CopSahBible2 - Sirach - 10

10:1  ⲟⲩⲕⲣⲓⲧⲏⲥ ⲛⲥⲁⲃⲉ ϣⲁϥϯⲥⲃⲱ ⲙⲡⲉϥⲗⲁⲟⲥ ⲁⲩⲱ ⲑⲏⲅⲉⲙⲟⲛⲓⲁ ⲛⲟⲩⲥⲁⲃⲉ ⲛⲁϣⲱⲡⲉ ⲉⲥⲧⲏϣ

10:2  ⲛⲑⲉ ⲙⲡⲉⲕⲣⲓⲧⲏⲥ ⲛⲟⲩⲗⲁⲟⲥ ⲧⲁⲓ ⲧⲉ ⲑⲉ ⲛⲛⲉⲧϣⲙϣⲉ ⲛⲁϥ ⲛⲑⲉ ⲙⲡⲛⲟϭ ⲛⲟⲩⲡⲟⲗⲓⲥ ⲧⲁⲓ ⲧⲉ ⲑⲉ ⲛⲟⲩⲟⲛ ⲛⲓⲙ ⲉⲧⲟⲩⲏϩ ⲛϩⲏⲧⲥ

10:3  ⲟⲩⲣⲣⲟ ⲛⲁⲧⲥⲃⲱ ϣⲁϥⲥⲱⲣⲙ ⲙⲡⲉϥⲗⲁⲟⲥ ⲁⲩⲱ ϣⲁⲣⲉⲟⲩⲡⲟⲗⲓⲥϭⲱⲣϭ ϩⲛ ⲧⲙⲛⲧⲣⲙⲛϩⲏⲧ ⲛⲟⲩϫⲱⲱⲣⲉ

10:4  ⲉⲣⲉⲧⲉⲝⲟⲩⲥⲓⲁ ⲙⲡⲕⲁϩ ϩⲛ ⲧϭⲓϫ ⲙⲡϫⲟⲉⲓⲥ ⲁⲩⲱ ϣⲁϥⲧⲟⲩⲛⲉⲥⲡϣⲁⲩ ⲉϩⲣⲁⲓ ⲉϫⲱϥ ϩⲙ ⲡⲉⲩⲟⲉⲓϣ

10:5  ⲉⲣⲉⲡⲥⲟⲟⲩⲧⲛ ⲙⲡⲣⲱⲙⲉ ϩⲛ ⲧϭⲓϫ ⲙⲡϫⲟⲉⲓⲥ ⲁⲩⲱ ϣⲁϥϯⲡⲉϥⲉⲟⲟⲩ ϩⲓ ⲡϩⲟ ⲛⲟⲩⲅⲣⲁⲙⲙⲁⲧⲉⲩⲥ

10:6  ⲙⲡⲣⲛⲟⲩϭⲥ ⲉⲡⲉⲧϩⲓⲧⲟⲩⲱⲕ ϩⲓ ϫⲓⲛϭⲟⲛⲥ ⲛⲓⲙ ⲁⲩⲱ ⲙⲡⲣⲣⲗⲁⲁⲩ ⲛϩⲱⲃ ⲉϥⲥⲏϣ

10:7  ⲧⲙⲛⲧϫⲁⲥⲓϩⲏⲧ ϣⲁⲩⲙⲉⲥⲧⲱⲥ ϩⲓⲧⲙ ⲡϫⲟⲉⲓⲥ ⲙⲛ ⲣⲣⲱⲙⲉ ⲁⲩⲱ ⲉⲃⲟⲗ ϩⲓⲧⲟⲟⲧⲟⲩ ϩⲓ ⲟⲩⲥⲟⲡ ϣⲁⲥⲉⲓⲣⲉ ⲛⲟⲩϫⲓⲛϭⲟⲛⲥ

10:8  ϣⲁⲩⲡⲉⲛⲉⲟⲩⲙⲛⲧⲣⲣⲟ ⲉⲃⲟⲗ ϩⲛ ⲟⲩϩⲉⲑⲛⲟⲥ ⲉⲩϩⲉⲑⲛⲟⲥ ⲉⲧⲃⲉ ϫⲓⲛϭⲟⲛⲥ ϩⲓ ⲥⲱϣ ϩⲓ ⲭⲣⲏⲙⲁ

10:9  ⲁϩⲣⲟϥ ⲡⲕⲁϩ ⲙⲛ ⲡⲕⲣⲙⲉⲥ ϣⲟⲩϣⲟⲩ ⲙⲙⲟϥ ϫⲉ ⲛⲧⲁⲓⲛⲟⲩϫⲉ ⲛⲛⲉⲧⲡⲉϥϩⲟⲩⲛ ⲉⲟⲩϫⲁⲓ

10:10  ϣⲁⲣⲉⲟⲩⲥⲁⲉⲓⲛϭⲱϣⲧ ⲉⲃⲟⲗ ϩⲏⲧϥ ⲛⲟⲩϣⲱⲛⲉ ⲉⲛⲁϣⲱϥ ⲁⲩⲱ ⲡⲉⲧⲟ ⲛⲣⲣⲟ ⲙⲡⲟⲟⲩ ϥⲛⲁⲙⲟⲩ ⲣⲣⲁⲥⲧⲉ

10:11  ϩⲙ ⲡⲧⲣⲉⲡⲣⲱⲙⲉ ⲅⲁⲣ ⲙⲟⲩ ⲉⲣⲉϩⲛϫⲁⲧϥⲉ ⲙⲛ ϩⲛⲑⲏⲣⲓⲟⲛ ⲙⲛ ϩⲛϥⲛⲧ ⲛⲁⲕⲗⲏⲣⲟⲛⲟⲙⲓ ⲙⲙⲟϥ

10:12  ⲧⲁⲣⲭⲏ ⲛⲧⲙⲛⲧϫⲁⲥⲓϩⲏⲧ ⲡⲉ ⲡⲣⲱⲙⲉ ⲉⲁϥⲥⲁϩⲱϥ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲉⲁⲡⲉϥϩⲏⲧⲥⲁϩⲱϥ ⲉⲃⲟⲗ ⲙⲡⲉⲛⲧⲁϥⲧⲁⲙⲓⲟϥ

10:13  ϫⲉ ⲧⲁⲣⲭⲏ ⲛⲧⲙⲛⲧϫⲁⲥⲓϩⲏⲧ ⲡⲉ ⲡⲛⲟⲃⲉ ⲁⲩⲱ ⲡⲉⲧⲁⲙⲁϩⲧⲉ ⲙⲙⲟⲥ ⲛⲁⲃⲉⲉⲃⲉ ⲛⲧⲃⲟⲧⲉ ⲉⲧⲃⲉ ⲡⲁⲓ ⲁⲡϫⲟⲉⲓⲥⲧⲣⲉⲩⲣϣⲡⲏⲣⲉ ⲛⲛⲉϥⲙⲟⲕϩⲥ ⲁⲩⲱ ⲁϥϣⲣϣⲱⲣⲟⲩ ⲛϣⲁⲃⲟⲗ

10:14  ⲁⲡϫⲟⲉⲓⲥϣⲣϣⲣⲛⲉⲑⲣⲟⲛⲟⲥ ⲛⲛⲁⲣⲭⲱⲛ ⲁⲩⲱ ⲁϥⲑⲙⲥⲟ ⲛϩⲉⲛⲣⲙⲣⲁϣ ⲉⲡⲉⲩⲙⲁ

10:15  ⲁⲡϫⲟⲉⲓⲥⲡⲣⲕⲛⲛⲟⲩⲛⲉ ⲛⲛϩⲉⲑⲛⲟⲥ ⲁϥⲧⲱϭⲉ ⲛⲛⲉⲧⲑⲃⲃⲓⲏⲩ ⲉⲡⲉⲩⲙⲁ

10:16  ⲁⲡϫⲟⲉⲓⲥϣⲣϣⲣⲛⲉⲭⲱⲣⲁ ⲛⲛϩⲉⲑⲛⲟⲥ ⲁϥⲟϫⲛⲟⲩ ϣⲁ ⲛⲥⲛⲧⲉ ⲙⲡⲕⲁϩ

10:17  ⲁϥⲧⲣⲉϩⲟⲓⲛⲉ ⲛϩⲏⲧⲟⲩ ϣⲟⲟⲩⲉ ⲉⲁϥⲧⲁⲕⲟⲟⲩ ⲁϥϥⲓ ⲙⲡⲉⲩⲣⲡⲙⲉⲉⲩⲉ ϩⲓϫⲙ ⲡⲕⲁϩ

10:18  ⲙⲡⲟⲩⲥⲛⲧⲧⲙⲛⲧϫⲁⲥⲓϩⲏⲧ ⲛⲛⲣⲱⲙⲉ ⲟⲩⲇⲉ ⲧⲟⲣⲅⲏ ⲙⲡϭⲱⲛⲧ ⲛⲛϣⲏⲣⲉ ⲛⲛⲉϩⲓⲟⲙⲉ

10:19  ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲧⲁⲓⲏⲩ ⲡⲉⲥⲡⲉⲣⲙⲁ ⲛⲛⲣⲱⲙⲉ ⲡⲉ ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲧⲁⲓⲏⲩ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉ ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲥⲏϣ ⲡⲉⲥⲡⲉⲣⲙⲁ ⲛⲛⲣⲱⲙⲉ ⲡⲉ ⲡⲉⲥⲡⲉⲣⲙⲁ ⲉⲧⲥⲏϣ ⲡⲉ ⲛⲉⲧⲡⲁⲣⲁⲃⲁ ⲛⲛⲉⲛⲧⲟⲗⲏ

10:20  [ⲡⲉⲧⲧⲁⲓⲏⲩ ϩⲛ] ⲧⲙⲏⲏⲧⲉ ⲛϩⲉⲛⲥⲛⲏⲩ ⲡⲉ ⲡⲉⲩⲛⲟϭ ⲁⲩⲱ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉⲧϣⲟⲟⲡ ⲛⲛⲁϩⲣⲁϥ

10:22  ⲟⲩⲡⲣⲟⲥⲏⲗⲩⲧⲟⲥ ⲙⲛ ⲟⲩⲣⲙⲙⲁⲟ ⲙⲛ ⲟⲩϣⲙⲙⲟ ⲁⲩⲱ ⲡⲉⲧⲧⲁⲓⲏⲩ ⲙⲛ ⲫⲏⲕⲉ ⲡⲉⲩϣⲟⲩϣⲟⲩ ⲡⲉ ⲑⲟⲧⲉ ⲙⲡϫⲟⲉⲓⲥ

10:23  ⲛϣϣⲉ ⲁⲛ ⲉⲥⲉϣⲟⲩϩⲏⲕⲉ ⲛⲥⲁⲃⲉ ⲁⲩⲱ ⲛϣϣⲉ ⲁⲛ ⲉϯⲉⲟⲟⲩ ⲛⲟⲩⲣⲱⲙⲉ ⲛⲣⲉϥⲣⲛⲟⲃⲉ

10:24  ⲟⲩⲛⲟϭ ⲙⲛ ⲟⲩⲣⲉϥϯϩⲁⲡ ⲙⲛ ⲟⲩϫⲱⲱⲣⲉ ⲛⲉ ⲉϣⲁⲩϫⲓⲉⲟⲟⲩ ⲙⲛ ⲡⲉⲧⲟ ⲛⲛⲟϭ ⲛϩⲏⲧⲟⲩ ⲉⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ

10:25  ⲛⲣⲙϩⲉ ⲛⲁϣⲙϣⲉ ⲛⲛϩⲙϩⲁⲗ ⲛⲥⲁⲃⲉ ⲁⲩⲱ ⲟⲩⲣⲱⲙⲉ ⲛⲣⲙⲛϩⲏⲧ ⲙⲉϥⲕⲣⲙⲣⲙ

10:26  ⲙⲡⲣϯⲥⲁⲕ ⲙⲙⲟⲕ ⲉⲣⲡⲉⲕϩⲱⲃ ⲁⲩⲱ ⲙⲡⲣϯⲉⲟⲟⲩ ⲛⲁⲕ ϩⲙ ⲡⲉⲟⲩⲟⲉⲓϣ ⲙⲡⲉⲕϩⲟϫϩϫ

10:27  ⲛⲁⲛⲟⲩⲥ ⲅⲁⲣ ⲉⲕⲣϩⲱⲃ ⲉⲕⲣϩⲟⲩⲟ ⲛⲛⲕⲁ ⲛⲓⲙ ⲉϩⲟⲩⲟ ⲉⲕϯⲉⲟⲟⲩ ⲛⲁⲕ ⲉⲕⲣϭⲣⲱϩ ⲙⲡⲟⲓⲕ

10:28  ⲡⲁϣⲏⲣⲉ ⲙⲁⲧⲥⲁⲃⲉⲧⲉⲕⲯⲩⲭⲏ ⲉⲩⲙⲛⲧⲣⲙⲣⲁϣ ⲛⲅϯ ⲛⲁⲥ ⲛⲟⲩⲧⲁⲓⲟ ⲕⲁⲧⲁ ⲡⲉⲥⲙⲡϣⲁ

10:29  ⲛⲓⲙ ⲡⲉⲧⲛⲁⲧⲙⲁⲓⲉⲡⲉⲧⲣⲛⲟⲃⲉ ⲉⲧⲉϥⲯⲩⲭⲏ ⲁⲩⲱ ⲛⲓⲙ ⲡⲉⲧⲛⲁⲧⲙⲁⲓⲉⲡⲉⲧϣⲱⲥ ⲙⲡⲉϥⲱⲛϩ

10:31  ⲡⲉⲧⲧⲁⲓⲏⲩ ϩⲛ ⲧⲉϥⲙⲛⲧⲣⲙⲙⲁⲟ ϥϩⲛ ⲟⲩⲛⲟϭ ⲙⲙⲛⲧϩⲏⲕⲉ ⲁⲩⲱ ⲡⲉⲧⲥⲏϣ ϩⲛ ⲧⲉϥⲙⲛⲧϩⲏⲕⲉ ϥϩⲛ ⲟⲩⲛⲟϭ ⲙⲙⲛⲧⲣⲙⲙⲁⲟ