁϫⲉ ⲁⲩⲱ ⲧⲉⲥⲃⲱ ϩⲙ ⲡϣⲁϫⲉ ⲙⲡⲗⲁⲥ

4:25  ⲙⲡⲣϯ ⲟⲩⲃⲉ ⲧⲙⲉ ⲁⲩⲱ ⲛⲅϫⲓϣⲓⲡⲉ ⲉⲧⲃⲉ ⲧⲉⲕⲙⲛⲧⲁⲧⲥⲃⲱ

4:26  ⲙⲡⲣϣⲓⲡⲉ ⲉϩⲟⲙⲟⲗⲟⲅⲉⲓ ⲛⲛⲉⲕⲛⲟⲃⲉ ⲙⲡⲣⲁⲙⲁϩⲧⲉ ⲛⲟⲩⲉⲓⲉⲣⲟ ⲉϥⲥⲱⲕ

4:27  ⲙⲡⲣⲡⲟⲣϣⲕ ⲉⲃⲟⲗ ϩⲁⲧⲛ ⲟⲩⲣⲱⲙⲉ ⲛⲥⲟϭ ⲙⲡⲣϫⲓⲫⲟ ⲛⲟⲩϫⲱⲱⲣⲉ

4:28  ⲙⲓϣⲉ ⲉϫⲛ ⲧⲙⲉ ϣⲁϩⲣⲁⲓ ⲉⲡⲙⲟⲩ ϫⲉ ⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲙⲓϣⲉ ⲉϩⲣⲁⲓ ⲉϫⲱⲕ

4:29  ⲙⲡⲣⲣⲣⲉϥϭⲉⲡⲏ ⲉϣⲁϫⲉ ⲉⲕⲟⲩⲟϣϥ ⲉⲕⲃⲏⲗ ⲉⲃⲟⲗ ϩⲛ ⲛⲉⲕϩⲃⲏⲩⲉ

4:30  ⲙⲡⲣⲣⲑⲉ ⲛⲛⲓⲙⲟⲩⲉⲓ ϩⲙ ⲡⲉⲕⲏⲉⲓ ⲉⲕⲟ ⲛⲧⲣⲁϩ ϩⲛ ⲛⲉⲕϩⲙϩⲁⲗ

4:31  ⲙⲡⲣⲧⲣⲉⲧⲉⲕϭⲓϫϣⲱⲡⲉ ⲉⲥⲥⲟⲩⲧⲱⲛ ⲉⲃⲟⲗ ⲉϫⲓ ⲛⲅⲉⲓ ⲉⲕⲛⲁϯ ⲛⲅⲛⲧⲥ ⲉⲣⲟⲕ