CopSahBible2 - Sirach - 14

14:1  ⲛⲁⲓⲁⲧϥ ⲙⲡⲣⲱⲙⲉ ⲉⲧⲉ ⲙⲡϥⲥⲗⲁⲁⲧⲉ ϩⲛ ⲣⲱϥ ⲁⲩⲱ ⲉⲙⲡϥⲙⲕⲁϩ ⲛϩⲏⲧ ϩⲛ ⲧⲗⲩⲡⲏ ⲙⲡⲛⲟⲃⲉ

14:2  ⲛⲁⲓⲁⲧϥ ⲙⲡⲣⲱⲙⲉ ⲉⲧⲉ ⲙⲡⲉⲡⲉϥϩⲏⲧϭⲛⲁⲣⲓⲕⲉ ⲉⲣⲟϥ ⲁⲩⲱ ⲉⲙⲡϥϩⲉ ⲉⲃⲟⲗ ϩⲛ ⲧⲉϥϩⲉⲗⲡⲓⲥ

14:3  ⲛⲁⲛⲟⲩ ⲧⲙⲛⲧⲣⲙⲙⲁⲟ ⲁⲛ ⲛⲟⲩⲣⲱⲙⲉ ⲛϫⲓϥ ⲁⲩⲱ ⲉⲣⲉ ⲟⲩⲣⲱⲙⲉ ⲛⲉⲓⲉⲣⲃⲟⲟⲛⲉ ⲛⲁⲣⲟⲩ ⲛϩⲉⲛⲭⲣⲏⲙⲁ

14:4  ⲡⲉⲧϭⲱ ⲙⲙⲟⲟⲩ ⲉⲧⲉϥⲯⲩⲭⲏ ⲉϥⲛⲁⲥⲟⲟⲩϩⲟⲩ ⲛϩⲉⲛⲕⲟⲟⲩⲉ ⲁⲩⲱ ϩⲛⲕⲟⲟⲩⲉ ⲛⲉⲧⲛⲁⲧⲣⲩⲫⲁ ϩⲛ ⲛⲉϥⲁⲅⲁⲑⲟⲛ

14:5  ⲡⲉⲧⲟ ⲛⲉⲓⲉⲣⲃⲟⲟⲛⲉ ⲉⲣⲟϥ ⲉϥⲛⲁⲣⲁⲅⲁⲑⲟⲥ ⲛⲛⲓⲙ ⲁⲩⲱ

14:6  ⲡⲉⲧ ⲡ [ⲉⲣ]ⲟϥ ⲁⲩⲱ ⲛⲧⲉϥ[ⲕⲁⲕⲓⲁ]

14:7  ⲕⲁⲛ ⲉϥ[ϣⲁⲛⲣⲡ]ⲉⲧⲛⲁⲛⲟⲩϥ ⲉϣⲁϥⲁⲁϥ ϫ ⲉⲩⲉϫⲟⲟⲩ ⲛⲥⲱϥ ⲁⲩⲱ ϩⲛ ⲑⲁⲏ ϣⲁϥⲟⲩⲱⲛϩ ⲉ[ⲃⲟⲗ ⲛⲧⲉ]ϥⲕⲁⲕⲓⲁ

14:8  ⲟⲩⲡⲟⲛⲏⲣⲟⲥ ⲡⲉ ⲡⲉⲧⲟ ⲛⲉⲓⲉⲣⲃⲟⲟⲛⲉ ϩⲙ ⲡⲉϥⲃⲁⲗ ⲉϥⲕⲧⲟ ⲉⲃⲟⲗ ⲙⲡⲉϥϩⲟ ⲉϥⲱⲃϣ ⲙⲙⲟϥ ⲉϩⲉⲛⲯⲩⲭⲏ

14:9  ⲙⲉⲣⲉⲟⲩⲃⲁⲗ ⲛϥⲟϭϥ ⲥⲉⲓ ⲛⲧⲉϥⲧⲟ ⲁⲩⲱ ⲟⲩϫⲓⲛϭⲟⲛⲥ ⲉϥϩⲟⲟⲩ ϣⲁϥⲥⲉϣϥ ⲟⲩⲯⲩⲭⲏ

14:10  ⲟⲩⲃⲁⲗ ⲙⲡⲟⲛⲏⲣⲟⲥ ϣⲁϥⲣⲉⲓⲉⲣⲃⲟⲟⲛⲉ ⲉϫⲛ ⲡⲟⲉⲓⲕ ⲁⲩⲱ ⲛϥⲣϭⲣⲱϩ ϩⲓ ⲧⲉϥⲧⲣⲁⲡⲉⲍⲁ

14:11  ⲡⲁϣⲏⲣⲉ ⲥⲁⲛⲟⲩϣⲕ ⲛⲑⲉ ⲉⲧⲉ ⲟⲩⲛⲧⲁⲕ ⲁⲩⲱ ⲛⲅⲧⲁⲗⲉⲑⲩⲥⲓⲁ ⲉϩⲣⲁⲓ ⲙⲡϫⲟⲉⲓⲥ ϩⲛ ⲟⲩϭⲉⲡⲏ

14:12  ⲁⲣⲓⲡⲙⲉⲉⲩⲉ ϫⲉ ⲙⲡⲙⲟⲩ ⲛⲁⲱⲥⲕ ⲁⲛ ⲁⲩⲱ ⲙⲡⲟⲩⲧⲥⲁⲃⲟⲕ ⲉⲧⲇⲓⲁⲑⲏⲕⲏ ⲛⲁⲙⲛⲧⲉ

14:13  ⲉⲙⲡⲁⲧⲕⲙⲟⲩ ⲁⲣⲓⲡⲡⲉⲧⲛⲁⲛⲟⲩϥ ⲙⲡⲉⲕϣⲃⲏⲣ ⲁⲩⲱ ⲕⲁⲧⲁ ⲧⲉⲕϭⲟⲙ ⲥⲟⲟⲩⲧⲛ ⲛⲅϯ ⲛⲁϥ

14:14  ⲙⲡⲣⲙⲟⲕϩⲕ ⲛⲟⲩϩⲟⲟⲩ ⲉⲛⲁⲛⲟⲩϥ ⲁⲩⲱ ⲟⲩⲙⲉⲣⲓⲥ ⲛⲟⲩⲱϣ ⲉⲛⲁⲛⲟⲩⲥ ⲙⲡⲣⲧⲣⲉⲥⲣⲡⲉⲕⲃⲟⲗ

14:15  ⲁⲛ ⲕⲟⲟⲩⲉ [ⲉⲛⲉⲕⲙ]ⲟⲕϩ ⲉⲧⲣⲉ[ⲩ] [ⲕ]ⲗⲏⲣⲟⲥ [ⲛ]ⲧⲟⲟⲩ

14:16  ϫⲓ ⲛⲅⲁⲡⲁⲓⲧⲉⲓ ⲛⲧ[ⲉⲕⲯⲩⲭⲏ] [ϫ]ⲉ ⲛⲉⲕϣⲓⲛⲉ ⲛⲥⲁ ⲧ[ⲣⲩⲫⲏ ϩ]ⲛ ⲁⲙⲛⲧⲉ

14:17  ⲥⲁⲣⲝ ⲛⲓⲙ ⲛⲁⲣⲡⲗϭⲉ ⲛⲑⲉ ⲛⲟⲩϩⲟⲉⲓⲧⲉ ⲧⲇⲓⲁⲑⲏⲕⲏ ⲅⲁⲣ ϫⲓⲛ ⲉⲛⲉϩ ⲧⲉ ϩⲛ ⲟⲩⲙⲟⲩ ⲕⲛⲁⲙⲟⲩ

14:18  ⲛⲑⲉ ⲛϩⲛϭⲱⲃⲉ ϩⲓ ⲟⲩϣⲏⲛ ⲉϥⲣⲟⲟⲩⲧ --- ⲟⲩⲛ ϩⲟⲉⲓⲛⲉ ⲙⲉⲛ ⲥⲣⲟϥⲣⲉϥ ⲟⲩⲛ ϩⲟⲓⲛⲉ ⲇⲉ ϯⲟⲩⲱ --- ⲧⲁⲓ ⲧⲉ ⲑⲉ ⲛⲛⲅⲉⲛⲉⲁ ⲛⲥⲁⲣⲝ ϩⲓ ⲥⲛⲟϥ ϣⲁⲣⲉⲟⲩⲉⲓⲙⲟⲩ ⲛⲥⲉϫⲡⲉⲟⲩⲉⲓ

14:19  ϩⲱⲃ ⲛⲓⲙ ⲉϣⲁϥⲧⲁⲕⲟ ϣⲁϥⲱϫⲛ ⲁⲩⲱ ⲡⲉⲧⲣϩⲱⲃ ⲉⲣⲟϥ ⲛⲁⲃⲱⲕ ⲛⲉⲙⲁϥ

14:20  ⲛⲁⲓⲁⲧϥ ⲙⲡⲣⲱⲙⲉ ⲉⲧⲛⲁⲙⲟⲩ ϩⲛ ⲧⲥⲟⲫⲓⲁ ⲁⲩⲱ ⲡⲉⲧⲛⲁϣⲁϫⲉ ϩⲛ ⲧⲉⲥⲙⲛⲧⲣⲙⲛϩⲏⲧ

14:21  ⲡⲉⲧⲙⲉⲉⲩⲉ ⲉⲛⲉⲥϩⲓⲟⲟⲩⲉ ϩⲙ ⲡⲉϥϩⲏⲧ ⲁⲩⲱ ⲉϥⲙⲟⲕⲙⲉⲕ ϩⲛ ⲛⲉⲥⲡⲉⲑⲏⲡ

14:22  ⲟⲩⲁϩⲕ ⲛⲥⲱⲥ ⲛⲑⲉ ⲛⲟⲩⲣⲉϥϭⲱⲣϭ ⲛⲅϩⲱⲣⲕ ⲉⲣⲟⲥ ϩⲓ ⲛⲉⲥϩⲓⲟⲟⲩⲉ

14:23  ⲡⲉⲧϭⲱϣⲧ ⲉⲃⲟⲗ ϩⲓⲧⲛ ⲛⲉⲥϣⲟⲩϣⲧ ⲛⲁϫⲓⲥⲙⲏ ϩⲓⲣⲛ ⲛⲉⲥⲣⲟ

14:24  ⲡⲉⲧⲟⲩⲏϩ ϩⲓⲧⲟⲩⲛ ⲡⲉⲥⲏⲓ ϥⲛⲁⲡⲏⲥⲥⲉ ⲛⲧⲉϥⲛⲁⲉⲓⲱ ϩⲓ ⲡⲉⲥϫⲟ

14:25  [ …ⲥⲕⲏⲛ]ⲏ ⲉⲣⲁⲧⲥ ϩⲛ ⲛϥⲙⲧⲟ[ⲛ ϩⲛ ⲟⲩ]ⲙⲁ ⲛϭⲟⲓⲗⲉ [ⲛ]ⲛ[ⲓⲡⲉⲧⲛⲁ[ⲟⲩⲟⲩ]

14:26  ϥⲛⲁ [ⲛⲛⲉϥϣ]ⲏⲣⲉ ϩⲁ ⲧⲉⲥϩⲁⲉⲓⲃⲉⲥ ⲁⲩⲱ ϩⲁ ⲛⲉⲥⲕⲗⲁⲇⲟⲥ

14:27  ϥⲛⲁϫⲓϩⲁⲉⲓⲃⲉⲥ ϩⲁⲣⲟⲥ ϩⲛ ⲟⲩⲕⲁⲩⲙⲁ ⲁⲩⲱ ϥⲛⲁⲙⲧⲟⲛ ⲙⲙⲟϥ ϩⲙ ⲡⲉⲥⲉⲟⲟⲩ