CopSahBible2 - Sirach - 43

43:1  ⲡϣⲟⲩϣⲟⲩ ⲙⲡϫⲓⲥⲉ ⲙⲡⲧⲃⲃⲟ ⲙⲡⲉⲥⲧⲉⲣⲉⲱⲙⲁ ……ⲟⲩϩⲟⲣⲟⲙⲁ ⲛⲉⲟⲟⲩ

43:2  [ⲡⲣⲏ ⲉϥϣⲁⲛ]ϣⲁ ⲉϥⲟⲩⲱⲛϩ ⲉⲃⲟⲗ ϩⲙ ⲡⲉϥ[ⲉⲓ ⲉ]ⲃⲟⲗ [ⲟⲩ]ⲥⲕⲉⲩⲟⲥ ⲛϣⲡⲏⲣⲉ ⲡⲉ ⲟⲩϩⲱⲃ ⲛⲧⲉ ⲡⲉⲧϫⲟⲥⲉ ⲡⲉ

43:3  ϩⲙ ⲡⲛⲁⲩ ⲙⲙⲉⲉⲣⲉ ϣⲁϥϣⲉϩⲃⲛⲉⲭⲱⲣⲁ ⲁⲩⲱ ⲛⲓⲙ ⲡⲉⲧⲛⲁϣⲱϩ ⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡⲉϥⲕⲁⲩⲙⲁ

43:4  ⲟⲩϩⲣⲱ ⲉⲩⲛⲓϥⲉ ⲉⲣⲟⲥ ⲉϫⲉⲣⲉϩⲛϩⲃⲏⲩⲉ ⲡⲣⲏ ⲣⲱⲕϩ ⲛⲛⲧⲟⲟⲩ ⲛϣⲙⲧⲕⲱⲃ ⲉϩⲟⲩⲉⲣⲟⲥ ⲉϥⲛⲓϥⲉ ⲛϩⲛⲗϩⲱⲃ ⲛⲕⲱϩⲧ ⲁⲩⲱ ϣⲁϥϯϩⲗⲟⲥⲧⲛ ⲛⲛⲃⲁⲗ ⲉϥⲧⲁⲁⲧⲉ ⲛⲛⲉϥⲁⲕⲧⲓⲛ

43:5  ⲟⲩⲛⲟϭ ⲡⲉ ⲡϫⲟⲉⲓⲥ ⲉⲛⲧⲁϥⲧⲁⲙⲓⲟϥ ⲁⲩⲱ ϩⲣⲁⲓ ϩⲛ ⲛⲉϥϣⲁϫⲉ ⲁϥϭⲉⲡⲏ ϩⲛ ⲧⲉϥϩⲓⲏ

43:6  ⲁⲩⲱ ⲡⲟⲟϩ ⟨ϩⲛ⟩(?) ϩⲱⲃ ⲛⲓⲙ ⲙⲡⲉϥⲟⲩⲟⲉⲓϣ ⲡⲟⲩⲱⲛϩ ⲉⲃⲟⲗ ⲛⲛⲉϥⲟⲩⲟⲉⲓϣ ⲡⲉ ⲁⲩⲱ ⲡⲙⲁⲉⲓⲛ ⲛϣⲁⲉⲛⲉϩ ⲡⲉ

43:7  ⲉⲣⲉⲡⲙⲁⲉⲓⲛ ⲙⲡϣⲁ ⲉⲃⲟⲗ ϩⲙ ⲡⲟⲟϩ ⲡⲣⲉϥⲣⲟⲩⲟⲉⲓⲛ ⲉϥϭⲱϫⲃ ϩⲛ ⲧⲉϥϩⲁⲏ

43:8  ⲉⲩⲙⲟⲩⲧⲉ ⲉⲡⲉⲃⲟⲧ ⲕⲁⲧⲁ ⲡⲉϥⲣⲁⲛ ⲟⲩϣⲡⲏⲣⲉ ⲡⲉ ϩⲙ ⲡⲉϥⲙⲟⲩϩ ⲉϥϣⲓⲃⲉ ⲡⲉⲥⲕⲉⲩⲟⲥ ⲛⲙⲡⲁⲣⲁⲃⲟⲗⲏ ⲙⲡϫⲓⲥⲉ ⲉϥⲣⲟⲩⲟⲉⲓⲛ ϩⲙ ⲡⲉⲥⲧⲉⲣⲉⲱⲙⲁ ⲛⲧⲡⲉ

43:9  ⲡⲥⲁ ⲛⲧⲡⲉ ⲡⲉⲟⲟⲩ ⲛⲛⲥⲓⲟⲩ ⲡϫⲟⲉⲓⲥ ⲡⲉⲧⲧⲁⲙⲓⲟ ⲉⲧⲣⲟⲩⲟⲉⲓⲛ ϩⲛ ⲛⲉⲧϫⲟⲥⲉ

43:10  ϩⲣⲁⲓ ϩⲛ ⲛⲉϥϣⲁϫⲉ ⲥⲉⲛ[ⲁ……] ⲁⲩⲱ ⲛⲉⲩⲃⲱⲗ ⲉⲃⲟⲗ ϩⲛⲛⲉ[ⲩ……]

43:11  ⲁⲛⲁⲩ ⲉⲧⲡⲓⲧⲉ ⲛⲅⲥⲙⲟⲩ ⲉⲡⲉⲛⲧⲁϥ[ⲧⲁ]ⲙⲓⲟⲥ ⲛⲉⲥⲱⲥ ⲉⲙⲁⲧⲉ ϩⲙ ⲡⲉⲥⲟⲩⲟⲉⲓⲛ

43:12  ⲁⲥⲕⲧⲉⲧⲡⲉ ⲙⲡⲕⲱⲧⲉ ⲙⲡⲉⲥⲉⲟⲟⲩ ⲛϭⲓϫ ⲙⲡϫⲟⲉⲓⲥ ⲛⲉⲛⲧⲁⲩϫⲟⲕⲥ ⲉⲃⲟⲗ

43:13  ϩⲣⲁⲓ ϩⲙ ⲡⲉϥⲟⲩⲉϩⲥⲁϩⲛⲉ ⲁϥϫⲉⲣⲉⲡⲉⲭⲓⲱⲛ ⲁⲩⲱ ϣⲁϥϫⲉⲣⲙⲛⲉⲃⲣⲏϭⲉ ϩⲙ ⲡⲉϥⲧⲱϣ

43:14  ⲁⲩⲱ ⲁⲛⲉⲕⲗⲟⲟⲗⲉ ⲉⲓ ⲉϩⲣⲁⲓ ⲛⲑⲉ ⲛⲛⲉⲧϩⲏⲗ ⲁⲛⲁϩⲱⲣ ⲟⲩⲱⲛ ⲉⲧⲃⲉ ⲡⲁⲓ

43:15  ⲁϥϯϭⲟⲙ ⲛⲛⲉⲕⲗⲟⲟⲗⲉ ⲛⲧⲉϥⲙⲛⲧⲛⲟϭ ⲁⲩⲱ ⲁϥϫⲱⲱⲣⲉ ⲉⲃⲟⲗ ⲛⲛⲱⲛⲉ ⲛⲧⲉⲭⲁⲗⲁⲍⲁ

43:16  ⲁⲩⲱ ⲛⲧⲟⲟⲩ ⲛⲁⲕⲓⲙ ϩⲙ ⲡⲉϥⲟⲩⲱⲛϩ ⲉⲃⲟⲗ ⲉⲣⲉⲡⲧⲟⲩⲣⲏⲥ ⲛⲁⲥⲱⲕ ϩⲙ ⲡⲉϥⲟⲩⲱϣ

43:17  (a) ⲁϥⲧⲣⲉⲡⲕⲁϩ ϯⲛⲁⲁⲕⲉ ϩⲙ ⲡⲉϩⲣⲟⲟⲩ ⲛⲛⲉϥϩⲣⲟⲩⲃⲃⲁⲓ (b) ⲁⲩⲱ ⲑⲁⲧⲏⲩ ⲙⲡⲉⲙϩⲓⲧ ϩⲛ ⲟⲩⲕⲟⲧⲥ ⲛⲧⲏⲩ ϣⲁϥⲡⲏⲥⲥⲉ ⲙⲡⲉⲭⲓⲱⲛ ⲛⲑⲉ ⲛϩⲛϩⲁⲗⲏⲧ ⲉⲩϩⲏⲗ ⲁⲩⲱ ⲡⲉϥⲉⲓ ⲉϩⲣⲁⲓ ⲛⲑⲉ ⲛϩⲛϣϫⲉ ⲉⲩⲟⲩⲱϩ

43:18  ϣⲁⲣⲉⲡⲃⲁⲗ ϣⲧⲟⲣⲧⲣ ϩⲙ ⲡⲟⲩⲃⲁϣ ⲙⲡⲉϥⲛⲁ [ϣⲁⲣⲉⲫⲏⲧ ⲣ]ϣⲡⲏⲣⲉ ϩⲛ ⲧⲉϥϭⲓⲛϩⲱⲟⲩ

43:19  ……ⲡϫⲁϥ ⲉϫⲛ ⲡⲕⲁϩ ⲛⲑⲉ ⲛ[ⲟⲩϩ]ⲙⲟⲩ [ⲁⲩ]ⲱ ⲉϥϣⲁⲛⲱϭⲣ ϣⲁϥⲣⲑⲉ ⲛϩⲧⲏⲩ ⲛⲛⲥⲟⲩⲣⲉ

43:20  ϣⲁⲣⲉⲡⲉⲙϩⲓⲧ ⲥⲱⲕ ⲛⲟⲩⲧⲏⲩ ⲉϥⲕⲏⲃ ϣⲁⲣⲉⲡⲉⲕⲣⲩⲥⲧⲁⲗⲗⲟⲥ ⲱϭⲣ ϩⲓϫⲛ ⲙⲙⲟⲟⲩ ⲁⲩⲱ ⲉϥⲛⲛⲏⲩ ⲉϫⲛ ⲥⲟⲟⲩϩⲥ ⲛⲓⲙ ⲙⲙⲟⲟⲩ ⲁⲩⲱ ϣⲁϥϭⲗⲡⲙⲟⲟⲩ ⲛⲑⲉ ⲛⲟⲩϩⲱⲕ

43:21  ϥⲛⲁⲟⲩⲱⲙ ⲛⲛⲧⲟⲟⲩ ⲛϥⲣⲱⲕϩ ⲙⲡϫⲁⲉⲓⲉ ⲛϥϩⲉϭⲙⲛⲟⲩⲟⲧⲟⲩⲉⲧ ⲛⲑⲉ ⲛⲟⲩⲕⲱϩⲧ

43:22  ⲡⲧⲁⲗϭⲟ ⲛⲛⲁⲓ ⲧⲏⲣⲟⲩ ϩⲛ ⲟⲩⲥⲡⲟⲩⲇⲏ ⲡⲉ ⲡⲛⲓϥ ϣⲁⲣⲉⲟⲩⲉⲓⲱⲧⲉ ϯⲟⲩⲣⲟⲧ ⲛⲁⲩ ⲙⲛⲛⲥⲁ ⲟⲩϩⲙⲟⲙ

43:23  ϩⲣⲁⲓ ϩⲙ ⲡⲉϥϣⲟϫⲛⲉ ⲁϥⲥⲙⲛⲡⲛⲟⲩⲛ ⲁⲩⲱ ⲁⲓⲏⲥⲟⲩⲥ ϫⲟⲟϥⲉϥ

43:24  ⲛⲉⲧⲡⲗⲉⲁ ϩⲛ ⲑⲁⲗⲁⲥⲥⲁ ⲛⲉⲧϫⲱ ⲙⲡⲉⲥϭⲓⲛⲇⲩⲛⲟⲥ ⲁⲩⲱ ⲧⲛⲣϣⲡⲏⲣⲉ ⲛⲛⲉⲧⲛⲥⲱⲧⲙ ⲉⲣⲟⲟⲩ

43:25  ⲉⲣⲉⲛⲉϣⲡⲏⲣⲉ ⲙⲙⲁⲩ ⲙⲛ ⲛⲉϩⲃⲏⲩⲉ ⲉⲧⲟ ⲛⲁⲩⲉⲓ ⲛⲁⲩⲁⲛ ⲙⲛ ⲍⲱⲟⲛ ⲛⲓⲙ

43:26  ⲉⲣⲉⲡⲥⲟⲟⲩⲧⲛ ϣⲟⲟⲡ ⲉⲧⲃⲏⲧϥ ⲁⲩⲱ ⲡⲱϥ ⲡⲉ ⲡϫⲱⲕ ⲁⲩⲱ ⲉⲣⲉⲡⲧⲏⲣϥ ⲥⲙⲟⲛⲧ ϩⲙ ⲡⲉϥϣⲁϫⲉ

43:27  ⲧⲛⲛⲁⲩ ⲉϩⲁϩ ⲁⲩⲱ ⲧⲛⲛⲁϣⲡⲱϩ ⲉⲣⲟϥ ⲁⲛ ⲁⲩⲱ ⲡϫⲱⲕ ⲛⲛ.[… ⲛⲧⲟϥ ⲡⲉ] ⲡⲧⲏⲣϥ

43:28  ⲉⲛϯⲉⲟⲟⲩ ⲛⲁϥ ⲉⲛⲁϣⲡⲱϩ ⲉ[ⲟⲩ] ⲛⲧⲟϥ ⲅⲁⲣ ⲟⲩⲛⲟϭ ⲡⲉ ⲡⲁⲣⲁ ⲛⲉϥϩⲃ[ⲏⲩⲉ] ⲧⲏⲣⲟⲩ

43:29  ⲟⲩϩⲟⲧⲉ ⲡⲉ ⲡϫⲟⲉⲓⲥ ⲁⲩⲱ ⲟⲩⲛⲟϭ ⲉⲙⲁⲧⲉ ⲡⲉ ⲁⲩⲱ ⲟⲩϣⲡⲏⲣⲉ ⲧⲉ ⲧⲉϥϭⲟⲙ

43:30  ϫⲓⲥⲉ ⲙⲡϫⲟⲉⲓⲥ ⲉⲧⲉⲧⲛϯⲉⲟⲟⲩ ⲛⲁϥ ⲛⲑⲉ ⲉⲧⲉⲧⲛⲁϣⲁⲁⲥ ϥϫⲟⲥⲉ ⲅⲁⲣ ⲉϩⲟⲩⲟ ⲉⲣⲟⲥ ⲛϩⲟⲩⲟ ⲁⲩⲱ ⲙⲁⲧⲁϣⲟ ϩⲛ ⲟⲩϭⲟⲙ ⲉⲧⲉⲧⲛϫⲓⲥⲉ ⲙⲙⲟϥ ⲙⲡⲣϩⲓⲥⲉ ⲛⲛⲉⲧⲛⲉϣⲡⲱϩ ⲅⲁⲣ ⲉⲣⲟϥ

43:31  ⲛⲓⲙ ⲡⲉⲛⲧⲁϥⲛⲁⲩ ⲉⲣⲟϥ ⲧⲁⲣⲉϥϣⲁϫⲉ ⲉⲣⲟϥ ⲁⲩⲱ ⲛⲓⲙ ⲡⲉⲧⲛⲁϣϫⲁⲥⲧϥ ⲛⲑⲉ ⲉⲧϥⲟ ⲙⲙⲟⲥ

43:32  ϩⲛⲕⲟⲩⲓ ⲅⲁⲣ ⲛⲉⲛⲧⲁⲛⲛⲁⲩ ⲉⲣⲟⲟⲩ ϩⲛ ⲛⲉϥϩⲃⲏⲩⲉ ⲉⲩⲛϩⲁϩ ⲉⲩϩⲏⲡ ⲉⲩⲟ ⲛⲛⲟϭ ⲉⲛⲁⲓ

43:33  ⲡϫⲟⲉⲓⲥ ⲛⲧⲟϥ ⲡⲉⲛⲧⲁϥⲧⲁⲙⲓⲉⲛⲕⲁ ⲛⲓⲙ ⲁⲩⲱ ⲁϥϯ ⲛⲧⲥⲟⲫⲓⲁ ⲛⲛⲣⲙⲛⲛⲟⲩⲧⲉ