CopSahBible2 - Sirach - 31

31:1  ϩⲛϩⲉⲗⲡⲓⲥ ⲉⲩϣⲟⲩⲉⲓⲧ ⲁⲩⲱ ϩⲛϭⲟⲗ ⲛⲟⲩⲣⲱⲙⲉ ⲛⲁⲑⲏⲧ ⲁⲩⲱ ϣⲁⲣⲉⲧⲣⲁⲥⲟⲩ ϯⲁⲥⲁⲓ ⲙⲡⲁⲑⲏⲧ

31:2  ⲛⲑⲉ ⲙⲡⲉⲧⲁⲙⲁϩⲧⲉ ⲛⲟⲩϩⲁⲓⲃⲉⲥ ⲉⲧⲡⲏⲧ ⲛⲥⲁ ϩⲉⲛⲧⲏⲩ ⲑⲟⲣⲁⲥⲓⲥ ⲛⲛⲣⲁⲥⲟⲩ ⲡⲉ

31:3  ⲉⲣⲉⲡⲁⲓ ⲧⲛⲧⲱⲛ ⲉⲡⲁⲓ ⲁⲩⲱ ⲡⲓⲛⲉ ⲛⲟⲩϩⲟ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲕϩⲟ

31:4  ⲟⲩ ⲡⲉⲧⲛⲁⲧⲃⲃⲟ ⲉⲃⲟⲗ ϩⲛ ⲡⲉⲧϫⲁϩⲙ ⲁⲩⲱ ⲟⲩ ⲡⲉⲧⲛⲁϫⲓⲙⲉ ϩⲛ ⲡϭⲟⲗ

31:5  ⲛⲧⲟⲛⲧⲛ ⲙⲛ ⲛϫⲓⲙⲁⲉⲓⲛ ⲙⲛ ⲛⲣⲁⲥⲟⲩ ϣⲟⲩⲉⲓⲧ [ⲁⲩⲱ ϣⲁⲣ]ⲉⲫⲏⲧ [ⲧ]ⲟⲛⲧⲛ ⲛⲑⲉ ⲛⲧⲉⲧϯⲛⲁⲁⲕⲉ

31:6  ⲉϣⲱⲡⲉ ⲛⲧⲁⲩⲧⲛⲛⲟⲟⲩⲥⲉ ⲛⲁⲕ ⲁⲛ ϩⲓⲧⲙ ⲡⲉ[ⲧϫ]ⲟⲥⲉ ϩⲛ ⲟⲩϭⲙⲡϣⲓⲛⲉ [ϫ]ⲉ ⲙⲡⲣϯⲡⲉⲕϩⲏⲧ ⲉⲣⲟⲟⲩ

31:7  ⲁⲣⲁⲥⲟⲩ ⲅⲁⲣ ⲡⲗⲁⲛⲁ ⲛϩⲁϩ ⲁⲩⲱ ⲛⲉⲧⲕⲱ ⲛϩⲧⲏⲩ ⲉⲣⲟⲟⲩ ⲁⲩϩⲉ ⲉⲃⲟⲗ

31:8  ⲉϣⲁⲩϫⲉⲕⲡⲛⲟⲙⲟⲥ ⲉⲃⲟⲗ ⲁϫⲛ ϭⲟⲗ ⲁⲩⲱ ⲟⲩϫⲱⲕ ⲉⲃⲟⲗ ⲛⲧⲧⲁⲡⲣⲟ ⲙⲡⲓⲥⲧⲟⲥ ⲡⲉ ⲧⲥⲟⲫⲓⲁ

31:9  ⲟⲩⲣⲱⲙⲉ ⲉϥⲕⲱⲧⲉ ϣⲁϥⲉⲓⲙⲉ ⲉϩⲁϩ ⲁⲩⲱ ⲡⲉⲛⲧⲁϥϫⲛⲧϩⲁϩ ϣⲁϥϫⲱ ⲛⲧⲙⲛⲧⲣⲙⲛϩⲏⲧ

31:10  ⲉⲣⲉⲡⲉⲧⲉⲙⲡⲟⲩϫⲟⲛⲧϥ ⲥⲟⲟⲩⲛ ⲛϩⲛⲕⲟⲩⲓ

31:11  ⲡⲉⲛⲧⲁϥⲙⲟⲩϣⲧ ⲇⲉ ⲛⲧⲟϥ ⲡⲉϣⲁϥⲧⲁϣⲉⲙⲛⲧⲥⲁⲃⲉ

31:12  ⲁⲓⲛⲁⲩ ⲉϩⲁϩ ϩⲙ ⲡⲧⲣⲁⲙⲟⲩϣⲧ ⲁⲩⲱ ⲧⲁⲙⲛⲧⲣⲙⲛϩⲏⲧ ⲡⲉ ⲡⲉϩⲟⲩⲟ ⲛⲛⲁϣⲁϫⲉ

31:13  ϩⲁϩ ⲛⲥⲟⲡ ⲁⲓⲕⲓⲛⲇⲩⲛⲉⲩⲉ ϣⲁ ⲡⲙⲟⲩ ⲁⲩⲱ ⲁⲓⲟⲩϫⲁⲓ ⲉⲧⲃⲉ ⲛⲁⲓ

31:14  ⲡⲉⲡⲛⲉⲩⲙⲁ ⲛⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲁⲱⲛϩ

31:15  ⲉⲣⲉⲧⲉⲩϩⲉⲗⲡⲓⲥ ⲅⲁⲣ ϩⲓ ⲡⲉⲧⲛⲟⲩϩⲙ ⲙⲙⲟⲟⲩ

31:16  ⲡⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ […]ⲗⲁⲁⲩ ⲁⲛ ⲁⲩⲱ ⲛⲉϥⲣϭⲱⲃ ϫⲉ ⲛⲧⲟϥ ⲡⲉ ⲧⲉ[ϥϩⲉⲗⲡⲓⲥ]

31:17  ⲛⲁⲓⲁⲧⲥ ⲛⲧⲉⲯⲩⲭⲏ ⲉⲧⲣϩⲟⲧⲉ ϩⲏⲧ[ϥ] ⲙⲡϫⲟⲉⲓⲥ

31:18  ⲉϥⲕⲱ ⲛϩⲧⲏϥ ⲉⲛⲓⲙ ⲁⲩⲱ ⲛⲓⲙ ⲡⲉ ⲡⲉϥⲧⲁϫⲣ[ⲟ]

31:19  ⲉⲣⲉⲛⲃⲁⲗ ⲙⲡϫⲟⲉⲓⲥ ϭⲱϣⲧ ⲉϫⲛ ⲛⲉⲧⲙⲉ ⲙⲙⲟϥ ⲧⲛⲁϣⲧⲉ ⲡⲉ ⲛⲧⲉⲩϭⲟⲙ ⲁⲩⲱ ⲡⲧⲁϫⲣⲟ ⲙⲡⲉⲩⲛⲁϩⲧⲉ ⲡⲉ ⲛⲧⲟϥ ⲡⲉ ⲧⲉⲩϩⲉⲗⲡⲓⲥ ϩⲛ ⲟⲩⲕⲁⲩⲙⲁ ⲁⲩⲱ ⲑⲁⲓⲃⲉⲥ ⲙⲡⲛⲟⲩ ⲙⲙⲉⲉⲣⲉ ⲁⲩⲱ ⲧⲉⲩⲃ[ⲟⲏⲑⲓⲁ ϩⲛ ⲟⲩϩⲉ ]

31:20  ⲉϥϫⲓⲥⲉ ⲛⲧⲉⲩⲯⲩⲭⲏ ⲉϥⲣⲟⲩⲟⲉⲓⲛ ⲉⲛⲉⲩⲃⲁⲗ ⲉϥϯ ⲛⲁⲩ ⲛⲟⲩⲧⲁⲗϭⲟ ⲙⲛ ⲟⲩⲱⲛϩ ⲙⲛ ⲟⲩⲥⲙⲟⲩ

31:21  ⲟⲩⲡⲣⲟⲥⲫⲟⲣⲁ ⲉⲥϫⲁϩⲙ ⲡⲉ ⲡⲉⲧⲧⲁⲗⲟ ⲉϩⲣⲁⲓ ϩⲛ ⲟⲩϫⲓⲛϭⲟⲛⲥ

31:22  ⲁⲩⲱ ⲙⲉϥⲟⲩⲉϣⲡϫⲱϩⲙ ⲛⲛⲁⲛⲟⲙⲟⲥ

31:23  ⲙⲉⲣⲉⲡⲉⲧϫⲟⲥⲉ ⲟⲩⲉϣⲛⲉⲡⲣⲟⲥⲫⲟⲣⲁ ⲛⲛⲁⲥⲉⲃⲏⲥ ⲁⲩⲱ ⲛⲛⲉϥⲕⲱ ⲉⲃⲟⲗ ⲛⲛⲉⲩⲛⲟⲃⲉ ϩⲙ ⲡⲁϣⲁⲓ ⲛⲛⲉⲩⲑⲩⲥⲓⲁ

31:24  ⲉϥⲟ ⲛⲑⲉ ⲙⲡⲉⲧϣⲱⲱⲧ ⲛⲟⲩϣⲏⲣⲉ ⲙⲡⲉⲙⲧⲟ ⲉⲃⲟⲗ ⲙⲡⲉϥⲉⲓⲱⲧ ⲡⲉⲧⲧⲁⲗⲟ ⲉϩⲣⲁⲓ ⲛϩⲉⲛⲑⲩⲥⲓⲁ ϩⲛ ϩⲉⲛⲭⲣⲏⲙⲁ ⲛϩⲏⲕⲉ

31:25  ⲡⲱⲛϩ ⲙⲫⲏⲕⲉ ⲟⲩⲟⲉⲓⲕ ⲉϥϭⲣⲱϩ ⲙⲙⲟϥ ⲡⲉ ⲡⲉⲧⲛⲁϩⲟⲩⲣⲱⲟⲩ ⲙⲙⲟϥ ⲟⲩⲣⲱⲙⲉ ⲛⲥⲛⲟϥ ⲡⲉ

31:26  ⲉϥⲟ ⲛⲑⲉ ⲙⲡⲉⲧϩⲱⲧⲃ ⲙⲡⲉⲧϩⲓⲧⲟⲩⲱϥ ⲛϭⲓ ⲡⲉⲧⲛⲁϥⲓⲧⲉϥϭⲓⲛⲱⲛϩ

31:27  ⲡⲉⲧⲛⲁϥⲉϭⲟⲩϫⲁⲓⲃⲉⲕⲉ ⲙⲡⲉϥⲃⲉⲕⲉ ⲉϥⲟ ⲛⲑⲉ ⲙⲡⲉⲧⲡⲱϩⲧ ⲉⲃⲟⲗ ⲛⲟⲩⲥⲛⲟϥ

31:28  ⲟⲩⲁ ⲉϥⲕⲱⲧ ⲙⲛ ⲟⲩⲁ ⲉϥϣⲟⲣϣⲣ ⲟⲩ ⲡⲉ ⲡⲉⲩϩⲏⲩ ⲛⲥⲁ ϩⲓⲥⲉ

31:29  ⲟⲩⲁ ⲉϥϣⲗⲏⲗ ⲙⲛ ⲟⲩⲁ ⲉϥⲥⲁϩⲟⲩ ⲉⲣⲉⲡϫⲟⲉⲓⲥ ⲛⲁⲥⲱⲧⲙ ⲉⲧⲉⲥⲙⲏ ⲛⲛⲓⲙ ⲙⲙⲟⲟⲩ

31:30  ⲟⲩⲁ ⲉⲁϥϩⲟⲣⲡϥ ⲉⲩⲕⲱⲱⲥ ⲛϥⲥⲟⲧϥ ⲛϥϫⲱϩ ⲉⲣⲟϥ ⲟⲩ ⲡⲉ ⲫⲏⲩ ϫⲉ ⲁϥϩⲟⲣⲡϥ

31:31  ⲧⲁⲓ ⲧⲉ ⲑⲉ ⲛⲟⲩⲣⲱⲙⲉ ⲉϥⲛⲏⲥⲧⲉⲩⲉ ϩⲁ ⲛⲉϥⲛⲟⲃⲉ ⲁⲩⲱ ⲟⲛ ⲉϥⲉⲓⲣⲉ ⲙⲙⲟⲟⲩ ⲛⲓⲙ ⲡⲉⲧⲛⲁⲥⲱⲧⲙ ⲉⲡⲉϥϣⲗⲏⲗ ⲁⲩⲱ ⲟⲩ ⲡⲉ ⲫⲏⲩ ϫⲉ ⲁϥⲑⲃⲃⲓⲟϥ